Վլադիմիր Պուտինը սպառազինությունների նոր մրցավազք է հայտարարել, սակայն նրան չեն հավատում

Ռուսաստանի նախագահ Վլադիմիր Պուտինն ամենամյա ուղերձ է հղել Դաշնային ժողովին: Իր ելույթի գրեթե կեսը Պուտինը նվիրել է նոր ռուսական սպառազինությունների մասին պատմելուն: Համեմատության համար՝ տնտեսության և արդյունաբերության մասին ՌԴ նախագահը երեք անգամ պակաս է խոսել:

Պուտինը 43 րոպե խոսել է սպառանզինության նոր տեսակների մասին, որոնք այժմ Ռուսաստանն ունի: «Աշխարհում նման բան ոչ ոք դեռ չունի: Մի օր կհայտնվի, սակայն այդ ընթացքում մեր տղաները մի այլ բան կմտածեն», — հայտարարել է նա:

Ռուսաստանի նախագահն ու միաժամանակ նախագահի թեկնածուն պատմել է սպառազինության նոր 6 համակարգերի, այդ թվում՝ միջուկային համակարգերի մասին: Մասնավորապես, նա հայտնել է նոր բալիստիկ հրթիռի ստեղծման մասին:

Պուտինն իր ուղերձում պնդում էր, որ ռուսական սպառազինության այդպիսի մանրամասն շնորհանդեսը ոչ թե սպառնալիք է Արևմուտքին, այլ ընդհակառակը, բանակցություններ անելու կոչ. «Մեզ ոչ ոք չէր լսում: Մեզ հետ, ըստ էության, ոչ ոք չէր ուզում խոսել: Լսե՛ք մեզ»:

Այնուամենայնիվ, նրա խոսքերը այնքան էլ խաղաղասիրական հնչերանգ չունեին. «Ռուսաստանին զսպել չհաջողվեց»․ «Հուսով եմ, որ այն ամենն, ինչ այսօր ասվեց, կսթափեցնի ցանկացած պոտենցիալ ագրեսորի»:

Պուտինի ելույթին արձագանքել է ԱՄՆ պաշտպանության նախարարությունը: Դրա ներկայացուցիչ Դանա Ուայթը պատմել է լրագրողներին, որ գերատեսչությունում զարմացած չեն Պուտինի խոսքերով: «Ամերիկայի ժողովուրդը պետք է վստահ լինի. մենք ամբողջությամբ պատրաստված ենք», — ասել է նա:

Ամերիկյան թերթերը նույնպես մեկնաբանել են Ռուսաստանի նախագահի հայտարարությունները: The Washington Post-ը գրել էր, թե «Պուտինի ելույթը կարելի է դիտարկել որպես ուղերձ Վաշինգտոնին», իսկ The New York Times-ի լրագրողները կարծում են, որ Պուտինը խոսում էր «սառը պատերազմի ժամանակների տոնով»:

Ռուսական սոցիալական ցանցերի օգտատերերն արձագանքում էին շատ ավելի թերահավատորեն: Նախագահը դեռ չէր հասցրել ավարտել իր ելույթը, երբ նրանք ապացույցներ հրապարակեցին այն բանի, որ նրա ելույթն ուղեկցող ինֆոգրաֆիկան մի դեպքում պատրաստված էր 2011թ-ին, մյուս դեպքում՝ 80-ականների ԽՍՀՄ-ում:

Հեղինակավոր ռուս զինվորական փորձագետ Ալեքսանդր Գոլցը կարծում է, որ նոր սպառազինությունների մշակման մասին Ռուսաստանի նախագահի հայտարարությունը ստւգման կարիք ունի: Օրինակ, ըստ նրա, նոր բալիստիկ հրթիռը, որի մասին խոսել է Վլադիմիր Պուտինը, երկու անգամ փորձարկվել է Արկտիկայում: Երկու անգամ էլ փորձարկումները ձախողվել են: