Սոցիոլոգիական հետազոտություն․ Վրաստանի բնակիչների մեծ մասը համոզված է, որ իշխանությունը կոռումպացված է

«Բաց հասարակություն․ Վրաստան» հիմնադրամը հրապարակել է  պետական ինստիտուտների, ժողովրդավարության վիճակի, քաղաքական կուսակցությունների, կոռուպցիայի, կրոնի, կրթության ու աշխատանքի իրավունքի վերաբերյալ նոր սոցիոլոգիական հետազոտություն։

Ստացված տվյալների համաձայն՝ քաղաքացիների մեծ մասը կարծում է, որ իշխանությունները կոռումպացված են, չի վստահում ոչ մի քաղաքական կուսակցության և բոլորից շատ հարգում է պատրիարքին։

Հետազոտությունն անցկացվել է 2018թ-ի նոյեմբերի 16-27-ը Թբիլիսիում և շրջաններում, հարցվել է 1786 մարդ։

•Վրաստանում եկեղեցու հանդեպ վստահությունն ավելի բարձր է, քան խորհրդարանի, դատարանի և վարչապետի հանդեպ միասին

•Ինչպե՞ս չափել կոռուպցիան

Էլիտար կոռուպցիա

Վրաստանի բնակչության 68,8%-ը կարծում է, որ պաշտոնատար անձինք օգտագործում են իրենց լիազորություններն անձնական նպատակով։ 59%-ը կարծում է, որ պաշտոնյաները փողի դիմաց բիզնեսի համար «թիկունք» են լինում։

Հետազոտության համաձայն՝ հարցվածների 60%-ը համոզված է, որ ազդեցիկ պաշտոնյաներն իրենց լիազորություններն օգտագործում են  ապօրինի հարստացման համար։

Բնակչության 77%-ը կարծում է, որ բարձրաստիճան պետական ծառայողները հիմնական աշխատանքին զուգահեռ իրենց բիզնեսն ունեն։ Նրանց 41%-ը դա լուրջ խնդիր է համարում։

Հետազոտության տվյալների համաձայն՝ հարցվածների 62%-ը կարծում է, որ եթե մեծ կորպորացիան սկսի ֆինանսավորել ընդդիմությանը, իշխանությունը նրա համար լուրջ խնդիրներ կառաջացնի։

Կրթություն

Հարցվածների 80,1%-ը կարծում է, որ լավ կրթություն ստանալու համար լավ ֆինանսական դրություն է պետք ունենալ։ Գրեթե նույն թվով հարցվածներ համոզված են, որ առանց ընդունակությունների լավ կրթություն չես ստանա։

Վրաստանի բնակչության 31%-ը բարձրագույն կրթություն ունի, ամենամեծ ցուցանիշը՝ մարդկանց 37%-ը, սահմանափակվել է միջնակակարգ կրթությամբ։ Հարցման արդյունքները բացահայտել են կրոնական անիրավահավասարություն․ շրջանների միայն 24%-ը բարձրագույն կրթություն ունի այն դեպքում, երբ Թբիլիսիում այդ ցուցանիշը կազմել է 50,2%։

Այն հարցին, թե ո՞վ աշխատանք ստանալու ավելի մեծ հնարավորություններ ունի՝ հմուտ մարդը, թե՞ նախարարի պակաս ունակություններ ունեցող ազգականը, հարցվածների մոտ 69%-ը երկրորդ տարբերակն է ընտրել։

Առողջապահություն

Բնակչության միայն 9%-ն է «շատ գոհ» Վրաստանի առողջապահական համակարգից, 40,6%-ն ավելի շատ դժգոհ է, քան գոհ։ Հարցվածների 72%-ն օգտվում է ապահովագրական բժշկության ծառայություններից, 11%-ը՝ մասնավոր ապահովագրությունից։ Բնակչության մեծ մասը մոտ 50 լարի (25 դոլարից պակաս) է ծախսում դեղորայքի վրա։ Անհրաժեշտության դեպքում երկրի բնակիչներն առավել հաճախ դիմում են ընտանեկան բժիշկների խորհրդատվությանը։

Աշխատանք

Հարցման տվյալների համաձայն՝ աշխատանքի իրավունքի խախտման առավել հաճախ հանդիպող տեսակը ոչ բավարար վարձատրությունն է և անվտանգության պահանջների խախտումը։ Հարցվածների 17%-ը կարծում է, որ աշխատավայրում սեռական խտրականության փաստեր են լինում։ Գրեթե ոչ ոք չի հավատում, որ աշխատանքի իրավունքի խախտման դեպքում դատարան դիմելը կարող է արդյունավետ լինել։

Վերաբերմունքը քաղաքական կուսակցություններին

Հարցվածների 55,2%-ը կարծում է, որ Վրաստանում չկա քաղաքական կուսակցություն, որն ունակ է կարգավորելու իրենց խնդիրները։ Ընդ որում, 66%-ը խոստովանել է, որ երբեք չի կարդացել որևէ կուսակցության նախընտրական ծրագիր։ Բնակչության մեծ մասը խոստովանել է նաև, որ ընտրությունների ժամանակ քվեարկում է ոչ թե կուսակցության և դրա ծրագրի օգտին, այլ այս կամ այն առաջնորդի։

Հարցվածների 60,7%-ը կարծում է, որ տղամարդն ընտրություններին մասնակցելիս հաջողության հասնելու ավելի մեծ շանսեր ունի, քան կինը։ 52%-ը համոզված է, որ մարդիկ քաղաքականություն են մտնում բացառապես սեփական բարեկեցության նկատառումներով։

Վերաբերմունքը կրոնական կազմակերպություններին

Հարցվածների 82,5%-ն ուղղափառ քրիստոնյաներ են եղել։ 5,9%-ը՝ Հայ Առաքելական եկեղեցու հետնորդներ, 3,4%-ը սունի իսլամ է դավանում։

Իրենց կրոնականությունը հարցվածները բացատրում են հետևյալ արտահայտություններով․ «Եկեղեցին լսում է ինձ պես մարդկանց», «Եկեղեցում ինձ պես մարդկանց եմ հանդիպում», «Եկեղեցում ինձ պաշտպանված եմ զգում», «Եկեղեցին դժվար իրավիճակում սատարում է», «Անդադար փոխվող աշխարհում եկեղեցին շարունակում է կայուն և ամուր հիմք լինել»։

Բնակչության 66%-ն ամբողջությամբ վստահում է պատրիարքին։ Միաժամանակ պատրիարքարանի հանդեպ վստահության մակարդակը բարձր չէ։