Օկուպացիա, եվրաատլանտյան ինտեգրացիա, համավարակ. Վրաստանի վարչապետը տարեկան զեկույցով է հանդես եկել
Վրաստանի վարչապետ Գիորգի Գախարիան Վրաստանի խորհրդարանին է ներկայացրել 2019 թվականի իր տարեկան հաշվետվությունը և երկրի տարածքային ամբողջականության վերականգնումը և եվրաատլանտյան ինտեգրացիան համարել է հիմնական խնդիրներ:
Ընդդիմությունը վրդովվել է, որ վարչապետը ոչ մի կերպ չի անդրադարձել 2019 թվականի ամռանը բազմահազար բողոքի ակցիան դաժանաբար ցրելու փաստին։
Հաշվետվության հիմնական կետերը:
Օկուպացիա և տարածքային ամբողջականություն
Վարչապետի խոսքերով՝ Վրաստանի ինքնիշխանության ամրապնդումը և տարածքային ամբողջականության ապահովումը Վրաստանի արտաքին քաղաքականության գլխավոր առաջնահերթությունն է:
Գիորգի Գախարիան ասել է, որ «տարածքային ամբողջականության վերականգնման միակ ուղին խաղաղ ճանապարհն է, և այդ ճանապարհն անցնում է մեր ռազմավարական գործընկերների միջով, այդ գործընթացներին նրանց ակտիվ մասնակցության միջոցով»:
Վարչապետը հայտարարել է, որ ռուսական օկուպացիան մնում է ազգային անվտանգության գլխավոր խնդիրը, որ Ռուսաստանի Դաշնությունը՝ որպես արդյունավետ վերահսկողություն իրականացնող պետություն պատասխանատվություն է կրում օկուպացված տարածքներում մարդու հիմնարար իրավունքների բոլոր խախտումների համար:
Եվրաատլանտյան ինտեգրացիա
Գախարիան հայտարարել է, որ եվրոպական և եվրաատլանտյան ինտեգրացիան անշրջելի, կարևորագույն ուղղություն է երկրի համար, և Վրաստանի կառավարության առավել կարևոր խնդիրն է եվրոպական գործընկերների հանդեպ բոլոր պարտականությունների լիարժեք կատարումը, որի համար կառավարությունը կոնկրետ քայլեր կձեռնարկի:
Գախարիան նշել է, որ «երկրի անփոփոխ նպատակն է ՆԱՏՕ-ին լիիրավ անդամակցությունը»:
Նա նաև նշել է ԱՄՆ-ի՝ որպես ռազմավարական գործընկերոջ հետ հարաբերությունների կարևորությունը:
Գախարիան շնորհակալություն է հայտնել եվրոպական և ամերիկյան գործընկերներին կորոնավիրուսի համավարակաի դեմ պայքարում Վրաստանին օգնելու համար:
Սահմանադրական փոփոխություններ
«Երկրում տեղի ունեցող ամենակարևոր գործընթացը սահմանադրության մեջ ընտրական համակարգին վերաբերող փոփոխություններ մտցնելու գործընթացն է, որը ընդունվել է երկու լսումներով, երրորդ լսումը տեղի կունենա խորհրդարանում երկուշաբթի օրը:
Քվեարկությունը տեղի կունենա հունիսի 29-ին, և կլինի խորհրդարանական ժողովրդավարություն՝ հիմնված համամասնական ընտրական համակարգի վրա»,- ասել է Գախարիան:
Կորոնավիրուսի համավարակը
Վարչապետը նաև անդրադարձել է կորոնավիրուսի համավարակի հետ կապված ստեղծված իրավիճակին և նշել, որ Վրաստանում վարակված բոլոր մարդիկ ստացիոնար բուժում են անցել, ոչ ոք չի մնացել առանց բժշկական օգնության:
Հետճգնաժամային շրջան
Վարչապետի խոսքերով՝ Վրաստանի կառավարությունը աշխատում է միջազգային գործընկերների հետ և խոշոր միջազգային խորհրդատվական խմբերի հետ, որպեսզի հետճգնաժամային տնտեսական վերականգնման ծրագիրը դարձնի իրատեսական և արդյունավետ:
«Մենք պետք է համավարակի ճգնաժամը վերածենք մեր երկրի համար տնտեսական հնարավորության: Այսօր համաշխարհային տնտեսությունը փոխվում է, դրա համար մենք հնարավորություն ունենք վրացական տնտեսությունը մարտահրավերների տնտեսությունից վերածելու հնարավորությունների տնտեսության», — ասել է Գախարիան:
Ենթակառուցվածքային ծրագրեր
Վարչապետի խոսքերով՝ ներկայումս կառուցվում են միջազգային նշանակության 140 կմ նոր ավտոճանապարհներ: Դրանցից մինչև 2020 թվականի վերջը ընդհանուր առմամբ կբացվի 70 կմ: Դրանց թվում են՝ Քութայիսիի շրջանցիկ ճանապարհի երկու լրացուցիչ երթուղիները, Խաշուրիի շրջանցիկ ճանապարհը և Սամթրեդիա-Գրիգոլեթի ճանապարհի Ջափան-Լանջուտի հատվածը:
Գախարիան ասել է, որ 2019 թվականին շուրջ 400 գյուղում կառուցվել են ամբուլատորիաներ, ինչպես նաև ստեղծվել է շտապօգնության 41 նոր կենտրոնն:
Անցած տարի ավարտվել են Ուռեկիի, Մեստիի, Անակլիայի, Հոբիի և Կասպիի 24-ժամյա ջրամատակարարման նախագծերը, և տարվա վերջին Վրաստանի 300 հազար քաղաքացի կունենա շուրջօրյա ջրամատակարարում:
2020 թվականի խոշոր ձեռքբերումներից մեկը կլինի Քութայիսիի միջազգային համալսարանի բացումը: Վարչապետը հույս է հայտնել, որ նոր համալսարանը երկրում բարձրագույն կրթության նոր ստանդարտ կսահմանի:
Ընդդիմության գնահատականը
Ընդդիմությունը նույնպես ներկա է գտնվել Գիորգի Գախարիայի զեկույցի շնորհանդեսին և վրդովվել է, որ վարչապետն իր հաշվետվության մեջ չի անդրադարձել 2019 թվականի հունիսի 20-ի իրադարձություններին։ Խոսքը գնում է իշխանությունների կողմից՝ ընդդեմ Ռուսաստանի պետդումայի պատգամավորի՝ Վրաստանի խորհրդարանում ներկայության բողոքի ակցիան ջրցանների և ռետինե փամփուշտների կիրառմամբ ցրելու մասին:
«Ձեր հաշվետվությունը ներկայացնելու ժամանակ դուք չհիշեցիք հունիսի 20-ի մասին, ինչո՞ւ եք դուք մոռացել այդ օրը: Դուք այն ջնջել եք հիշողությունի՞ց, թե՞ օրացույցից: Մի՞թե այդ իրադարձությունները տեղի չեն ունեցել 2019 թվականին», — վարչապետին դիմեց «Եվրոպական Վրաստան» խմբակցության անդամ Օթար Կախիձեն:
Կախիձեն կառավարության ղեկավարին հիշեցրեց անցած տարվա հունիսի 20-ի իրադարձությունները և հարցրեց նրան, արդյոք պատասխանատվություն զգո՞ւմ է այդ իրադարձությունների համար:
«Միացյալ ազգային շարժում» խմբակցությունը հիշեցրեց վարչապետին Անակլիա նավահանգստի նախագծի ձախողումը, ինչպես նաև կորոնավիրուսի համավարակից տուժած և առանց օգնության մնացած քաղաքացիների մասին:
«Երեկ հաստատվել է բյուջեն, իսկ այսօր այն մեռած է, որովհետև (համավարակից տուժածների համար) փոխհատուցումը պետք է կազմեր շուրջ 500 միլիոն լարի (շուրջ 160 մլն դոլար), բայց ովքեր որ պետք է այն ստանային, նրանց կեսը ոչինչ չստացավ:
Վարչապետը նշեց Անակլիայի և Փոթիի նավահանգիստները: Նա ընդգծեց, որ հնարավորինս շատ ամերիկյան նավեր պետք է մտնեն Սև ծով:
Բայց նա մոռացել է, որ առաջին նավը պետք է Անակլիայի նավահանգիստ մտներ 2020 թվականի վերջին, և որ պետք է ավարտված լիներ ստորջրյա նավահանգստի շինարարությունը:
Այս հեռանկարը այս կառավարության օրոք հավասար է զրոյի, քանի որ նրանք այդ նվերն արել են Ռուսաստանին»», — ասել է «Միացյալ ազգային շարժման» առաջնորդներից մեկը՝ Ռոման Գոցիրիձեն:
