Ընդդիմության վերջնագիրը Հայաստանի վարչապետին՝ հրաժարական տալ մինչև դեկտեմբերի 8-ի կեսօրը
Երևանում տեղի է ունեցել ընդդիմության բազմահազարանոց հանրահավաք վարչապետ Նիկոլ Փաշինյանի և ներկայիս կառավարության հրաժարականի պահանջով:
Ընդդիմությունը վերջնագիր է ներկայացրել. վարչապետ Նիկոլ Փաշինյանը պետք է հրաժարական ներկայացնի մինչև դեկտեմբերի 8-ի կեսօրը: Եթե պայմանը չկատարվի, ընդդիմությունը սպառնում է անհնազանդության ակցիաներ անցկացնել ամբողջ երկրում:
Հայաստանի վարչապետի՝ ընդդիմության թեկնածու Վազգեն Մանուկյանը ելույթ ունեցավ Ազատության հրապարակում բազմահազարանոց հանրահավաքի ժամանակ և հայտարարեց, թե ժամանակավոր կառավարությունն ինչ խնդիրներ է լուծելու: Նա հայտարարեց, որ եթե գործող վարչապետ Նիկոլ Փաշինյանը ինքնակամ չհեռանա, նրան կպարտադրեն դա անել:
Հանրահավաքից հետո մի քանի հազար ցուցարարներ երթով շարժվեցին դեպի Նիկոլ Փաշինյանի նստավայր՝ վանկարկելով «Հայաստանն առանց Նիկոլի» և «Նիկոլ՝ դավաճան»:
Ընդդիմության 17 կուսակցություններ սկսեցին բողոքի ցույցեր անցկացնել Հայաստանի վարչապետի կողմից Ղարաբաղում ռազմական գործողությունների դադարեցման մասին եռակողմ հայտարարության ստորագրումից անմիջապես հետո:
- Վարչապետի երկու թեկնածու՝ Հայաստանի ընդդիմությունից, թեև Փաշինյանը չի պատրաստվում հրաժարական տալ
- Հայաստանի վարչապետը և նախկին նախագահը մեկը մյուսին մեղադրում են «դիվանագիտական ֆիասկոյի մեջ»
Ընդդիմության վերջնագիրը
«Մենք մեկ պահանջ ունենք. Նիկոլը պետք է հեռանա: Մենք կարող ենք քննարկել երկու հարց. Նիկոլի հեռանալու ժամանակը և ժամը, և խոստանալ, որ ժողովուրդը իրեն թույլ չի տա ֆիզիկական բռնություն գործադրել նրա նկատմամբ», — ասել է ՀՅԴ Գերագույն մարմնի ներկայացուցիչ Իշխան Սաղաթելյանը:
Այս հայտարարությունն արվել է կառավարական առանձնատան դիմաց, որտեղ ապրում է Նիկոլ Փաշինյանը, «նրան ավելի մոտ լինելու համար, որպեսզի նա կարողանա լսել ժողովրդի ձայնը»: Սաղաթելյանի խոսքով՝ միգուցե այս կերպ Փաշինյանը հասկանա, որ իր հրաժարականը ժողովրդի պահանջն է.
«Եթե նա չհեռանա մինչև երեքշաբթի, մենք ինքներս կհեռացնենք նրան, և վերջ»:
Ի՞նչ է առաջարկում վարչապետի նոր թեկնածուն
«Փաշինյանը պետք է հասկանա, որ այս շարժումը քաղաքակիրթ ճանապարհով հեռանալու հնարավորություն է: Եթե շարժումը պարտվի, ժողովուրդը կտոր-կտոր կանի նրան: Նա ամեն դեպքում հեռանալու է», — իր ելույթի ժամանակ ասել է ժամանակավոր կառավարության ղեկավարի ընդդիմության թեկնածու Վազգեն Մանուկյանը:
Նրա խոսքով՝ Հայաստանի իշխանությունները պատերազմում երկիրը մատնեցին պարտության, տարածքային և մարդկային կորուստների: Հայաստանի գոյությունը, ըստ Մանուկյանի, սպառնալիքի տակ է, քանի որ այժմ ադրբեջանցիներն են որոշում, թե որտեղ գծեն սահմանը, և Հայաստանի իշխանություններից հակահարված չեն ստանում:
«Մենք երբեք չենք հաշտվի այդ փաստաթղթի հետ [խոսում է Ղարաբաղի վերաբերյալ եռակողմ հայտարարության մասին — JAMnews], բայց դա փաստացիորեն այժմ գործում է: Մենք չենք կարող հրաժարվել դրանից, քանի որ դա կնշանակի պատերազմի վերսկսում Թուրքիայի և Ադրբեջանի հետ, նաև կդիտարկվի որպես քայլ Ղարաբաղում տեղակայված ռուսական խաղաղապահ ուժերի դեմ:
Փաստաթուղթը կազմված է բավականին փնթի, բացթողումներով։ Նոր կառավարույթունը պետք է կարողանա բանակցությունների միջոցով անորոշությունները դարձնել ի օգուտ Հայաստանի»։
Վազգեն Մանուկյանը խոսեց այն խնդիրների մասին, որոնք պետք է լուծի ժամանակավոր կառավարությունը.
— վերականգնել ղարաբաղյան հակամարտության խաղաղ կարգավորման բանակցային գործընթացը,
— զբաղվել անհետ կորածների որոնմամբ,
— վիրավորների բուժմամբ,
— զոհված զինծառայողների և Լեռնային Ղարաբաղից տեղահանվածների ընտանիքներին սոցիալական երաշխիքներ տրամադրել:
Ամենակարևոր խնդիրներից մեկը, ըստ Մանուկյանի, բանակի մարտունակության վերականգնումն է:
Այս համատեքստում նա շեշտել է Ռուսաստանի հետ հարաբերությունների բարելավման կարևորությունը: Վարչապետի թեկնածու կարծիքով Հայաստանի և Ռուսաստանի շահերը տարածաշրջանում համընկնում են, ինչը չի կարելի ասել Ռուսաստանի և Թուրքիայի շահերի մասին.
«Աշխարհը չի ների Թուրքիային լկտիության համար, և եթե Թուրքիայի դեմ դաշինք կազմվի, մենք դրանում կլինենք»:
«Վարչապետի աթոռին նստած է քաղաքական դիակ»
Ազգային անվտանգության ծառայության նախկին ղեկավար, ընդդիմադիր «Հայրենիք» կուսակցության առաջնորդ Արթուր Վանեցյանը հանրահավաքի ժամանակ հայտարարել է.
«Այս պահին վարչապետի աթոռին նստած է քաղաքական դիակ, որն, ըստ էության, ֆեյք է»:
Փաշինյանի իշխանության յուրաքանչյուր օրը երկիրը զրկում է ներդրումներից, իսկ քաղաքացիներին՝ լավ կյանքի և անվտանգության հնարավորությունից, ասել է Վանեցյանը:
ԱԱԾ նախկին ղեկավարն անընդունելի է համարում Փաշինյանի այն հայտարարությունը, թե ինքը նոյեմբերի 9-ին ղարաբաղյան հակամարտության լուծման հարցում այլընտրանք չուներ.
«Մենք կստեղծենք կառավարություն, որը կկարողանա ապահովել ելքի այլընտրանքային ուղիներ, կբարձրացնի Հայաստանի վարկանիշն աշխարհում»:
Նոր կառավարությունը, ըստ Վանեցյանի, պատրաստվում է վերականգնել պետության ներքին դիմադրողականությունը: Նա և մյուս միավորված ընդդիմադիր կուսակցությունների ղեկավարները պարտության պատճառներից մեկը համարում են հայ-ռուսական հարաբերությունների «խայտառակ վիճակը»:
Էլ ո՞վ է պահանջում վարչապետի հրաժարականը
Հայաստանի նախագահ Արմեն Սարգսյանը արդեն ոչ մեկ անգամ խոսել է այն մասին, որ Նիկոլ Փաշինյանը պետք է հրաժարական տա: Այդպիսի հայտարարությամբ հանդես է եկել նաև Գիտությունների ազգային ակադեմիայի նախագահությունը:
Հանրահավաքից քիչ առաջ հաղորդագրություն տարածվեց, որ Հայաստանի Սյունիքի մարզի յոթ սահմանային համայնքների ղեկավարները նույնպես պահանջում են վարչապետ Նիկոլ Փաշինյանի և ներկայիս կառավարության հրաժարականը.
«Թշնամին հասել է Սյունիքի դարպասները։ Այս պահին մեր գերխնդիրը Սյունիքի պաշտպանությունն է, բնակչության անվտանգության ապահովումը։ Յուրաքանչյուր րոպեն թանկ է և կարող է անդառնալի հետևանքներ ունենալ»:
Հայտարարության մեջ նշվում է, որ Սյունիքի մարզի համար ճակատագրական օրերին կառավարության կողմից շատ հարցեր մնում են անպատասխան: Խոսքը, մասնավորապես, Ադրբեջանի հետ սահմանին վերաբերող վիճելի հարցերի մասին է: Դրանք չեն լուծվում իշխանությունների կողմից, ինչպես ասում են համայնքների ղեկավարները, և իրենք են այս պահին իրենց բնակավայրերի անվտանգության երաշխավորները:
Փաստաթղթի հեղինակները նշում են, որ ստեղծված իրավիճակում իրենք ավելի ու ավելի են համոզվում ներկայիս իշխանությունների օրոք սպասվող աղետը չեզոքացնելու անհնարինության մեջ և պահանջում են վարչապետ Նիկոլ Փաշինյանի և կառավարության հրաժարականը:
