Աբխազիայի ընդդիմությունը վերջնագիր է ներկայացրել նախագահ Ասլան Բժանիային՝ 10 օր ժամանակ տալով նրան, որպեսզի հրապարակային կերպով հրաժարվի նախաձեռնություններից և օրինագծերից, որոնք «վտանգ են ներկայացնում Աբխազիայի քաղաքացիների ազգային շահերի, սահմանադրական իրավունքների ու ազատությունների համար»:
Ցուցակը բավականին տպավորիչ է՝
բնակարանների մասին օրինագիծը, որը օտարերկրացիներին թույլ է տալիս անշարժ գույք ձեռք բերել Աբխազիայում,
էներգետիկ ոլորտի սեփականաշնորհումն ու ռուսական մասնավոր կապիտալի հասանելիությունը դրան,
«օտարերկրյա գործակալների մասին» օրինագիծը,
ինչպես նաև քաղաքացիների իրավունքներն ու ազատությունները սահմանափակող այլ օրինագծեր։
Վերջնագիրն ընդունվել է հանդիպման ընթացքում, որին հասարակական կազմակերպությունների և քաղաքական կուսակցությունների ներկայացուցիչներից բացի մասնակցել է նաև նախկին նախագահ Ռաուլ Խաջիմբան։
Հանդիպման մասնակիցները ազգային շահերին սպառնացող գլխավոր սպառնալիք են համարում հանրապետության ներկայիս ղեկավարությանը և հայտարարում են, որ իրենց պահանջների չիրականացման պարագայում կհայտարարեն համազգային ժողով:
«Պատմականորեն և ավանդաբար նմանատիպ իրավիճակներում ճակատագրական խնդիրների լուծումն ընկնում է ողջ ժողովրդի, բոլոր քաղաքացիների ուսերին, ովքեր խնամքով պաշտպանում են ազատությունը, անկախությունը և ազգային նվաճումները։
Կոչ ենք անում ողջ հասարակությանը, բոլոր հասարակական կազմակերպություններին, մտավորականներին, երիտասարդական համայնքներին հատուկ ուշադրություն դարձնել այս խնդիրներին՝ առաջարկելով փակուղային իրավիճակից դուրս գալու ուղիներ։
Թող հաղթի Աբխազիայի պետական և քաղաքական անկախության կուրսը»,— ասված է ուղերձում։
