«Մոտ 2 մլն զբոսաշրջիկ Հայաստանում»․ որքանո՞վ է իրատեսական
Տուրիզմը Հայաստանում 2023
«Եթե Հայաստանում որևէ արհավիրք չլինի, և տուրիզմի ոլորտը շարունակի զարգանալ, այս տարի հնարավոր կլինի գերազանցել 2019 թվականի ցուցանիշը և ունենալ մոտ 2 միլիոն զբոսաշրջիկ»,- հայտարարել է Հայաստանի զբոսաշրջության ֆեդերացիայի նախագահ Մեխակ Ապրեսյանը։
Տուրիզմի փորձագետ Տաթևիկ Հարությունյանի դիտարկմամբ՝ նման ցուցանիշի հասնելն իրատեսական է, բայց առավել կարևոր են որակական փոփոխությունները, մասնավորապես՝ ոլորտային ռազմավարության մշակումն ու շուկայի դիվերսիֆիկացիան։
Վիճակագրական տվյալներ, կանխատեսումներ, որքանո՞վ են դրանք իրատեսական
290 հազարից ավելի զբոսաշրջիկ՝ ընդամենը երկու ամսում
2023 թ․-ի հունվար-փետրվար ամիսների տվյալներն է ամփոփել Հայաստանի զբոսաշրջության կոմիտեն, միայն փետրվարին Հայաստան եկած զբոսաշրջիկների թիվը կազմել է 130․588:
«Սա լավագույն ցուցանիշն է նախորդ տարիների նույն ժամանակահատվածի համեմատ»,- շեշտում է կառույցը։
2019 թ․-ի փետրվարին Հայաստան է այցելել շուրջ 96 հազար, 2020 թ․-ի փետրվարին՝շուրջ 107 հազար, 2022 թ.-ի փետրվարին` շուրջ 72 հազար զբոսաշրջիկ:
Այս տարվա առաջին երկու ամիսներին դեպի Հայաստան զբոսաշրջային այցելությունների աճ է գրանցել հինգ երկրից։ Առաջատարը Ռուսաստանն է (52%), այնուհետև՝ Վրաստանը (12%), Իրանը (5%), ԱՄՆ-ն (1%) և Գերմանիան (1%):
«Կարելի է հանգիստ հասնել այդ ցուցանիշին»
Հայաստանի զբոսաշրջության ֆեդերացիայի նախագահ Մեխակ Ապրեսյանի գնահատմամբ՝ մինչև 2026 թվականը 2,5 մլն զբոսաշրջիկ ապահովելը մեծ ջանքեր չի պահանջում․
«Առաջիկա 2-3 տարիների ընթացքում կարելի է հանգիստ հասնել այդ ցուցանիշին։ Այլ բան է, որ մենք պետք է մտածենք, թե որքան զբոսաշրջիկներ են մեզ անհրաժեշտ կայուն զբոսաշրջություն ապահովելու համար»։
Ապրեսյանի խոսքով՝ զբոսաշրջիկների «ողջամիտ թվին» հասնելու համար պետք է մշակել հստակ քաղաքականություն:
Դեպի Հայաստան տուրիստական փաթեթները կարող են թանկանալ
Զբոսաշրջային ոլորտի մասնագետներն են ահազանգում։ Կանխատեսումների համաձայն՝ փաթեթների գները կթանկանան մինչև 50 տոկոս, ինչն իր հետ կբերի լրացուցիչ դժվարություններ։
Նախորդ տարի երկրում գործող տուրիստական ընկերությունները զբոսաշրջիկների են ընդունել՝ կրելով նաև վնասներ։ Պատճառն, ըստ նրանց, ամիսներ առաջ վաճառված փաթեթների գինն էր, որին հետևեց դրամի արժևորումը։
Փորձագիտական կարծիք
Տուրիզմի փորձագետ Տաթևիկ Հարությունյանն այս տարի 2 մլն զբոսաշրջիկ ունենալն իրատեսական է համարում, բայց ասում է՝ կարևորը ոչ թե քանակական, այլ որակական ցուցանիշներն են։ Ըստ նրա՝ պատկան մարմինները պետք է կարողանան վիճակագրությունը վերլուծել և ռազմավարություն մշակել։
«Մեր շուկան դիվերսիֆիկացված չէ, առյուծի բաժինն ընկնում է ՌԴ-ին։ Դինամիկան ցույց է տալիս, որ մարդիկ գալիս են նաև այլընտրանքի բացակայությամբ պայմանավորված»,- JAMnews-ի հետ զրույցում ասել է Հարությունյանը։
Փորձագետի գնահատմամբ՝ 30 տարվա մեջ ոչ մի քայլ չի արվել շուկայի դիվերսիֆիկացիայի համար։
Նկատում է՝ ոլորտում բացերը շատ են, դրանք լրացնել է պետք։ Տաթևիկ Հարությունյանի խոսքով՝ պետք է բարձրացնել երկրի և մեր պրոդուկտների ճանաչելիությունը՝ լինի գովազդային հոլովակի, պաստառի, թե ցուցահանդեսի ձևով․
«Անընդհատ մարդու ականջին պետք է լինի Հայաստան, որ մտածի՝ մի հատ գնամ, տեսնեմ՝ ի՞նչ է էդ Հայաստանը»։
Ինչ վերաբերում է տուր փաթեթների թանկացմանը՝ նրա խոսքով՝ թանկացումներ են ամբողջ աշխարհում, բայց քանի որ մեր շուկան փոքր է, «տեսակարար կշռով մեր շուկայի վրա դա զգացվում է»։ Բացի այդ, հիշեցնում է՝ հայկական դրամն արժևորվել է 25-30 տոկոսով։
Կարծում է՝ ռուս զբոսաշրջիկների վրա այն մեծ ազդեցություն չի ունենա, բայց Հայաստանն «անմրցունակ» կդառնա եվրոպական շուկայի համար։
«Եթե նույն 100 եվրոյով պիտի գնա հանգստանալու Իսպանիա կամ Հայաստան, կգերադասի գնալ Իսպանիա, տոմսը, ուտելիքը էժան են, տարածությունը՝ մոտ, մեքենայով էլ կարող է գնալ»,- բացատրում է նա։
Հարությունյանը դժվարանում է ասել՝ կգրանցվի՞ կազմակերպված զբոսաշրջության աճ, թե՞ ոչ։ Ասում է՝ տենդենցները ցույց են տալիս, որ այսօր մարդիկ նախընտրում են ինքնուրույն ճամփորդել, այսինքն՝ տոմս գնել և հյուրանոց ամրագրել անձամբ, ոչ թե օգտվել տուր փաթեթներից։
«Երկու դեպքում էլ դա վիճակագրական ցուցանիշ է, բայց գոյություն ունեն որակական տարբերություններ։ Մի դեպքում ես որպես միջնորդ եմ հանդիսանում և տարբեր ծառայություններ եմ մատուցում, մյուս դեպքում՝ միջնորդ չեմ հանդիսանում»,- նշել է նա։
Հետևեք մեզ — Facebook | Youtube | Telegram
Տուրիզմը Հայաստանում 2023
