Վրաստանը դատապարտում է Ռուսաստանի հարձակումն Ուկրաինայի վրա և նրա շրջանների անօրինական բռնակցումը, Ռուսաստանը պետք է ճանաչի Ուկրաինայի տարածքային ամբողջականությունը և դուրս բերի իր զորքերը օկուպացված տարածքներից։ Այս մասին հայտարարել է Վրաստանի խորհրդարանի խոսնակ Շալվա Պապուաշվիլին՝ ելույթ ունենալով Ղրիմի միջազգային պլատֆորմի առաջին խորհրդարանական գագաթնաժողովում։
«Փետրվարի 24-ին ուկրաինացի ժողովուրդն արթնացավ ռմբակոծության անձրևից։ Հնարավոր է՝ Արևմուտքում շատերի համար դա անակնկալ էր, բայց, ցավոք, մենք՝ վրացիներս, մոլդովացիներս և ուկրաինացիներս, դա արդեն մեկ անգամ չէ, որ զգացել ենք։ Վրաց ժողովուրդը նման հարձակումների զոհ դարձավ 2008 թվականին, ինչպես դուք լավ գիտեք, և 1990-ականների սկզբին Աբխազիայում և Ցխինվալիի շրջանում։
Մենք տեսել ենք, թե ինչպես են ռուսական տանկերը ոչնչացնում Վրաստանի գյուղերը, ինչպես են ռուսական ինքնաթիռները ռմբակոծում լավ ապագայի մեր հույսերը։ Մենք ականատես ենք եղել հարյուր հազարավոր մարդկանց վտարմանը իրենց նախնիների տներից, տեսել ենք, թե ինչպես են ջարդերից ու էթնիկ զտումներից փախածները ամիսներ ու տարիներ շարունակ թաքնվում սառը նկուղներում՝ իրենց երեխաների ու հարազատների հետ»։
Պապուաշվիլիի այս հայտարարությունն արվել է նրա՝ ԵԽԽՎ-ին դիմելուց անմիջապես հետո, ինչը Վրաստանում գնահատվեց որպես հակաարևմտյան ուղերձ։ Հոկտեմբերի 24-ին Վրաստանի խորհրդարանի խոսնակը նամակ էր հղել Եվրոպայի խորհրդի խորհրդարանական վեհաժողովի նախագահ Մարտինուս Թինի Քոքսին։
Նամակում Շալվա Պապուաշվիլին ընդգծում է, որ իշխող «Վրացական երազանք» կուսակցությունը չի կարողացել աջակցել Ռուսաստանը որպես ահաբեկչական ռեժիմ ճանաչող Եվրախորհրդի բանաձևին, քանի որ ԵԽԽՎ-ն այդ բանաձևում նախկին նախագահ Միխեիլ Սաակաշվիլիին քաղբանտարկյալ է անվանել։ Դա, ըստ Պապուաշվիլիի, չի համապատասխանում բանաձևի ոգուն և էությանը ու «խարխլում է Եվրոպայի խորհրդի խորհրդարանական վեհաժողովի արժեքները և կազմակերպության հեղինակությունը մարդու իրավունքների պաշտպանության գործում»։
Ինչպես նամակում պարզաբանում է Պապուաշվիլին, չնայած Վրաստանի լիակատար համերաշխությանը Ուկրաինայի հետ, վերոնշյալ փոփոխության հաստատումը անհնարին դարձրեց վրացական պատվիրակության անդամների աջակցությունը բանաձևին։
