Սոված մարդկանց ապօրինի գործողությունները
Բողոքի ակցիաներ
Հունվարի 12-13-ին Ադրբեջանի միանգամից մի քանի շրջաններում տարերային բողոքի ակցիաներ բռնկվեցին, որոնք շարունակվում են մինչ այսօր: Իշխանություններն անհապաղ դրանցում մեղադրեցին ընդդիմությանը, 50-ից ավել մարդ ձերբակալվեց: Ընդդիմությունն իր հերթին հերքում է բողոքի ակցիաներին իր մասնակցությունը և որպես դրանց պատճառ նշում շրջանների բնակիչների աղետալի վիճակը:
Բնականաբար, այդ իրադարձությունները մի շաբաթ է՝ երկրում քննարկման առարկա են «արժութային աղետի» հետ մեկտեղ: Իշխանամետ լրատվամիջոցներն ամեն կերպ ընդգծում էին, որ հանրահավաքներն ապօրինի են, քանի որ գործադիր իշխանության թույլտվությունը չկա: Ընդդիմադիր լրատվամիջոցները հրապարակեցին ակտիվիստների ու ոստիկանների բախումների տեսանյութը:
Լենքորանի բնակիչ
«Ես Լիմանին մոտ եմ ապրում, գիտեմ նրանց, ովքեր մասնակցում են հանրահավաքին, — պատմում է Լենքորանի բնակիչ, ուսուցիչ Սաբիրը: — Իրոք, իրավիճակը հիմա շատ բարդ է: Մեզնից շատերը Բաքու էին մեկնում սեզոնային աշխատանքի, ոմանք այստեղ աշխատանք ունեին: Սակայն այժմ ոչ Բաքվում, ոչ էլ այստեղ աշխատանք չկա: Ես ինքս 160 մանաթ (102 դոլար) աշխատավարձ եմ ստանում և տրանսպորտի գումարը խնայելու համար աշխատանքի ոտքով եմ գնում՝ 3 կմ, սակայն հազիվ եմ ծայրը ծայրին հասցնում: Եվ այսպես շատերն են ապրում, իսկ իրավիճակը գնալով ավելի է վատանում»:
Ներքին գործերի նախարարություն և գլխավոր դատախազություն
«Ապօրինի գործողությունները կազմակերպվել էին «Ադրբեջանի ժողովրդական ճակատ», «Մուսավաթ», ինչպես նաև որոշ ծայրահեղական ու կրոնական ուժերի կողմից», — ասվում է ներքին գործերի նախարարության ու գլխավոր դատախազության համատեղ հայտարարությունում:
Նրանց խոսքով, ակցիայի մասնակիցները չեն ենթարկվել իշխանությունների պահանջին, խախտել են հասարակական կարգը, երթևեկությունն ու կառույցների աշխատանքը:
Ընդդիմություն
«Պարզապես հակացուցված է ներքին զորքերն ուղղել խաղաղ բնակչության դեմ», — ասել է «Ադրբեջանի ժողովրդական ճակատ» կուսակցության ղեկավար Ալի Քերիմլին: Նրա խոսքով, հանրահավաքները երկրում տիրող կաշառակերության և իշխանությունների ոչ կոմպետենտության արդյունք են: «Մեր երկրում ահա այսպիսի «հեռատեսական» քաղաքականություն են վարում. երկու ամիս առաջ առանց պետական տուրքի մինչև 10000 մանաթի ապրանքի ներկրման մասին օրենք են ընդունում, հետո կասեցնում այն, ուժի մեջ է մտնում ալկոհոլը կանխիկով գնելու արգելքը, և 12 օր անց այն կասեցվում է», — ասում է քաղաքական գործիչը:
Տնտեսագետ
«Մենք տարիներով այս իշխանություններին խորհրդատվություն ենք մատուցել՝ հիմնվելով մակրոտնտեսական ցուցանիշների, գիտական մոտեցման, համաշխարհային թրենդերի վրա, իսկ իրադարձությունները ցույց տվեցին, որ նրանք նույնիսկ տարրական բաներ չգիտեն, — ասում է հայտնի տնտեսագետ Նաթիկ Ջաֆարլին: — Իշխանություններն իրենք են արժութային շուկայում իրարանցում առաջացրել, սկսել պայքարել չարաշահումներով զբաղվողների դեմ՝ խնդիրների իրական լուծում գտնելու փոխարեն: Եվ մենք այս օրերին ստացանք այն, ինչ ստացանք»:
Բլոգեր
«Ես անկեղծ մտածում եմ, որ տարածաչափությունն, օրգանական քիմիան և այլ հատուկ դպրոցական առարկաներն իրենց տեղը պետք է զիջեն երթևեկության կանոններին, տնտեսական գրագիտության հիմունքներին և առօրյա կյանքում ավելի շատ օգտագործվող բաներին, — գրում է բլոգեր Ռոման Օրկոդաշվիլին: — Ինչպե՞ս կարելի է բողոքի ակցիաներ անել «գների աճի դեմ»: Դա նույնն է, ինչ ցուրտ եղանակի կամ մայրցամաքների դրեյֆի դեմ բողոքելը: Այս ժողովրդական շարժման արդյունքը հօդս կցնդի դրա ուղերձի անիմաստ լինելու պատճառով»:
Բանկի աշխատակից
«Ես հասկանում եմ բողոքողներին ու նրանց խնդիրը, սակայն ես ինքս պատրաստ եմ փողոց դուրս գալ, եթե երեխայիս կերակրելու հնարավորություն չունենամ, իսկ դրան դեռ շատ կա», — ասում է բանկերից մեկի աշխատակից Ռուֆաթը:
Վաճառող
«Ոստիկանությունը փող է ուզում, հարկայինը փող է ուզում, բոլորն ինձնից ինչ-որ բան են ուզում, և այն, որ առևտուրը լավ չի, ոչ ոքի չի հետաքրքրում, — ասում է օգտագործած հեռախոսների խանութի սեփականատեր ու վաճառող Ռասիմը: — Բավական է շուրջդ նայես, որ համոզվես, որ բիզնեսը փակվում է, վաճառք չկա, մարդիկ աղքատանում են»:
‘Խանութը փակվում է: Ցանկացած ապրանք 20 մանաթ արժե’:
«Մեր խանութը փակում են, բիզնեսը սննկանում է, աշխատանք չկա ոչ մի տեղ, ես ինքս Ջաբրայիլից եմ, իսկ ի՞նչ անեմ հիմա: Վերադառնամ տուն ու հանրահավաքներին մասնակցե՞մ», — հարցնում է հարևան խանութի վաճառողը:
Ջաբրայիլի գործադիր իշխանության անմիջական ղեկավար
«Հիմար, շան որդի, ի՞նչ ես այստեղ փնտրում: Ռադդ քաշիր այստեղից», — խորհուրդ է տալիս Ջաբրայիլի շրջանի գործադիր իշխանության ղեկավար Մահմուդ Գուլիևը բողոքի ակցիային մասնակցող գործազուրկին, հետո ոստիկանություն է կանչում:
Շոու բիզնես
«Մենք հզոր նախագահ ունենք, արժեզրկումից չպետք է վախենանք: Կլինի արժեզրկում, թե ոչ, նախագահը, միևնույնն է, թույլ չի տա մեր ժողովրդին տանջվել, — ասում է հայտնի երգչուհի Իլհամա Գուլիևան: — Նա միշտ փրկել է ազգին դժվարություններից: Ազգիս արժեզրկումը թող չվախեցնի: Սա պարզապես աշխարհում հրահրված խաղ է: Մենք Ալիև Իլհամ Հեյդարօղլի աշխարհի ամենաազդեցիկ նապագահն ունենք: Նա թույլ չի տա, որ մենք աշխարհում հրահրվող խաղի զոհ դառնանք: Ոչ մի արժեզրկում էլ չկա, ամեն ինչ լավ է: Համարեք, որ այս ամենն ասում եմ ժողովրդի անունից: Իլհամ Ալիևը թույլ չի տա, որ մեր ազգը տառապի: Նախագահն անում է ամեն հնարավորը, որ ժողովուրդը հանգիստ լինի»:
- Աղջաբեդում հունվարի 12-ին բողոքի ակցիայի 3 մասնակիցներ բարձրացել էին բնակելի տան կտուրը՝ սպառնալով ինքնասպանություն գործել բանկային պարտքերի ու աշխատանքի բացակայության պատճառով:
- Ներքին գործերի նախարարության պնդմամբ Սիազանում հանրահավաքի մասնակիցները ոստիկանության ուղղությամբ քարեր են նետել:
- Ոստիկանությունհը ռետինե փամփուշտներ ու արցունքաբեր գազ է կիրառել, մի շարք շրջաններ ներքին զորքեր են մտցվել, կան փակ ճանապարհներ, որոնք տանում են դեպի կոնֆլինտի կենտրոններ:
- «Մուսավաթ» ընդդիմադիր կուսակցության նախագահ Արիֆ Գաջիլին կանչվել է Կազմակերպված հանցագործությունների դեմ պայքարի գլխավոր վարչություն, որտեղ նրան զգուշացում է արվել:
- Լենքորանի Լիման ավանում (որտեղ անցկացվում էր ակցիաներից մեկը) ձերբակալվել է «Մուսավաթ» կուսակցության ակտիվիստ Իման Ալիևը, նա դատապարտվել է 30 օրվա ազատազրկման ոստիկանությանը չենթարկվելու համար:
- Բաքվում 7 օրով ձերբակալվել է «Ժողովրդական ճակատ» կուսակցության ակտիվիստ Թուրան Իբրահիմը «ոստիկանությանը չենթարկվելու» մեղադրանքով: Նա կուսակցության նախագահի ավելի վաղ ձերբակալված խորհրդական Մամեդ Իբրահիմի որդին է:
- Նախագահի հանձնարարականով արդյունաբերության ու տնտեսության նախարարությունը հացի արտադրության բոլոր փուլերից հանել է ԱԱՀ-ն՝ նվազեցնելով դրա ինքնարժեքը:
