Վրաստանում ևս մեկ օմբուդսմեն է հայտնվել՝ խոսքի ազատությունը պաշտպանելու համար
Վրաստանի վարչապետ Գեորգի Կվիրիկաշվիլին խնդիրն այսպես է դրել. ապահովել բոլոր հաստատությունների աշխատանքի առավելագույն թափանցիկություն և հեռացնել բոլոր խոչընդոտները, որոնք կարող են խանգարել անկախ լրատվամիջոցների աշխատանքին: Նրա կարծիքով՝ այդ խնդիրը կօգնի լուծել երկրում նոր՝ մեդիաօմբուդսմենի ինստիտուտի ստեղծումը:
Վարչապետն այդ նախաձեռնության մասին հայտնել է այսօր՝ մարտի 6-ին, ոչ կառավարական կազմակերպությունների և մեդիափորձագետների հետ հանդիպմանը և համագործակցության առաջարկ է արել ինչպես նրանց, այնպես էլ միջազգային իրավապաշտպաններին և մեդիաոլորտի մասնագետներին:
«Առաջին հերթին, իշխանության շահերից է բխում մեր գլխավոր ձեռքբերումը պաշտպանելը՝ խոսքի, ինքնաարտահայտման ազատությունն ու մեդիաբազմակարծությունը: Այդ պատճառով էլ այս ոլորտում ոչ մի հարցական նշաններ չպետք է լինեն», — ասված է Վրաստանի կառավարության մամուլի ծառայության այսօր տարածած հաղորդագրության մեջ:
Գեորգի Կվիրիկաշվիլիի կարծիքով՝ մեդիաօմբուդսմենի ինստիտուտը պետք է մշտապես Վրաստանի մեդիատարածության մոնիթորինգ անի և օգնի հասկանալ ընթացիկ գործընթացներն, օրինակ, «Ռուսթավի-2»-ի և Հանրային հեռարձակողի շուրջ ստեղծված իրավիճակը:
Գեորգի Կվիրիկաշվիլին ասել է նաև, որ ողջունում է «Ռուսթավի-2» հեռուստաընկերության գործով Մարդու իրավունքների եվրոպական դատարանի որոշումը, հաղորդել է հանդիպմանը մասնակցած Տարածաշրջանային հեռարձակման ասոցիացիայի գործադիր տնօրեն Նաթիա Կուպրաշվիլին:
Մարդու իրավունքների եվրոպական դատարանը մինչև մարտի 8-ը կասեցրել է Վրաստանի Գերագույն դատարանի Մեծ պալատի մարտի 2-ի որոշման կատարումը, որի համաձայն՝ «Ռուսթավի-2» ընդդիմադիր հեռուստաընկերությունը պետք է վերադարձվի նախկին սեփականատեր Քիբար Խալվաշիին: Որոշումն ընդունվել է երկար դատերից հետո, և հեռուստաընկերության, Վրաստանի լրագրողների և ոչ կառավարական կազմակերպությունների մեծ մասի կողմից ընկալվել է որպես բացահայտ ոտնձգություն խոսքի ազատության հանդեպ և հանգեցրել է բողոքի ակցիաների, առցանց ստորագրահավաքի՝ ի պաշտպանություն «Ռուսթավի-2» հեռուստաընկերության:
