«Նախկիններն ուզում են ցույց տալ, թե մենք էլ ենք իրենց պես թալանչի»․ Փաշինյան
Փաշինյանը՝ Մարսելում առանձնատուն գնելու մասին
Հայաստանի վարչապետ Նիկոլ Փաշինյանն անդրադարձել է իր՝ Ֆրանսիայի Մարսել քաղաքում շքեղ առանձնատուն գնելու մասին լուրերին, որոնք օրերս հերքել էր հայկական «Փաստերի ստուգման հարթակը»։
«Վարչապետը Ֆրանսիայում 3 մլն եվրոյով տուն է գնել․․․ Մի երկու հատ դաշնակ կա Ֆրանսիայում, տանում են, երեք եվրոյով կայք են բացում, մեջը ինչ զառանցանք ասես դնում։ Դե արի, ապացուցի, որ․․․»,- նկատել է Նիկոլ Փաշինյանը։
Նրա գնահատմամբ՝ նախկին «քոչարյանա-սերժական զանգվածը» խնդիր է դրել ոչ թե պաշտպանվել, փորձել ապացուցել, որ «թալանչի, սրիկա, ստահակ, կաշառակեր չեն», այլ տպավորություն ստեղծել, թե գործող վարչակազմն էլ է իրենց նման։ Սա, ըստ վարչապետի, պայմանավորված է այն հանգամանքով, որ ապօրինի գույքի բռնագանձման գործընթացին մեծ թափ է հաղորդվել։
Գործադիրի այսօրվա նիստում քննարկվել է համայնքային շահերի պաշտպանության շրջանակում վերադարձված գույքերի հարցը։ Վարչապետ Փաշինյանը մատնանշել է, որ դրանցից մեկը պատկանելիս է եղել նախկին արտգործնախարար Վարդան Օսկանյանի կնոջը, ինչից հետո թեժ քննարկում է ծավալվել «թալանածը հետ բերելու» թեմայի շուրջ։
- Կոմպրոմատային շանտա՞ժ, թե՞ ուղերձ կաթողիկոսին. Փաշինյանի գրառումների հետքերով
- Փաշինյանի վարկանիշն անկում է ապրել. CRRC-ի կողմից հարցվածների 15%-ն է վստահում նրան
- «Ոտքի տակ կտամ ձեզ, ոչ թե կբանավիճեմ»․ Փաշինյանի ելույթն ու ընդդիմության արձագանքը
Ի՞նչ առանձնատան մասին է խոսքը
Վերջին օրերին որոշ հայաստանյան լրատվամիջոցներում ու սոցցանցերում տարածվում էր տեղեկություն, թե, իբր, վարչապետ Նիկոլ Փաշինյանը Մարսելում «շքեղ առանձնատուն» է գնել 3.1 մլն եվրոյով։ Ֆրանսալեզու հոդվածը հրապարակվել էր infofrancaisedujour.fr կայքում։ Նշվում էր, որ հնարավոր է՝ Փաշինյանի անձնական օգտագործմանն են ուղղվել «Ֆրանսիական զարգացման գործակալության (AFD) և Ֆրանսիայի հայկական կազմակերպությունների համակարգող խորհրդի (CCAF) միջոցները»։ Բացի այդ, հոդվածի համաձայն՝ տուն գնելուն «հնարավոր է՝ նպաստել էր» Մարսելի քաղաքապետ Բենուա Պայանը։
«Փաստերի ստուգման հարթակը» ստուգել է նյութի բովանդակությունն ու պարզել՝ այն փաստահեն չէ, հիմնված է ենթադրությունների վրա, հետևաբար, կեղծ է։
Տարածող կայքը, ըստ հարթակի, անհայտ ծագում ունի․ ֆրանսիական դոմեյնով ու ֆրանսերենով կայքի փրովայդերը գտնվում է ԱՄՆ-ում։
«Ավելին, կայքը ստեղծվել է ժամանակավոր, կայքի փրովայդերը մի ինտերնետ մատակարար է, որի հեղինակությունը մասնագիտական հարթակների կողմից գնահատվում է կասկածելի»,- ասված է ուսումնասիրության մեջ։
«Ոչ մի ձուկ, ոչ մի մուկ չի պլստալու»
Փաշինյանը վստահեցրել է՝ շարունակելու են «հատիկ-հատիկ» վերադարձնել թալանվածը, ոչ ոքի չի հաջողվելու դրանից խուսափել․
«Չեն փախչի։ Ոնց ասել եմ՝ ոչ մի ձուկ, ոչ մի մուկ չի պլստալու, արդեն չեն պլստում ու դրանից անկանոն շարժումներով ու գոռգոռոցներով լցրել են Հայաստանը»։
Վարչապետը պնդում է, որ նախկին պաշտոնյաների նկատմամբ «կոռեկտություն պահելով սխալվել են»։
«Օրինակ՝ մենք պաշտոնապես չենք արձանագրել, որ Ռոբերտ Քոչարյանը կաշառակեր է։ Դա արձանագրված է դատարանի որոշմամբ․ մարդը գնացել, իր դեմ կաշառքի գործով ասել է՝ վաղեմության ժամկետ կիրառեք»,- պարզաբանել է վարչապետը։
Ասել է նաև, որ այսուհետ իր ելույթներում օգտագործելու է «կաշառակեր Ռոբերտ Քոչարյանը» ձևակերպումը, քանի որ ՀՀ դատական համակարգն արձանագրել է՝ երկրորդ նախագահի պաշտոնը զբաղեցրած անձը կաշառակեր է։
«Իրերը կոչելու ենք իրենց անուններով»
Կառավարության այսօրվա նիստում զեկուցվել է համայնքային շահերի պաշտպանության շրջանակում Արագածոտնի մարզի Օրգով համայնքին հողամաս վերադարձնելու մասին հարց։ Որպես հավելում ՀՀ Գլխավոր դատախազը թվարկել է, որ ընթացիկ տարում համայնքներին են վերադարձվել նաև Մարտունու մարզադաշտի, Իջևանի և Դիլիջանի մանկապարտեզների տարածքները։
Վարչապետ Նիկոլ Փաշինյանը նկատել է՝ Դիլիջանի մանկապարտեզի մասին անձամբ է առիթ ունեցել խոսելու, սակայն մտածել է՝ կարիք չկա կոնկրետ ասել, թե որ նախկին պաշտոնյայի ընտանիքի հետ է կապված գործը։ Այս անգամ, սակայն, հայտարարել է՝ խոսքը Հայաստանի նախկին արտգործնախարար Վարդան Օսկանյանի կնոջը պատկանող տարածքի մասին է։
Արձանագրել է՝ կոռեկտության փորձը այլ կերպ է օգտագործվում ու մեկնաբանվում։ Ուստի այսուհետ ինքն ամեն անգամ շեշտելու է՝ ում հետ է կապված ապօրինի գույքի բռնագանձման տվյալ գործը։
«Ոչ միայն իրերն ենք կոչելու իրենց անուններով, այլև իրերի հետ կապված մարդկանց, որպեսզի որևէ տարընթերցում չմնա»,- նշել է Փաշինյանը։
Նախկին ԱԳ նախարարի կինը համայնքին է վերադարձրել 85 մլն դրամը գերազանցող անշարժ գույք
ՀՀ Գլխավոր դատախազ Աննա Վարդապետյանի փոխանցմամբ՝ Դիլիջանի Շահումյան, 34 հասցեում գտնվող մանկապարտեզի մասնաշենքը պատկանել է «Առաջինը երեխաներին» բարեգործական հիմնադրամին, որը, իր հերթին, պատկանել է Նանե Օսկանյանին։
Տեղեկացրել է՝ տարածքի մակերեսը 891, 1 քառակուսի մետր է, շուկայականին մոտարկված կադաստրային արժեքը՝ 85 մլն 935 հազար դրամ։ Անշարժ գույքը Դիլիջան համայնքին է վերադարձվել քրեական վարույթի շրջանակներում՝ հաշտության կնքման արդյունքում․
«Մանկապարտեզը 19 տարի շարունակ չի բարեկարգվել։ Ներառված է սուբվենցիոն ծրագրում, առաջիկայում կհիմնանորոգվի»։
Վարդապետյանի խոսքով՝ մասնաշենքի չշահագործման արդյունքում նախադպրոցական կրթությունից տարեկան մոտ 120 երեխա է դուրս մնացել:
Հետևեք մեզ — Facebook | Youtube | Telegram
Փաշինյանը՝ Մարսելում առանձնատուն գնելու մասին
