Վրաստանում նշում են օգոստոսյան պատերազմի մեկնարկի 12-ամյակը

Վրաստանը նշում է ռուս-վրացական պատերազմի 12-րդ տարելիցը. 2008թ. օգոստոսի 7-ին, Վրաստանի պաշտոնական վարկածով, սկսվեց ռուսական կանոնավոր զորքերի ներխուժումը երկիր, ինչին հաջորդեցին ռազմական գործողությունները:

2008-ի օգոստոսյան պատերազմում վրացական կողմից սպանվեց 412 զինծառայող և խաղաղ բնակիչ, օսական կողմից 365 զինվորական և քաղաքացիական անձ:

Ռուսական պաշտոնական տվյալների համաձայն՝ 67 ռուս զինծառայող նույնպես զոհվել է:

Հարավային Օսիայի տարածքում վրացական գյուղերի մոտ 20 հազար բնակիչներ դարձան հարկադիր տեղահանվածներ:

Վրաստանը կորցրեց վերահսկողությունը այն տարածքի վրա, որտեղ կար 125 գյուղ:

Հարավային Օսիան և Աբխազիան Ռուսաստանի կողմից ճանաչվեցին անկախ հանրապետություններ:

Օգոստոսի 7-ից պետական ​​դրոշները իջեցվեցին երկրի բոլոր պետական ​​հաստատություններում:

Վրացի և արտասահմանյան քաղաքական գործիչները և դիվանագետները կրկին բողոքում են ընդդեմ Ռուսաստանի ագրեսիայի և օկուպացիայի:

Վրաստանի վարչապետ. «Մենք երբեք չենք կրկնի անցյալի սխալները»

Վարչապետ Գիորգի Գախարիան հատուկ հայտարարություն է արել՝ կապված 2008 թվականի օգոստոսյան պատերազմի 12-ամյակի հետ:

Վարչապետը հայտարարել է, որ Վրաստանը պատրաստվում է լուծել օկուպացիայի խնդիրը խաղաղ ճանապարհով, միևնույն ժամանակ հիշեցնելով «անցյալի սխալները»:

Սակայն Գախարիան չի հստակեցնում, թե ինչ սխալների մասին է խոսքը:

 «Մենք երբեք չենք հանդուրժի օկուպացիան: Մենք այդ խնդրի լուծման խաղաղ ճանապարհին ենք, իսկ մեր միջազգային գործընկերները մեզ աջակցում են այդ գործընթացում:

Մենք երբեք չենք կրկնի անցյալի սխալները, որովհետև շատ լավ գիտենք, որ խաղաղությանը այլընտրանք չկա, և որ խաղաղությունը, համատեղ աշխատանքը և տնտեսական առաջընթացը մեր երկրի միավորման նախադրյալներ են», — գրել է Գախարիան:

Վրաստանում ԱՄՆ-ի դեսպանատուն. Ռուսաստանի կողմից ղեկավարվող ուժերը փորձում են մետր առ մետր ընդարձակել օկուպացված տարածքները

Վրաստանում ԱՄՆ-ի դեսպանատունը նույնպես հայտարարությամբ է հանդես եկել 2008 թվականի օգոստոսի պատերազմի 12-ամյակի կապակցությամբ․

 «Անցել է 12 տարի, ինչ Ռուսաստանը ներխուժեց Վրաստանի շրջաններ՝ Աբխազիա և Հարավային Օսիա։ Օգոստոսի 7-ը տխրությամբ հիշեցնում է մեզ հազարավոր մարդկանց մասին, ովքեր տուժեցին ռուսական օկուպացիայից, և նրանց մասին, ովքեր դեռ տառապում են:

Այսօր մենք հիշում ենք մարդկանց, որոնք ստիպված էին լքել իրենց տները և փախստական դառնալ:

Մենք հիշում ենք անմեղ խաղաղ քաղաքացիներին, որոնք մահացան այն պատճառով, որ դե ֆակտո կառավարությունը փակեց վարչական բաժանարար գիծը և թույլ չտվեց նրանց ստանալ շտապ բժշկական օգնություն:

Մենք հիշում ենք ընտանիքներին, որոնք բաժանված էին անօրինական «սահմանագծման» արդյունքում և կորցրել էին ապրուստի աղբյուրը»:

Հայտարարության մեջ ասվում է, որ Ռուսաստանը շարունակում է խախտել 2008-ի հրադադարի մասին համաձայնագիրը. ռուսական «սահմանապահները» ձերբակալում են խաղաղ բնակիչներին և բռնություններ են գործադրում վարչական բաժանարար գծի երկայնքով:

Միաժամանակ «Ռուսաստանի կողմից ղեկավարվող անվտանգության ուժերը շարունակում են աստիճանաբար գրավել Վրաստանի տարածքը և փորձում են մետր առ մետր ընդարձակել օկուպացված տարածքները»:

ԱՄՆ-ի դեսպանատունը կոչ է անում Ռուսաստանին հետ վերցնել Աբխազիայի և Հարավային Օսիայի անկախության ճանաչումը և կատարել 2008 թվականի հրադադարի մասին համաձայնագրի իր պարտականությունները:

 «Ակնհայտ է, որ Ռուսաստանը պետք է իր ուժերը բերի նախքան հակամարտությունը եղած դիրքերին և ապահովի մարդասիրական օգնության անխափան մուտքը:

Բացի դրանից, մենք կոչ ենք անում Ռուսաստանին հետ վերցնել Աբխազիայի և Հարավային Օսիայի անկախության, այսպես կոչված, ճանաչումը: Շատ կարևոր է, որպեսզի հազարավոր տեղահանված անձինք և փախստականներ կարողանան անվտանգ և արժանապատվորեն վերադառնալ տուն», — ասվում է հայտարարության մեջ:

ԵՄ. Ռուսաստանը նախկինի նման զորքեր է տեղակայում Աբխազիայում և Հարավային Օսիայում՝ միջազգային իրավունքի խախտմամբ

Ռուս-վրացական պատերազմի 12-ամյակի կապակցությամբ հայտարարություն է արել նաև Վրաստանում ԵՄ պատվիրակությունը.

«Վերջին ամիսներին լարվածությունը մնացել է բարձր, և Ռուսաստանը շարունակում է պահպանել ռազմական ուժերը Աբխազիայում և Հարավային Օսիայում՝ խախտելով միջազգային իրավունքը և 2008-ի օգոստոսի 12-ի պայմանագրով նախատեսված Ռուսաստանի պարտավորությունները»:

ԵՄ պատվիրակությունը նշում է, որ հակամարտությունից տուժած բնակչության հիմնական իրավունքները շարունակում են ոտնահարվել, ներառյալ տեղաշարժի ազատության սահմանափակումների միջոցով՝ այսպես կոչված «սահմանագծման», անցակետերի ժամանակավոր արգելափակումով կամ ապօրինի ձերբակալությունների միջոցով:

Հայտարարության մեջ ասվում է, որ Եվրոպական Միությունը կրկին հայտարարում է Վրաստանի անկախությանը, ինքնիշխանությանը և տարածքային ամբողջականությանը իր վճռական աջակցության մասին՝ միջազգայնորեն ճանաչված սահմանների շրջանակներում:

Լիտվայի ԱԳՆ ղեկավար. «Վրաստանի տարածքի 20 տոկոսի օկուպացիան շարունակվում է»

«Անցել է 12 տարի Վրաստանի դեմ Ռուսաստանի դիտավորյալ ագրեսիայից: Ցավոք, դասեր չքաղվեցին, և դրան հաջորդեց Ուկրաինայի դեմ ագրեսիան: Շարունակվում է սողացող բռնակցումը և 20 տոկոս տարածքի օկուպացիան: Մենք վերահաստատում ենք մեր անփոփոխ աջակցությունը Վրաստանի ինքնիշխանությանը և տարածքային ամբողջականությանը», — գրել է Լիտվայի արտաքին գործերի նախարար Լինաս Լինկյավիչուսը: