Վրաստանում ամիսներ տևած ցույցերն անցյալո՞ւմ են։ Իշխող կուսակցությունն ու ընդդիմությունը պայմանավորվածության են եկել 2020 թ–ի ընտրությունների շուրջ

Ամիսներ տևած ցույցերից, ցրումից, վեճերից և խորհրդակցություններից հետո Վրաստանի իշխանությունն ու ընդդիմությունն, այնուամենայնիվ, կարողացել են համաձայնության գալ այն բանի շուրջ, թե ինչպես պետք է անցնեն 2020 թ–ի աշնանը կայանալիք խորհրդարանական ընտրությունները։

Համաձայնագիրը ստորագրվել է մարտի ութին Թբիլիսիում ԱՄՆ դեսպանատանը, որտեղ կայացել է բանակցությունների ավարտական փուլը։

•Որոշվել է, որ Վրաստանի 150-տեղանոց խորհրդարան կանցնի 120 պատգամավոր՝ համամասնական ընտրակարգով, 30–ը՝ մեծամասնականով։

•Սահմանվել է 1-տոկոսանոց ընտրական շեմ, իսկ խորհրդարանական մեծամասնություն, որը կունենա կառավարություն ձևավորելու իրավունք, հնարավոր կլինի կազմել պատգամավորական մանդատների 40 տոկոսով։

•Այն ամենն, ինչ պետք է իմանալ Թբիլիսիի ցույցերի մասին՝ երեք րոպեանոց տեսանյութում 

•Ամերիկացի կոնգրեսականները նամակ են գրել Վրաստանի վարչապետին․ Վրաստանի գլխավոր ութ խնդիրները 

Օրենսդրական համապատասխան փոփոխություններն առաջարկվում է դիտարկել խորհրդարանի մարտի 11–ին կայանալիք նիստին։ Երեք լսումներից հետո ընդունելու դեպքում փոփոխություններ կկատարվեն Սահմանադրությունում։

Ընտրական նոր համակարգի հաստատման համար անհրաժեշտ է 113 ձայն։

Քաղաքական ճգնաժամ՝ դատարկ տե՞ղը

Փոխզիջումային սխեման առավելագույնս մոտ է ընդդիմության պահանջներին, որն ամիսներ շարունակ բողոքի ակցիաներ էր կազմակերպում։

Ըստ փորձագետներից շատերի՝ Վրաստանում քաղաքական ճգնաժամը մեծ մասմաբ հենց իշխանություններն են սադրել։

Դեռևս 2016 թ–ին, փորձելով մարել բողոքի տրամադրությունները, «Վրացական երազանքի» առաջնորդ Բիձինա Իվանիշվիլին խոստացել էր անցում կատարել ընտրությունների բացառապես համամասնական համակարգի։ Սակայն խորհրդարանում 2019 թ–ի նոյեմբերի 14–ին համապատասխան փոփոխությունների ընդունումը ձախողվեց․ իշխող կուսակցության մի քանի պատգամավոր հրաժարվեց լուծարել մեծամասնական համակարգը։

Ներքաղաքական ճգնաժամի կարգավորմանը միջամտեց Վրաստանում հավատարմագրված դիվանագիտական կորպուսը։

Ամիսներ տևած բանակցությունների ընթացքում իշխանությունները մինչև վերջին պահը պնդում էին 110 (համամասնական համակարգով) և 40 (մեծամասնականով) սխեման։ Սակայն արդյունքում՝ ընդդիմությունը կարողացավ հասնել խորհրդարանում մեծամասնական պատգամավորների թվի կրճատման։

Ինչո՞ւ է ընդդիմությունը պահանջում հրաժարվել մեծամասնական համակարգից

Ըստ գործող օրենսդրության՝ 150 պատգամավորից 77–ն ընտրվում է համամասնական ընտրակարգով, իսկ 73–ը՝ մեծամասնականով։ Մեծամասնական պատգամավորների այդ թիվն իշխանությանն առավելություն էր տալիս․ որպես կանոն, միամանդատ ընտրատարածքներում հաղթում էին իշխանությունների դրածոները։

Իրերի նման դասավորությունը հանգեցրել էր նրան, որ, ըստ 2016 թ–ի խորհրդարանական ընտրությունների արդյունքների, իշխող «Վրացական երազանքը» հավաքել էր ընդամենը 48,6% ձայն, սակայն, շնորհիվ մեծամասնական պատգամավորների, խորհրդարանում ընդհանուր առմամբ 115 տեղ էր զբաղեցրել, ինչը թույլ էր տվել սահմանադրական մեծամասնություն ձևավորել։

Իշխանությունների և ընդդիմության համաձայնեցրած նոր սխեման իշխող կուսակցությանն այդպիսի գերառավելություն չի տալիս և ավելի մեծ հնարավորություններ է տալիս ընդդիմությանը։

Քաղբանտարկյալներ՝ կամ ազատ արձակում, կամ դատավճիռների մեղմում

ԱՄՆ դեսպանատանը, որի աշխատակիցներն առավելագույն ջանք են գործադրել, որպեսզի իշխանությունն ընդառաջ գնա ընդդիմությանը, բանակցությունների ավարտից հետո վերջինիս ներկայացուցիչները լրագրողներին հաղորդել էին, որ հընթացս հաջողվել է լուծել նաև քաղբանտարկյալների հարցը։

Թբիլիսիի նախկին քաղաքապետ Գիգի Ուգուլավային, հավանաբար նախագահը ներում կշնորհի։

•Վրաստանի իշխանությունը բռնաճնշումների ճամփա՞ն է բռնել։ Ի՞նչ է նշանակում ընդդիմադիր առաջնորդ Գիգի Ուգուլավայի կալանքը։ Վերլուծություն և գնահատականներ 

Պաշտպանության նախկին նախարար Իրակլի Օկրուաշվիլիի, «Գլխավոր» հեռուստաալիքի բաժնետեր Գիորգի Ռուրուայի և ակտիվիստ Բեսիկ Թամլիանիի խափանման միջոցը կփոխվի։