«Քաղաքական կամքի դեֆիցիտ չունենք»․ Փաշինյանը՝ ճանապարհների բացման մասին
Փաշինյանը՝ ճանապարհների բացման մասին
«Քաղաքական կամքի բացակայություն կամ դեֆիցիտ չունենք»,- խոսելով երկաթուղային և ավտոմոբիլային ճանապարհների բացման մասին հայտարարել է Հայաստանի վարչապետ Նիկոլ Փաշինյանը։
Ազգային ժողովում կազմակերպված հարցուպատասխանի ժամանակ Փաշինյանը տեղեկացրել է, որ դեկտեմբերի 6-ին Մոսկվայում Հայաստանի, Ռուսաստանի և Ադրբեջանի փոխվարչապետները քննարկել են Երասխ-Ջուլֆա-Օրդուբադ-Մեղրի-Հորադիզ երկաթուղու վերականգնման թեման։ Կառավարության ղեկավարի փոխանցմամբ՝ «որևէ կոնկրետ արդյունք» չի գրանցվել։
Երասխ-Ջուլֆա-Օրդուբադ-Մեղրի-Հորադիզ երկաթուղու վերականգնման պայմանավորվածությունը ձեռք էր բերվել 2021 թվականի դեկտեմբերի 14-ին, Բրյուսելում։ Հայաստանի վարչապետ Նիկոլ Փաշինյանն ավելի ուշ հայտարարել էր, որ այդ հանդիպումից օրեր անց Ալիևը հրաժարվել է ստորագրել պայմանավորվածությունն ամրագրող փաստաթուղթը։
2022 թ․-ի նոյեմբերի վերջին՝ Ռուսաստանի նախագահի հետ հանդիպմանը հաջորդած կառավարության նիստում Փաշինյանն ասել էր, որ Երևանը «որոշակի ազդակներ է ստացել» և հնարավոր է՝ սկսի երկաթուղու վերականգնման աշխատանքը։ Կառավարության ղեկավարը չէր հստակեցրել՝ ինչ ազդակների մասին է խոսքը, և որտեղից ենք դրանք ստացվել։
Փոխվարչապետների մոսկովյան հանդիպման մանրամասները, Փաշինյանի մեկնաբանությունը
Ի՞նչ է հաղորդվել փոխվարչապետների հանդիպման մասին
Մոսկվայում Օվերչուկ-Գրիգորյան-Մուստաֆաև հանդիպման մասին նախապես չէր հայտարարվել։ Դեկտեմբերի 6-ի ուշ երեկոյան հաղորդագրություն տարածվեց այն մասին, որ փոխվարչապետները Մոսկվայում անցկացրել են աշխատանքային խմբի հերթական՝ 11-րդ նիստը:
Փոխվարչապետների եռակողմ ձևաչափը գործում է արդեն մեկուկես տարի։ Նիստերի անցկացումից հետո սուղ տեղեկատվություն է հաղորդվում։ Հայտնի է, որ խմբի աշխատանքի արդյունքում ստեղծվել են փորձագիտական երկու աշխատանքային ենթախմբեր՝ երկաթուղային և ավտոտրանսպորտային փոխադրումների հարցերով։ Թե ինչ արդյունքների են հասել այս խմբերը՝ դժվար է ասել։
Հայկական կողմի փոխանցմամբ՝ նիստի ընթացքում քննարկվել են հարցեր` կապված Հայաստանի, Ադրբեջանի և Ռուսաստանի միջև ու տարածաշրջանում «երկաթուղու կառուցման, երկաթուղային հաղորդակցության զարգացման և փոխադրումների կազմակերպման հետ»։
«Կողմերը կշարունակեն աշխատել Հայաստանի, Ռուսաստանի և Ադրբեջանի ղեկավարների՝ տարածաշրջանում տրանսպորտային և տնտեսական կապերի ապաշրջափակման վերաբերյալ եռակողմ հայտարարությունների իրականացման ուղղությամբ»,- ասված է հաղորդագրությունում։
«Չեմ կարող ասել, որ որևէ կոնկրետ արդյունք ունենք»․ Փաշինյան
Խոսելով նախօրեին փոխվարչապետների եռակողմ ձևաչափով կազմակերպված հանդիպման մասին՝ վարչապետը հայտարարել է․
«Ցավոք սրտի, չեմ կարող ասել, որ որևէ կոնկրետ արդյունք ունենք»։
Ազգային ժողով-կառավարություն հարցուպատասխանի ժամանակ նա շեշտել է՝ Հայաստանը պատրաստ է «օր առաջ» սկսել երկաթուղու վերականգնումը, շահագրգռված է ծրագրի իրականացմամբ․
«Ավելորդ է ասել մեր ընկալումը՝ երկաթուղին և ճանապարհները պետք է գործեն Հայաստանի օրենսդրության շրջանակներում։ Ցանկացած պահի, երբ այս արձանագրումը թղթի վրա կանենք, այդ պահից մենք պատրաստ ենք սկսել աշխատանքները»։
Վարչապետի խոսքով՝ թեև փոխվարչապետների վերջին հանդիպմանն անդրադարձ չի եղել ավտոմոբիլային ճանապարհներին, Հայաստանը պատրաստ է նաև դրանց բացմանը, բայց կրկին երկրի օրենսդրության շրջանակներում։ Վստահեցրել է՝ «քաղաքական կամքի բացակայություն կամ դեֆիցիտ» չկա։
Փաշինյանը նաև հիշեցրել է երեք անցագրային կետեր բացելու հայկական կողմի առաջարկը։
«Պատրաստ ենք նոր ճանապարհային ենթակառուցվածքների ստեղծմանը, կառուցմանը լավագույն երթուղով։ Դա մեր ճանապարհն է, և ենթադրում ենք, հույս ունենք դրանով նաև մեծ միջազգային տրանզիտ ապահովել»,- շեշտել է նա։
Հետևեք մեզ — Facebook | Youtube | Telegram
Փաշինյանը՝ ճանապարհների բացման մասին
