«Վրաստանն այն երկրների շարքում է, որոնք ՌԴ-ին օգնում են շրջանցել պատժամիջոցները»․ Politico

Ամերիկյան Politico պարբերականը գրում է, որ ԱՄՆ-ն հայտնաբերել է 5 երկիր, որոնք օգնում են Ռուսաստանին խուսափել պատժամիջոցներից, և այդ երկրներից մեկը Վրաստանն է։ Հրապարակման հիմքում ընկած է ԱՄՆ Պետդեպարտամենտի պատժամիջոցների գծով համակարգող Ջիմ Օ’Բրայենի ելույթը Արտաքին հարաբերությունների եվրոպական խորհրդի (ECFR) տարեկան հանդիպման ժամանակ:

«ԱՄՆ-ն առանձնացրել է [պատժամիջոցների] շրջանցման խնդիր առաջացնող հինգ երկիր՝ Թուրքիան, Ղազախստանը, Վրաստանը, Արաբական Միացյալ Էմիրություններն ու Հայաստանը»,— ասված է Politico-ի հոդվածում։

Ինչպես նշել է Օ’Բրայենը, ուկրաինական պատերազմի մեկնարկից հետո մեծ յոթնյակի երկրները դադարեցրել են սարքավորումների մատակարարումը Ռուսաստան, թեև արտահանումը այլ երկրներ, ինչպիսիք են Թուրքիա, Արաբական Միացյալ Էմիրություններ և Ղազախստան, աճել է։ Եվ, ըստ Օ’Բրայենի, այդ երկրները դարձել են արևմտյան արտադրանքի խոշոր մատակարարներ Ռուսաստանի համար, ԱՄՆ-ը բանակցություններ է վարում այդ երկրների հետ պատժամիջոցների շրջանցման կարևոր խնդիրը լուծելու համար։

Օ’Բրայենի խոսքով՝ դժբախտությունն այն է, որ եվրոպական ընկերությունները նյութեր են վաճառում այլ երկրներին, իսկ հետո այդ երկրները նշված նյութերը վաճառում են Ռուսաստանին:

«Հիմնական արտահանումը չիպերի և էլեկտրոնիկայի, որոնք անհրաժեշտ են Ռուսաստանին իր ռազմական մեքենայի համար, վերադարձել է նախապատերազմյան մակարդակին, քանի որ Ռուսաստանը սկսել է ավելի լավ խուսափել պատժամիջոցներից: Այս տարվա սկզբին Ռուսաստանը կարողացավ վերաներմուծել էլեկտրոնիկայի որոշ հիմնական կատեգորիաներ մոտավորապես նախապատերազմական մակարդակների հասնող չափերով, այսինքն՝ չիպեր, պրոցեսորներ և ինտեգրված սխեմաներ, որոնք անհրաժեշտ են ժամանակակից զենքեր արտադրելու համար:

Դուք գիտեք, թե ինչն է վտանգված: Ձեր տնտեսությունը վտանգի տակ է։ Դուք ստանում եք ձեր եկամտի մեծ մասը՝ հիմնվելով Եվրոպայի, ԱՄՆ-ի և Ճապոնիայի հետ հարաբերությունների վրա: Ինչո՞ւ վտանգի տակ դնել ամեն ինչ մի քանի գործարքի համար»,- ասել է Օ’Բրայենը։

• «Քաղաքական կամք չկա»։ Արդյո՞ք Վրաստանը միացել է Ռուսաստանի դեմ պատժամիջոցներին
• Georgian Airways-ը ռուսների համար Թբիլիսիից Եվրոպա տարանցիկ չվերթներ կիրականացնի
• Վրաստանի դատական ​​համակարգը՝ պատժամիջոցների տակ․ ի՞նչը կփրկի

Իշխող «Վրացական երազանք» կուսակցության պատգամավոր Ալուդա Գուդուշաուրին Ջեյմս Օ՛Բրայենի հայտարարությունը մեկնաբանել է այսպես.

«Այս ամբողջ ընթացքում՝ գրեթե մի քանի տարի շարունակ, շարունակվում է շրջանառվել սուտը, և, ցավոք, մենք լսում ենք իմիջին վնաս հասցնող հայտարարություններ։ Ինչպե՞ս կարող էր պատահել, որ երկու տարվա ընթացքում ոչ մի ապացույց չհաջողվեր բերել»։

2022 թվականի փետրվարի 24-ին Ուկրաինա Ռուսաստանի ներխուժումից հետո շատ երկրներ՝ ԱՄՆ-ը, ԵՄ երկրները, Մեծ Բրիտանիան, Ճապոնիան, Ավստրալիան և այլք, Ռուսաստանի դեմ պատժամիջոցների մի քանի փաթեթներ ընդունեցին՝ ինչպես կոլեկտիվ, այնպես էլ միակողմանի:

Այդ պատժամիջոցները վերաբերում են ֆինանսական, էներգետիկայի և տրանսպորտի ոլորտներին, արտահանմանը և ներմուծմանը, ինչպես նաև վիզային քաղաքականությանը։ Պատժամիջոցներ են կիրառվել նաև պաշտոնյաների, օլիգարխների, Պուտինի մերձավոր անձանց նկատմամբ։ Արևմտյան աշխարհը հույս ունի, որ Ռուսաստանի կառավարությունը չի դիմանա այս ճնշմանն ու կդադարեցնի Ուկրաինայի դեմ պատերազմը։

Վրաստանը սեփական պատժամիջոցներ չի կիրառել Ռուսաստանի նկատմամբ։ Ավելին, փետրվարի 24-ից մինչ օրս Վրաստանի կառավարության անդամները համառորեն կրկնում են, որ Վրաստանը չի միանում Արևմուտքի կողմից սահմանված պատժամիջոցներին։ Ուկրաինան դժգոհ է Վրաստանի այս դիրքորոշումից և բացահայտ արտահայտում է իր դժգոհությունը։

Միաժամանակ, Վրաստանի նախագահը և առանձին գերատեսչություններ բազմիցս նշել են, որ Վրաստանը հավատարիմ է Ռուսաստանի դեմ սահմանված պատժամիջոցներին և ոչ մեկին չի օգնի շրջանցել դրանք։