Վրաստանի կառավարությանը խնդրում են թույլատրել առցանց առևտուրը

Վրաստանի իշխանությունները, որոնք պանդեմիային դիմակայելու նպատակով մարտի 30–ից արտակարգ դրություն են հայտարարել, իսկ մարտի 31–ից պարետային ժամ և համընդհանուր կարանտին են մտցրել, այլ միջոցների թվում արգելել են նաև առցանց առևտուրը՝ բացառությամբ սննդամթերքի և պատրաստի ուտելիքի առաքման ծառայությունների։

Ստեղծված իրավիճակը բազում անհարմարություններ է առաջացրել սպառողների համար և հսկայական կորուստներ հասցրել նրանց, ովքեր մանրածախ ծառայություններ են մատուցում։ Վրաստանի բնակիչներից շատերն անցել են հեռավար աշխատանքի, որի պատճառով ոմանց անհրաժեշտ է տեխնիկան թարմացնել՝ սկսած սովորական ականջակալներից և տեսախցիկներից, ավարտած համակարգիչներով։ Դա գործնականում անհնար է։

Տարակուսում են նաև վաճառողները։ Այսպես, «Բեկո» ընկերության գլխավոր տնօրեն Մեհմեդ Մելեքը, որը մարտի 21–ին փակել է բոլոր խանութներն ու գրասենյակներն, ասում է, որ կառավարությունը գործատուներին խնդրում է պահպանել աշխատատեղերը։ Սակայն ինչպե՞ս դա աննել, եթե մարտի 30–ից արգելված է առցանց վաճառքը, որը կարող էր մասամբ թեթևացնել իրավիճակը։

Վրաստանում ապրիլի 2-ին ժամը 10։00-ի դրությամբ պաշտոնապես գրանցվել է կորոնավիրուսով վարակման 130 դեպք։ Կարանտինի մեջ է 5437 մարդ, ստացիոնար հսկման տակ՝ 260 մարդ, ապաքինվել է 23 մարդ։

Վրաստանի վարչապետ Գիորգի Գախարիան «Իմեդի» հեռուստաընկերությանը տված հարցազրույցում հայտարարել է, որ կառավորությունն իրոք խնդրանքներ է ստացել առցանց առևտուրը թույլատրելու վերաբերյալ, ընդ որում, լուրջ փաստարկներ են բերվել։

Սակայն վարչապետի հետագա խոսքից պարզ է դարձել, որ կան նաև թեթևամիտ փաստարկներ, որոնք ինքը պարզապես չի կարողանում ընկալել. «Մի՞թե հենց հիմա ինչ–որ մեկին մեծապես անհրաժեշտ է նոր փլեյեր կամ բջջային, մի՞թե չի կարելի մի երկու շաբաթ դիմանալ, մինչև չեղարկվեն խիստ միջոցները»։ 

Վարչապետը, հիշեցնելով կառավարության ձեռնարկած բոլոր միջոցներին հետևելու խիստ անհրաժեշտության մասին, խոստացել է, որ բոլոր ընկերությունները, որոք առավելագույնս դրանց հետևում են, առցանց առևտրի թույտվություն կստանան։

• Մառնեուլին՝ համաճարակային պայթյունի սպասելիս։ Ինչպե՞ս է ապրում փակ քաղաքը
• Վրաստանում համընդհանուր կարանտին է հայտարարվել 

Վրաստանում պանդեմիային դիմակայելու համար մարտի 21-ից արտակարգ դրություն է մտցվել։ Մարտի 23-ին ներքին համաճարակային բռնկման վտանգի պատճառով Քվեմո Քարթլիի շրջանում փակվել են Մառնեուլ և Բոլնիս քաղաքները։ Համաճարակի ընդլայնման բարձր ռիսկի պատճառով մարտի 31-ից Վրաստանի ողջ տարածքում պարետային ժամ է հայտարարվել ժամը 21։00-ից մինչև 6։00-ն։