«Սերժ Սարգսյանն էլ մտադիր չէր հեռանալ, բայց ստիպված եղավ»․ Փաշինյանը՝ կաթողիկոսի մասին
Փաշինյանը կաթողիկոսին համեմատել է Սերժ Սարգսյանի հետ
Հայաստանի վարչապետ Նիկոլ Փաշինյանը լրագրողների հետ ճեպազրույցում հայտարարել է՝ ինքն ու եկեղեցու բարենորոգման խորհրդի մյուս անդամները պատրաստվում են այպես անել, որ կաթողիկոսը փոխի մտադրությունն ու հեռանա։
«[ՀՀ երրորդ նախագահ] Սերժ Սարգսյանն էլ հեռանալու մտադրություն չուներ, բայց ստիպված էր հեռանալ։ Նույնն էլ՝ Կտրիճ Ներսիսյանը [կաթողիկոսի աշխարհիկ անունը]։ Ստիպված կլինի հեռանալ»,- հայտարարել է Փաշինյանը։
Միաժամանակ վարչապետը վստահեցրել է՝ Գարեգին Բ-ին կաթողիկոսական գահից հեռացնելու գործընթացը լինելու է «անցնցում, քրիստոնեական հանդուրժողականությամբ և սիրով տոգորված»։
Փաշինյանը 10 եպիսկոպոսների հետ եկեղեցու բարենորոգման խորհուրդ է ձևավորել, կաթողիկոսի հեռացման ճանապարհային քարտեզ ներկայացրել։ Ընդդիմադիրները վարչապետին մեղադրում են եկեղեցու ներքին գործերին միջամտելոu և այդ կերպ երկրի օրենքները խախտելու մեջ։ Փաշինյանն արձագանքում է սաղմոսներով և պնդում՝ հանդես է գալիս նաև որպես Հայ Առաքելական եկեղեցու հետևորդ։
Պետության և կրոնական կազմակերպությունների հարաբերությունները կարգավորված են ՀՀ Սահմանադրությամբ և օրենքներով։ Երկրի մայր օրենքի՝ Սահմանադրության համաձայն՝ կրոնական կազմակերպություններն անջատ են պետությունից, իսկ պետությունն ապահովում է դրանց գործունեության ազատությունը։
Վերջին զարգացումների մասին՝ հակիրճ
- «Ամենայն հայոց կաթողիկոսը չի գնա դասալքության»․ Մայր Աթոռի դիվանապետ
- Փաշինյանը որոշել է հանդիպել «կաթողիկոսի թյուր ընթացքը» քննադատող հոգևորականների հետ
- «Որոշ ժամանակով կասեցնե՛լ ծառայությունը»․ կուսակրոն հայ հոգևորականին ինտիմ տեսանյութ է վերագրվում
«Փաշինյանը խախտում է Սահմանադրությունը, Քրեական օրենսգիրքը»
Խորհրդարանական ընդդիմությունը պնդում է՝ Սահմանադրության համաձայն՝ պետությունն անջատ է եկեղեցուց, իսկ վարչապետը, ստորագրելով եկեղեցու բարենորոգման խորհրդի հայտարարությունը, խախտել է երկրի մայր օրենքը, միջամտել եկեղեցու ներքին գործերին։
«Սահմանադրության 6-րդ հոդվածի առաջին մասը, որտեղ ասվում է, որ պետական մարմիններն ու պաշտոնատար անձինք կարող են իրականացնել միայն այնպիսի գործողություններ, որոնց համար լիազորված են Սահմանադրությամբ կամ օրենքով, չունենալով նման լիազորություն, փաստացի Փաշինյանը դադարեցրել է 6-րդ հոդվածի կատարումը, ինչը հավասարազոր է Քրեական օրենսգրքով ամրագրված սահմանադրական կարգը տապալելուն»,- նկատել է պատգամավոր Արծվիկ Մինասյանը։
«Հայաստան» խմբակցության անդամ, մասնագիտությամբ իրավաբան Արծվիկ Մինասյանի խոսքով՝ Փաշինյանը խախտել է նաև Քրեական օրենսգրքի մի շարք հոդվածներ, ուստի կարող է դատարանի առջև կանգնել։
«Քրեական պատասխանատվություն է նախատեսված ընդհուպ որպես առանձնապես ծանր հանցագործություն մինչև 10-15 տարի ժամկետով»,- «Ազատության» հետ զրույցում հայտարարել է նա։
Ընդդիմադիր պատգամավորը պնդել է՝ վարչապետը չարաշահում է պաշտոնեական լիազորություններն ու խոչընդոտում կրոնական կազմակերպության օրինական գործունեությունը:
«Նիկոլ Փաշինյանի արածը ոչ միայն իր լիազորությունների անցում է նշանակում, այլև ունի կոնկրետ բովանդակություն Քրեական օրենսգրքում ամրագրված, ընդ որում՝ մի քանի հոդվածներով»,- նկատել է Մինասյանն ու մատնանշել օրենսգրքի 209-րդ և 441-րդ հոդվածները։
Քրեական օրենսգրքի 209-րդ հոդվածը պատիժ է սահմանում իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով անձի խղճի կամ դավանանքի ազատության իրավունքի իրականացումը, այդ թվում` կրոնական կազմակերպության օրինական գործունեությունը կամ կրոնական ծեսի կատարումը խոչընդոտելու համար։
Պատիժ կարող է սահմանվել ինչպես տուգանքի, հանրային աշխատանքների, որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկման, այնպես էլ ազատության սահմանափակման (առավելագույնը 2 տարի ժամկետով), կարճաժամկետ ազատազրկման (առավելագույնը 2 ամիս ժամկետով) կամ ազատազրկման (առավելագույնը 2 տարի ժամկետով) ձևով։
Օրենսգրքի 441-րդ հոդվածը պատիժ է սահմանում պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելու կամ լիազորություններն անցնելու համար, ինչի արդյունքում «էական վնաս» է պատճառվել անձի կամ կազմակերպության իրավունքներին, ազատություններին կամ օրինական շահերին կամ հասարակության կամ պետության օրինական շահերին։
Այս դեպքում ևս կարող է կիրառվել ազատության սահմանափակում (1-3 տարի ժամկետով), կարճաժամկետ ազատազրկում (1-2 ամիս ժամկետով), կամ ազատազրկում (1-4 տարի ժամկետով): Եթե արարքը կատարվել է մի խումբ պաշտոնատար անձանց կողմից նախնական համաձայնությամբ, օրենսգիրքը նախատեսում է 4-8 տարվա ազատազրկում։
Վարչապետ․ «Եթե քրեական պատասխանատվության ենթակա արարք լինի, դա արձագանք կստանա»
Լրագրողների հետ զրույցում Նիկոլ Փաշինյանն անդրադարձել է իրեն քրեական պատասխանատվության ենթարկելու մասին ընդդիմության հայտարարություններին։
«ՀՀ-ն ինստիտուցիոնալ պետություն է։ Համոզված եղեք, եթե իմ արարքներում կամ որևէ մեկի արարքներում լինեն քրեական պատասխանատվության կամ Քրեական օրենսգրքի արձագանքի ենթակա արարքներ, դրանք իրենց արձագանքն անպայման կստանան»,- վստահեցրել է վարչապետը։
Անդրադառնալով իր՝ եկեղեցու գործերին միջամտելու լիազորություն չունենալուն՝ նշել է․
«Վարչապետը երկրի հանրային նշանակություն ունեցող հարցերին պետք է անդրադառնա։ Ես կամրջում եմ վարչապետի ինստիտուտը քաղաքացու, եկեղեցու հետևորդի ինստիտուտների հետ, կամրջում եմ Նոր Կտակարանի, աղոթքի ինստիտուտի հետ»։
Ճեպազրույցին մասնակցող լրագրողները, մասնավորապես՝ հիշեցրել են, որ նախկինում Փաշինյանը հայտարարում էր, թե եկեղեցու նորոգման օրակարգն է առաջ տանում որպես այդ նույն եկեղեցու հետևորդ, սակայն բարենորոգման խորհրդի հայտարարությունը ստորագրել է որպես ՀՀ վարչապետ։
«Այդ փարիսեցիությունն ինչի՞ համար է։ Կարող էի գրել՝ Նիկոլ Փաշինյան, ՀՀ քաղաքացի։ Եվ դուք այսօր հարց կտայիք՝ քաղաքացի Նիկոլ Փաշինյան, ի՞նչ գործ ունեիք վարչապետի կեցավայրում, ինչո՞ւ չէիք գնացել Իջևանի ձեր տանը կազմակերպել այդ հավաքը։ Չեմ կարծում, թե այդտեղ որևէ խնդիր կա։ Այո, ես հանդես եմ գալիս որպես Հայաստանյայց Առաքելական սուրբ եկեղեցու հետևորդ, բայց նաև որպես ՀՀ վարչապետ»,— նշել է նա։
Իրեն սահմանադրական կարգի տապալման մեջ մեղադրողներին պատասխանել է սաղմոսից հատվածով․ «անօրինություն փնտրեցին, հոգնեցին փնտրելուց և քննելուց»։
«Թող շարունակեն փնտրել և քննել, նրանց հոգնությունից բացի այլ բան չի սպասվում»,- ասել է Փաշինյանը։
Կես տարուց ավելի է, ինչ Փաշինյանը կաթողիկոսին հեռացնելու թեման օրակարգում է պահում: Սկզբում վարչապետը նշում էր, որ Գարեգին Բ-ն պետք է հեռանա, քանի որ խախտել է կուսակրոնության ուխտը, դուստր ունի: Ավելի ուշ այդ մեղադրանքին միացավ մեկ ուրիշը, թե, իբր, կաթողիկոսն ամենօրյա ռեժիմով զեկուցում է օտարերկրյա հատուկ ծառայության լեյտենանտներին: Սա, ըստ էության, նշանակում է, որ երկրի ղեկավարը հոգևոր առաջնորդին մեղադրում է օտարերկրյա ազդեցության գործակալ լինելու մեջ:
Վարչապետ Փաշինյանը գործակալ լինելու մեջ է մեղադրել նաև կաթողիկոսի եղբորը՝ Ռուսաստանի և Նոր Նախիջևանի թեմի առաջնորդ Եզրաս արքեպիսկոպոս Ներսիսյանին։
Տարեվերջին՝ դեկտեմբերի 20-ին իշխանությունների հետ փոխկապակցված civic.am կայքը հրապարակել էր փաստաթղթի պատճեն, ըստ որի՝ Ներսիսյանը համագործակցել է ԽՍՀՄ Պետական անվտանգության կոմիտեի՝ ԿԳԲ-ի հետ, ունեցել է ծածկանուն՝ «Կարո»։ Չնայած այս հրապարակմանը՝ Ազգային անվտանգության ծառայությունը լրագրողներին տեղեկատվություն չի տրամադրել Գարեգին Բ-ի և Եզրաս արքեպիսկոպոսի՝ օտարերկրյա հատուկ ծառայությունների հետ ունեցած կապերի մասին: Գերատեսչությունից միայն նշել են, որ օպերատիվ հետախուզական գործունեության միջոցառումների իրականացմամբ ձեռքբերված տեղեկությունները դասվում են պետական գաղտնիքի շարքին:
Եկեղեցու բարենորոգման խորհրդի առաջին նիստը․ ի՞նչ է որոշվել
Նախօրեին վարչապետ Փաշինյանն իր ֆեյսբուքյան էջում հայտարարություն էր տարածել՝ տեղեկացնելով, որ կայացել է Հայ Առաքելական եկեղեցու բարենորոգման խորհրդի առաջին նիստը։ Այս խորհուրդը ձևավորվել է մի քանի օր առաջ՝ հունվարի 4-ին վարչապետի և 10 եպիսկոպոսների կողմից։ Դրան միանալու ցանկություն է հայտնել նաև Շվեյցարիայի Հայոց թեմի առաջնորդական տեղապահ Գուսան ծայրագույն վարդապետ Ալճանյանը։
Հաղորդվում է, որ առաջին նիստի ընթացքում քննարկվել են՝
- բարենորոգման գործընթացի հիմնական ուղղությունները, կազմակերպչական քայլերը և առաջիկա աշխատանքների շրջանակը,
- ճանապարհային քարտեզի անցնցում իրականացմանն ուղղված գործողությունները։
«Խորհուրդը կարևորել է գործընթացի իրականացումը ներառականության, հանրային վստահության, թափանցիկության և պատասխանատվության սկզբունքներով՝ ընդգծելով հոգևորականների և աշխարհականների համախմբմանն ուղղված քայլերի անհրաժեշտությունը»,- ասված է հաղորդագրությունում։
Հետևեք մեզ — Facebook | Youtube
Փաշինյանը կաթողիկոսին համեմատել է Սերժ Սարգսյանի հետ
