Վերջին ակորդը ՀՀ-ում ընտրություններից առաջ․ նախկին նախագահ Ռոբերտ Քոչարյանի հանրահավաքը

Հայաստանում ավարտվել է նախընտրական արշավը․ հունիսի 20-ին երկրում արտահերթ խորհրդարանական ընտրություններ կանցկացվեն։ Նախընտրական արշավի ավարտական ակորդը «Հայաստան» ընդդիմադիր դաշինքի բազմահազարանոց հանրահավաքն էր, որի առաջնորդը Հայաստանի նախկին նախագահ Ռոբերտ Քոչարյանն է։

Դա դաշինքի ներկայացուցիչների և նրան սատարող ընտրողների վերջին հանդիպումն էր, հունիսի 19-ը «լռության օր» է։

Նախկին նախագահի ղեկավարած դաշինքի բազմահազարանոց հանրահավաքը կայացել է այս ընտրություններում նրա գլխավոր մրցակից՝ վարչապետի պաշտոնակատար Նիկոլ Փաշինյանի ղեկավարած «Քաղաքացիական պայմանագիր» կուսակցության բազմամարդ հանրահավաքի հաջորդ օրը։

• «Պողպատ»՝ «թավիշի» փոխարեն․ Հայաստանի վարչապետի պաշտոնակատարը հայտարարել է նոր հեղափոխության մասին
• Հայաստանի քաղաքական ուժերի մեդիառեսուրսները․ ով ում «բարեկամն» է

Հայաստանում արտահերթ խորհրդարանական ընտրություններն անցկացվում են ճգնաժամի հաղթահարման համար, որը երկրում առաջացել է Արցախյան երկրորդ պատերազմի ավարտից և դրանում հայկական կողմի պարտությունից հետո։ Ընտրություններին մասնակցում են մեծ քանակությամբ քաղաքական ուժեր՝ 21 կուսակցություն և չորս դաշինք։

Այս ընտրությունների բացառիկությունը նրանում է, որ մասնակցում են երկրի բոլոր նախկին նախագահներն ու վարչապետի ներկայիս պաշտոնակատարը։ Սակայն հիմնական պայքարն, ըստ հարցումների արդյունքների, ծավալվելու է նախկին նախագահ Ռոբերտ Քոչարյանի և 2018 թ-ի «թավշյա» հեղափոխությունից հետո իշխանության եկած Նիկոլ Փաշինյանի միջև։

Սոցիոլոգիական հետազոտությունների արդյունքների համաձայն, որոնք անցկացվել է նախընտրական արշավից առաջ, «հեղափոխական» վարչապետը մեծ առավելություն ուներ մյուս մասնակիցների նկատմամբ։ Սակայն կարճ ժամանակահատվածում նախկին նախագահը կարողացել է գրեթե հավասարեցնել իր դաշինքի վարկանիշը Փաշինյանի կուսակցության ցուցանիշներին։

Այժմ, ըստ փորձագետների, երկրում մի իրավիճակ է ստեղծվել, երբ հավակնոտ քաղաքական գործիչ Նիկոլ Փաշինյանն այլևս իրական առավելություն չունի։

Ի՞նչ է ասել Քոչարյանը

Ռոբերտ Քոչարյանը կարճ է խոսել և իր ելույթը սկսել է կատակից։ Նա հայտարարել է, որ հազիվ թե Հայաստանում և ողջ Հարավային Կովկասում բավականաչափ պիցա կա՝ Հանրապետության հրապարակում բոլոր հավաքվածներին հյուրասիրելու համար։

Այս կատակի «արմատները» գալիս են հետհեղափոխական ժամանակներից, երբ նախկին նախագահին քրեական պատասխանատվության ենթարկեցին, և նա ավելի քան մեկ տարի բանտում անցկացրեց։ Այն ժամանակ սոցցանցերում նրա կողմնակիցների մասին մեմ էր հայտնվել, որի մասին էլ հիշեցրեց Քոչարյանը․

«Երբ դատարանի շենքի մոտ հավաքվում էին իմ կողմնակիցները, ասում էին, թե նրանք եկել են պիցա ուտելու։ Չեմ կարծում, որ Հայաստանում կամ ողջ Հարավային Կովկասում այնքան պիցա լինի, որ [այստեղ հավաքված] բոլորին հերիքի»։

Այնուհետև Ռոբերտ Քոչարյանը չորս հիմնական խնդիր է նշել, որոնց կանգնել են Հայաստանի առաջ․

• Հայաստանի սահմանների պաշտպանություն և անվտանգություն,
• Արցախի ապագա,
• տնտեսական ճգնաժամ,
• ներքաղաքական լարվածություն։ 

Ըստ նախկին  նախագահի՝ «ներկայիս իշխանությունն» ի վիճակի չէ լուծելու այս խնդիրները, քանի որ ինքն է հենց ստեղծել դրանք»։

Տեսաուղերձ

Հանրահավաքից մի քանի ժամ առաջ Ռոբերտ Քոչարյանը ժողովրդին ուղղված տեսաուղերձով է հանդես եկել, որում խոսել է վերջին մեկ ամսում Հայաստանի շրջաններում ընտրողների հետ հանդիպումներից ստացած տպավորությունների մասին․

«Վաղուց՝ արդեն 13 տարի, ես ձեզ հյուր չէի եկել, շնորհակալություն հյուրընկալության և ջերմ ընդունելության համար։ Այս օրերին ես հազարավոր մարդկանց ձեռք եմ սեղմել, նայել նրանց աչքերին։ Չեմ թաքցնի, փորձել եմ հասկանալ՝ արդյոք մարդիկ փոխվե՞լ են այս տարիների ընթացքում։ Ուրախությամբ պետք է նշեմ, որ նրանք չեն փոխվել․ նույնքան աշխատասեր են, նույնքան լավ են տարբերում բարին ու չարը»։

Հունիսի 20-ին, ըստ նախկին նախագահի, ճակատագրական օր է, քանի որ Հայաստանի քաղաքացիները պետք է ընտրություն անեն «արժանապատիվ խաղաղության և նվաստացուցիչ խայտառակության» միջև։

«Կոչ եմ անում ձեզ, եկե՛ք կրկին բարեկարգենք մեր տունը, մեր Հայաստանը։ Երկարատև խաղաղություն հաստատենք, հավերժացնենք մեր հերոսների հիշատակն ու իմաստ հաղորդենք նրանց սխրանքին», – ասել է Քոչարյանը։

Ինչի՞ համար էին դատում Հայաստանի նախկին նախագահին

2018 թ-ի հուլիսին Ռոբերտ Քոչարյանին «Մարտի 1»-ի գործով սահմանադրական կարգի տապալման մեղադրանք էր առաջադրվել։ Խոսքը 2008 թ-ի մարտի 1-ի մասին է, երբ նախագահական ընտրությունների արդյունքները չընդունողների ցույցը ցրելիս 10 մարդ էր զոհվել։

Այդ ժամանակ գործող նախագահը դեռ Ռոբերտ Քոչարյանն էր, թեև Կենտրոնական ընտրական հանձնաժողովը քվեարկության արդյունքում արդեն հաղթող էր ճանաչել Սերժ Սարգսյանին։

2018 թ-ի գարնանը «թավշյա» հեղափոխությունից հետո Հայաստանի նոր կառավարությունը վերսկսեց այն իրադարձությունների հետաքննությունը, և առաջին մեղադրյալներից մեկը Քոչարյանն էր։

Այս ընթացքում դատարանը մի քանի անգամ նրան կալանավորելու և ազատ արձակելու մասին որոշում է ընդունել։ Հայաստանի Սահմանադրական դատարանը մարտի 26-ին մեղադրանքը հակասող ճանաչեց Սահմանադրության երկու հոդվածի և անվավեր ճանաչեց այն։ Արդյունքում՝ ապրիլի  6-ին Երևանի դատարանը կարճեց «սահմանադրական կարգի տապալման» հոդվածով Քոչարյանի դեմ քրեական հետապնդումը։

Նախկին նախագահն ու նրա փաստաբանները բազմիցս հայտարարել են, որ մեղադրանքը մտացածին է և քաղաքական շարժառիթ ունի։

Բանն այն է, որ 2008 թ-ի նախագահական ընտրություններին Նիկոլ Փաշինյանը ներկայացնում էր նախագահի թեկնածու Լևոն Տեր-Պետրոսյանի շահերը, որի կողմնակիցներն էին բողոքի զանգվածային ցույցեր անցկացնում։Եվ Փաշինյանը զանգվածային անկարգությունների կազմակերպման համար մեղադրանքների պատճառով մարտի 1-ի դեպքերից հետո մեկ տարի չորս ամսով ընդհատակ էր անցել։ Այնուհետև ինքնակամ ներկայացել էր դատախազություն, կալանավորվել և դատապարտվել 7 տարվա ազատազրկման։ Սակայն մեկ տարի և 11 ամիս անց համաներմամբ ազատ էր արձակվել։