Վրաստան․ առջևում բողոքի ցույցե՞ր են։ Ընդդիմությունը չի ճանաչել ընտրությունների արդյունքները

Ընդդիմությունը չի ճանաչում Վրաստանում տեղական ինքնակառավարման մարմինների ընտրությունների արդյունքները, նրա թեկնածուները պարտվել են բոլոր ընտրատարածքներում, ընդդիմությունը կոչ է անում իր կողմնակիցներին հավաքվել խորհրդարանի մոտ հոկտեմբերի 31-ին ժամը 19.00-ին։ Այնտեղ նա մտադիր է հայտարարել հետագա գործողությունների պլանը։

«Պայքարը նոր է սկսվում», — ճեպազրույցի ժամանակ հայտարարել է առաջատար ընդդիմադիր «Միասնական ազգային շարժում» կուսակցության առաջնորդ Նիկա Մելիան։

Տեղական ինքնակառավարման մարմինների ընտրությունների երկրորդ փուլն անցկացվել է հոկտեմբերի 30-ին հինգ քաղաքներում և 15 մունիցիպալիտետներում։ Նաև 24 մեծամասնական ընտրատարածքներից ընտրվել են տեղական խորհրդարանի՝ սակրեբուլոյի պատգամավորներ։

Իշխող «Վրացական երազանք» կուսակցության թեկնածուները հաղթել են բոլոր ընտրատարածքներում՝ բացառությամբ Սամեգրելոյի շրջանի Ցալենջիխա քաղաքի․ այնտեղ քաղաքապետ է ընտրվել «Ազգային շարժման» (կուսակցությունը ստեղծել է նախկին նախագահ Միխեիլ Սաակաշվիլին) ներկայացուցիչը։

Ընդ որում, առաջին փուլում, որը կայացել է 2021 թ-ի հոկտեմբերի 2-ին, իշխող «Վրացական երազանք» կուսակցությունը ստացել է 46,69 տոկոս ձայն, «Միասնական ազգային շարժումը»՝ 30,7 տոկոս։

Երկրորդ փուլում մունիցիպալիտետների մեծ մասում իշխող կուսակցությունը հաղթել է նվազագույն առավելությամբ՝ 1-2 տոկոս, որոշ վայրերում՝ անգամ պակաս, քան մեկ տոկոսը։

Ամենամեծ առավելությունն իշխանության թեկնածուն ստացել է Թբիլիսիում։ Գործող քաղաքապետ Կախա Քալաձեն շրջանցել է ընդդիմադիր թեկնածու Նիկա Մելիային ավելի քան տասը տոկոսով։

Քաղաքապետների ընտրությունների երկրորդ փուլի արդյունքները հինգ խոշոր քաղաքներում

Թբիլիսի

• Կախա Քալաձե («Վրացական երազանք»)՝ 55,60%,
• Նիկա Մելիա («Ազգային շարժում»)՝ 44,39%

Քութայիսի

• Իոսեբի Խախալեիշվիլի («Վրացական երազանք»)՝ 51,64% (34 925 ձայն)
• Խաթիա Դեկանոյիձե («Ազգային շարժում»)՝ 48,36% (32 703 ձայն)

Բաթում

• Արչիլ Չիկովանի («Վրացական երազանք»)՝ 51,01% (38 236 ձայն)
• Գիորգի Կիրտաձե («Ազգային շարժում»)՝ 48,98% (36 710 ձայն)

Ռուսթավի

• Նինո Լացաբիձե («Վրացական երազանք»)՝ 53,72% (27 301 ձայն);
• Դավիթ Կիրկիտաձե («Ազգային շարժում»)՝ 46,28% (23 523 ձայն);

Փոթի

• Բեքա Վաճարաձե («Վրացական երազանք»)՝ 57,35% (11 345 ձայն);
• Գիգի Ուգուլավա («Ազգային շարժում»)՝ 42,65% (8 437 ձայն)։

42 մեծամասնական ընտրատարածքներում, որտեղ ընտրությունների երկրորդ փուլ է անցկացվել, ընդդիմությունից միայն 14 պատգամավոր է ընտրվել։

«Ընտրությունները կեղծվել են»․ ընդդիմությունը պատրաստվում է ցույցերի

Ընդդիմությունն ընտրությունները կեղծված է անվանել, նրա պնդմամբ՝ իշխանությունը կաշառել է ընտրողներին, վախեցրել և կիրառել ճնշման այլ ձևեր։

Սա հաստատում են նաև դիտորդները։ Ինչպես ասում է «Միջազգային հանրությունը հանուն արդար ընտրությունների և ժողովրդավարության» ազդեցիկ հասարակական կազմակերպության գործադիր տնօրեն Նինո Դոլիձեն, ընտրությունների երկրորդ փուլում, ընթացակարգային խախտումներից զատ, արձանագրվել է նաև ընտրողների կամքի վերահսկողություն։

«Այս և այլ խախտումները կարող էին ազդել ընտրությունների արդյունքների վրա։ Ընտրությունների երկրորդ փուլը երկրի ժողովրդավարական զարգացման համար բաց թողնված հնարավորություն է», — ասել է Դոլիձեն ճեպազրույցի ժամանակ։

Ընդդիմությունը պայքարելու է ընտրությունների կեղծման դեմ, սակայն, թե ինչ է նշանակում այդ պայքարը, դեռ հայտնի չէ։

«Երեկ մրցամարտը չի ավարտվել, երեկ այն սկսվել է։ Սրանք ընտրություններ էին՝ համատարած բռնության ֆոնին։ Սակայն մեր պայքարը բողոքի խաղաղ ակցիաներով է լինելու», — հայտարարել է ընդդիմության առաջնորդ Նիկա Մելիան։

Հոկտեմբերի 31-ի հանրահավաքին իրենց մասնակցությունը հաստատել են կուսակցությունները, որոնք երկրորդ փուլից առաջ հայտարարել են «Միասնական ազգային շարժման» հետ կոալիցիայի ձևավորման մասին՝ «Ժամանակն է» և «Եվրոպական Վրաստան» կուսակցությունները։ Սակայն, արդյո՞ք ընդդիմությունը միասնական կմնա փողոցային ցույցերի անցկացման դեպքում, հայտնի չէ։