Փաշինյանը փոխո՞ւմ է իր կերպարը ընտրությունների նախաշեմին. BBC-ի հոդվածը
Փաշինյանի տեսահոլովակները սոցցանցերում. BBC-ի հոդվածը
BBC-ի ռուսական ծառայությունը հրապարակել է «Ինչո՞ւ է ՀՀ առաջնորդը տխրում Զեմֆիրա և Լեդի Գագա լսելիս։ Հասկանալով Փաշինյանի նոր կերպարը» վերնագրով հոդվածը։ Բրիտանական պարբերականի հոդվածում քննարկվում է, թե ինչու է Հայաստանի վարչապետը գրեթե ամեն առավոտ սկսում իր հետևորդներին բարի լույս մաղթող երաժշտական տեսահոլովակներ հրապարակելով։ Հեղինակը հարցնում է՝ սա «ամերիկյան PR ռազմավարությո՞ւն է, թե՞՝մաքուր ոգեշնչում», և ինչու է Նիկոլ Փաշինյանն ավելի ակտիվ դարձել սոցցանցերում՝ փոխելով իր կերպարը։
Վարչապետն արդեն արձագանքել է հոդվածին։ «Բանը հասավ միջազգային մամուլին»,- գրել է նա սոցցանցերում և կիսվել հրապարակման հղումով։
- «Որոշել ենք դուրս գալ «գրպանից» և լինել անկախ պետություն». Փաշինյան
- «Խաղաղությունը ՀՀ-ից մեքենայով Բաքու և Ադրբեջանից Երևան գնալու մասին է»․ Փաշինյան
- «Հայաստան-Թուրքիա կարգավորման պահը մոտենում է»․ Փաշինյան
Ահա, թե ինչ է գրում BBC-ի ռուսական ծառայության հեղինակ Գրիգոր Աթանեսյանը Փաշինյանի առավոտյան տեսահոլովակների մասին.
Միջին տարիքի, ճաղատ տղամարդը նստած լսում է հայկական շանսոն և ժողովրդական երգեր, Ադել, Ջոն Լենոն, ֆրանսիական և ռուսական ռեփ, DDT, բարոկկո երաժշտություն, Վիսոցկու գնչուական սիրավեպեր և Զեմֆիրա (Ռուսաստանում համարվում է օտարերկրյա գործակալ): Այդ տեսանյութերում նա կկոցում է աչքերը արևի տակ, կապում է փողկապը, դեղին վարդը դնում բաճկոնի գրպանը կամ գրում է համակարգչով: Բայց ամենից հաճախ նա ուղիղ նայում է առաջ՝ երբեմն ժպտալով, երբեմն մտահոգ, երբեմն տխուր:
Այդ մարդը Հայաստանի վարչապետ Նիկոլ Փաշինյանն է։ Երկրում խորհրդարանական ընտրություններ տեղի կունենան 2026 թվականի հունիսին, և քարոզարշավի նախաշեմին քաղաքական գործիչը սկսել է փոխել իր հանրային կերպարը։
Քաղաքագետ Միքայել Զոլյանը BBC-ի հետ զրույցում տեսահոլովակների մասին հետևյալ կարծիքն է հայտնել. «Վատ ժամանակներն ավարտվում են։ Կարող եք դադարեցնել վշտանալն ու վախենալը, սկսել ապրել։ Եվ վայելել կյանքը»։
PR՝ ամերիկյան Edelman ընկերության աջակցությա՞մբ
BBC-ն հաղորդում է, որ Փաշինյանն իր առավոտյան տեսանյութերը բացատրում է որպես իր հետևորդներին բարի լույս մաղթելու և նրանց հանդեպ իր սերը արտահայտելու միջոց։ Համապատասխանաբար, յուրաքանչյուր տեսանյութի վերջում նա սրտիկ է ցույց տալիս։
Հետխորհրդային երկրների երիտասարդների շրջանում ամենատարածված տեսանյութն այն էր, որտեղ ՀՀ վարչապետը լսում է Զեմֆիրայի «PMML» երգը։ Փաշինյանի այս գրառումն արդեն ավելի քան 16 միլիոն դիտում է հավաքել Instagram-ում։ Օգտատերերը նույնիսկ կրկնօրինակել են այն։ Եվ, ըստ BBC-ի, նույնիսկ բիզնեսներն են օգտագործել մեմը գովազդի համար։
Ավելին, ՀՀ վարչապետը նմանատիպ տեսանյութեր է հրապարակում ոչ միայն ՀՀ-ից, այլև արտերկրից՝ լինի դա Ռուսաստան, թե Ղազախստան։
Սակայն բրիտանական լրատվամիջոցի հոդվածում գլխավոր հարցը հետևյալն է. «Ո՞վ է մտածել այս տեսահոլովակների գաղափարը և ո՞վ է ընտրում դրանց երաժշտությունը»։
Պարզվում է, որ ամերիկացի PR մասնագետը մի տեսություն է տարածել, որի համաձայն՝ Փաշինյանի տեսանյութի հետևում կանգնած է հասարակայնության հետ կապերի խոշորագույն գործակալություններից մեկը՝ Edelman-ը։ Այդ մասին հայտարարել է ռուս մարքեթոլոգ Եգոր Բոլկոնսկին։ Սա շատերին հանգեցրել է այն մտքին, որ նյույորքյան գործակալությունն է խորհուրդներ տալիս ՀՀ վարչապետին։
Սակայն Edelman-ը կտրականապես հերքել է այդ ենթադրությունը։ Իսկ Եգոր Բոլկոնսկին BBC-ին ասել է, որ չգիտի՝ ընկերությունը համագործակցո՞ւմ է Հայաստանի կառավարության հետ, թե՞ ոչ.
«Ես դատում եմ միայն նրա խոսքերից և էկրանին հայտնված որոշ սլայդերից»։
Վարչապետի մամուլի խոսնակ Նազելի Բաղդասարյանը նույնպես հերքել է Edelman-ի ներգրավվածությունը։ Նա պարբերականին հայտնել է, որ տեսահոլովակներ հրապարակելու գաղափարը Փաշինյանինն է։ Ավելին, վարչապետն անձամբ է ընտրում յուրաքանչյուր գրառման համար օգտագործվող երաժշտությունը։
Ինչպե՞ս է փոխվել Փաշինյանի կերպարը
BBC-ն հիշեցնում է Փաշինյանի ժողովրդականությունը, որը նա ձեռք բերեց 2018 թվականին, երբ գլխավորեց «թավշյա հեղափոխությունը» և եկավ իշխանության։
Սակայն երկու տարի անց՝ 2020 թվականին, Հայաստանը պարտություն կրեց Ղարաբաղյան երկրորդ պատերազմում։ Այնուհետև, 2023 թվականի սեպտեմբերին՝ Ադրբեջանի ռազմական գործողություններից հետո, ԼՂ-ի գրեթե բոլոր հայերը լքեցին իրենց հայրենիքը։
«Երևանում և ամբողջ երկրում շատերը կարծում էին, որ երկիրը փակուղի է մտել, և որ իրավիճակը միայն կվատանա։ Սակայն այս ամռանը դիվանագիտական առաջընթաց տեղի ունեցավ»,- գրում է BBC-ն։
Խոսքը Վաշինգտոնում կայացած խաղաղության գագաթնաժողովի մասին է, որտեղ Հայաստանի և Ադրբեջանի առաջնորդները համաձայնեցին «տարածաշրջանում առաջ մղել խաղաղությունը»։ Այնտեղ նաև նախաստորագրվեց խաղաղության համաձայնագիր՝ ԱՄՆ նախագահի միջնորդությամբ։ Այլ կերպ ասած, Փաշինյանի «խաղաղության օրակարգը» սկսեց պտուղներ տալ։
«Այժմ նրա խնդիրն է ընտրողներին լավատեսությամբ վարակել։ Սոցցանցերը դրա հիմնական հարթակն են, և նա ունի եզակի փորձ այս հարցում»,- գրում է BBC-ն։
Պարբերականը հիշեցնում է, որ 2018 թ.-ին Փաշինյանի գլխավորած բողոքի ցույցերը կազմակերպվում էին Facebook-ի միջոցով։ Հայաստանի հարյուր հազարավոր քաղաքացիներ լսում և դիտում էին այն ժամանակվա ընդդիմության առաջնորդի ելույթները։ Սակայն 2020 թվականի Ղարաբաղյան պատերազմից հետո Փաշինյանը սկսեց ավելի զուսպ գործել։
«Նրա կինը շարունակեց օգտագործել սոցիալական ցանցերը ավելի ազատ ոճով։ Եվ շատերը քննադատում էին նրան դրա համար։ Նա, կարծես, անտեսում էր, թե ինչ ժամանակներ են, այն փաստը, որ պատերազմ է եղել, շատ զոհեր կան։ Կարծում եմ՝ այդ պատճառով Փաշինյանը փորձում էր ավելի զուսպ լինել»,— BBC-ին ասել է Միքայել Զոլյանը։
Քաղաքագետ Տիգրան Գրիգորյանի խոսքով՝ «Փաշինյանի համար սգո շրջանն ավարտվել է, մեկնարկել է քարոզարշավը»։ Այժմ նա և իր կուսակցությունը լրատվամիջոցներն ու սոցիալական ցանցերն օգտագործում են քաղաքական պայքարի համար։
«Իշխող կուսակցության բոլոր հիմնական անդամները շատ ակտիվ են սոցիալական ցանցերում, երիտասարդական ցանցերում»,- BBC-ի հետ զրույցում նկատել է նա։
Քաղաքագետի խոսքով՝ հասարակական կարծիքի ուսումնասիրությունները ցույց են տալիս, որ երիտասարդներն ամենաքիչն են աջակցում Փաշինյանին և նրա կառավարությանը։
Եվ հենց դրանով է բացատրվում ընտրազանգվածի այս հատվածին ավելի ակտիվորեն ներգրավելու փորձը։
Տիգրան Գրիգորյանը կարծում է, որ Փաշինյանի տեսահոլովակներն ավելի հետաքրքիր են Հայաստանից դուրս գտնվող երիտասարդների համար։ Իսկ Միքայել Զոլյանը նկատում է, որ վերջին յոթ տարիների ընթացքում Հայաստանում մեծամասնությունն արդեն ձևավորել է նրա հանդեպ իր վերաբերմունքը։
«Մարդիկ բաժանվել են 3 մեծ խմբի։ Մի խումբն աջակցում է նրան։ Ոմանք ամբողջությամբ, ոմանք՝ վերապահումներով, ոմանք՝ որպես չարյաց փոքրագույն։ Մյուս խումբը նրանք են, ովքեր նրան ատում են։ Նրա արած ամեն ինչ նրանց մեջ կատաղի ատելություն է առաջացնում։ Եվ, բնականաբար, այդ բոլոր տեսանյութերը նրանց ավելի են նյարդայնացնում։ Բայց կա նաև երրորդ խումբ, որը կամ իրեն հեռու է պահում քաղաքականությունից, կամ երբեք չի հետաքրքրվել քաղաքականությամբ, կամ էլ հոգնել է դրանից»։
Քաղաքագետը ենթադրում է, որ հնարավոր է՝ Հայաստանի վարչապետը նոր հետևորդներ է ձեռք բերում հենց վերջին խմբից։
Հետևեք մեզ — Facebook | Youtube
Փաշինյանի տեսահոլովակները սոցցանցերում. BBC-ի հոդվածը
