Վրացական ընդդիմության առաջնորդներից մեկը կալանքի տակ կմնա
Հինգ ժամ տևած նիստից հետո Թբիլիսիի քաղաքային դատարանը վճռել է կալանքի տակ թողնել վրացական ընդդիմության առաջնորդներից մեկին՝ «Միացյալ ազգային շարժում» կուսակցության ղեկավար Նիկա Մելիային։
Փաստաբանները պահանջել են Մելիային ազատ արձակել, նրանք կարծում են, որ նրա ձերբակալության համար օրինական հիմքեր չեն եղել և, հետևաբար, չեն կարող մտավախություններ լինել, որ նա կարող է թաքնվել։
Նիկա Մելիայի գործը
Նիկա Մելիան գլխավորում է նախկին իշխող «Միացյալ ազգային շարժում» կուսակցությունը, որը հիմնել է Վրաստանի նախկին նախագահ Միխեիլ Սաակաշվիլին։ Այժմ վերջինս երկրում չէ, նրա դեմ մի քանի քրեական գործ կա, և նա, ըստ ամենայնի, կկալանավորվի, եթե փորձի Վրաստան վերադառնալ։
Նիկա Մելիան մեղադրվում է 2019 թ․ հունիսի 20-ին խորհրդարանի շենքի մոտ մասշտաբային հանրահավաքի կազմակերպման համար, ռուսական Պետդումայի պատգամավոր Սերգեյ Գավրիլովի՝ Վրաստան կատարած այցի առթիվ։
2019 թ-ին դատարանը չկալանավորեց Մելիային։ Նա 30 հազար լարի [շուրջ $9 հազար] գրավով ազատ արձակվեց և պարտավորվեց էլեկտրոնային թևնոց կրել, որպեսզի նրա տեղաշարժին հնարավոր լինի հետևել։
2020 թ-ի նոյեմբերին խորհրդարանական ընտրությունների արդյունքների դեմ ընդդիմության հանրահավաքին Մելիան ցուցադրաբար հանեց թևնոցն ու նետեց դեպի ամբոխը՝ «անարդարության խորհրդանիշ» անվանելով։
Ի պատասխան՝ ընդդիմադիր գործչի գրավն ավելացավ ևս 40 հազար լարիով [մոտ $12 հազար], որը Մելիան հրաժարվեց վճարել։ Եվ սա նրան ձերբակալելու պաշտոնական վարկած դարձավ։ Ավելի վաղ խորհրդարանը նրան դուրս հանեց իր կազմից և զրկեց պատգամավորական անձեռնմխելիությունից։
Հասարակական կազմակերպությունները, ինչպես նաև Վրաստանի օմբուդսմենն ու միջազգային գործընկերներն անընդհատ ուշադրություն էին հրավիրում այս գործում առկա իրավական խնդիրների վրա՝ այն քաղաքական համարելով։ Մելիայի կալանքից մի քանի օր առաջ Լիտվայի խորհրդարանի արտաքին գործերի կոմիտեի նախագահ, Վրաստանի ընկեր և եվրատլանտյան ինտեգրման վճռական կողմնակից Ժիգիմանտաս Պավիլենիսը երկիր էր ժամանել՝ վրացական իշխանություններին համոզելու, որ Մելիայի կալանքը բացասական միջազգային հետևանքներ է ունենալու։
Նիկա Մելիայի կալանքից հետո Վրաստանում քաղաքական ճգնաժամը սրվեց։ Եվրամիության պաշտոնատար անձինք չկարողացան ելք գտնել քաղաքական փակուղուց։ Եվրախորհրդի նախագահ Շառլ Միշելը Վրաստան ժամանեց, իսկ վարչապետ Ղարիբաշվիլին Բրյուսել հրավիրվեց՝ իրավիճակի քննարկման համար։ Բոլոր հանդիպումներն ու այցերն ապարդյուն էին։
Այդ ժամանակ Վրաստան ժամանեց Եվրախորհրդի նախագահի հատուկ ներկայացուցիչ Քրիստիան Դանիելսոնը։ Սակայն նրա թե՛ առաջին հնգօրյա այցը, թե՛ երկրորդ երկօրյա այցերը նույնպես տապալվեցին․ կառավարությունն ու ընդդիմությունը չկարողացան համաձայնության գալ։
«Չմահաձայնել փոխզիջման»․ Մելիան դիմել է համախոհներին
Իշխանության և ընդդիմության միջև մարտի 18-ին տեղի ունեցած բանակցությունների վերջին փուլում Եվրախորհրդի նախագահի հատուկ ներկայացուցիչը համաձայնագրի իր տարբերակն էր առաջարկել, որը կարող էր, ըստ արևմտյան գործընկերների միահամուռ կարծիքի, հաշտեցնել կողմերին ու Վրաստանը դուրս բերել սուր քաղաքական ճգնաժամից։
Փաստաթուղթն ամբողջությամբ կարելի է կարդալ այստեղ։ Որպես փոխզիջում՝ առաջարկվել էր համաներում հայտարարել 2019 թ-ի հունիսի 20-21-ի ցույցերի գործով բոլոր մեղադրյալների նկատմամբ։ Համաներվածների թվում կլիներ նաև Նիկա Մելիան։
Սակայն և՛ Մելիան, և՛ ընդդիմության մեծամասնությունն այս կետն անընդունելի են համարում, քանի որ դա կնշանակեր նրա կալանքի արդարացիության ընդունում։
Ապրիլի 13-ի դատական նիստին Նիկա Մելիան ընդդիմությանն էր դիմել և պահանջել «ոչ մի դեպքում չհամաձայնել համաներմանը՝ հանուն իր դրության բարելավման»։
«Կտրականապես անընդունելի է պատմության վերաշարադրումը։ 10-15 տարի կանցնի, և ճշմարտությունն ակնհայտ կլինի, և անհնար կլինի հայրենասերներին հանցագործ ներկայացնել և ընդհակառակը», — հայտարարել է Մելիան։
Ընդդիմության առաջնորդներից մեկը՝ Գիգի Ուգուլավան, դատական նիստը դատավորի թիկնոցով ծածկված «աղետ և զազրելի երևույթ» էր անվանել։
«Ես 30 դատական գործով եմ անցել և անխղճության ու անազնվության նման մակարդակ չեմ տեսել․․․ Դատավորն ու դատարանը․․․ ստում են՝ ձեր աչքերին նայելով։ Նրանք նրան կալանքի տակ են պահում, որովհետև չեն ուզում, որ ընդդիմությունը [համաձայնի] խորհրդարան գնալ։ Առևտուրը շարունակվում է», — իրադարձություններն է մեկնաբանել Գիգի Ուգուլավան։
