Սկսվում է Covid-19-ի դեմ պատվաստումը Հայաստանում, պատվաստանյութը բաշխվում է հիվանդանոցների միջև

Հայաստանում սկսվում է կորոնավիրուսի դեմ պատվաստումը։ Ապրիլի 13-ից պատվաստանյութը կարող են ստանալ Երևանի բնակիչները, իսկ 14-ից՝ մարզերի։ Այժմ երկրում պատվաստանյութը բաշխվում է հիվանդանոցների միջև։ Այս մասին հաղորդել է առողջապահության նախարար Անահիտ Ավանեսյանը։

Նրա խոսքով՝ բոլոր պատվաստվել ցանկացողներին լիարժեք տեղեկություններ կտրամադրվեն երկիր ներկրված «AstraZeneca» և «Սպուտնիկ V» պատվաստանյութերի մասին, սակայն նրանք չեն կարող ինքնուրույն ընտրել պատվաստանյութը։

Առողջապահության նախարարը նախազգուշացրել է նաև, որ ապրիլի 13-ին սկսվելու է «AstraZeneca»-ով պատվաստումը, քանի որ այն ստացվել էր ավելի վաղ, իսկ մի քանի օրից՝ ռուսական «Սպուտնիկ V»-ով։

Հայաստան է ներկրվել բրիտանաշվեդական «AstraZeneca» պատվաստանյութի 24 հազար դեղաչափ և ռուսական «Սպուտնիկ V»-ի 15 հազար դեղաչափ։

Նախկինում պատվաստվել են միայն բարձր ռիսկի խմբի բուժաշխատողները, որոնք աշխատում են կորոնավիրուսով վարակվածների հետ։ Դրա համար ռուսական կողմը Հայաստանին անվճար տրամադրել է «Սպուտնիկ V»-ի 2 000 դեղաչափ, որը հաշվարկված է 1 000 հոգու համար։

Հայաստանում Ռուսաստանի դեսպան Սերգեյ Կոպիրկինն ապրիլի 12-ին հայտարարել է, որ Հայաստանին ռուսական պատվաստանյութի տրամադրումը շարունակվելու է։

Հայաստանում կորոնավիրուսով վարակման առաջին դեպքը գրանցվել է 2020 թ․ մարտի 1-ին։ 2020 թ․ մարտի 16-ից մինչև սեպտեմբերի 11-ը գործում էր արտակարգ դրության ռեժիմ։ Այնուհետև երկրում կարանտին սահմանվեց, որը տևեց մինչև 2021 թ․ հուլիսի 11-ը։ Վերջին մեկ օրում գրանցվել է վարակման 510 նոր դեպք։ Ընդհանուր առմամբ, երկրում 203 327 վարակված կա, ապաքինվել է 182 836-ը, մահացել՝ 3 753-ը։

• «Սպուտնիկ V», թե՞ AstraZeneca։ Հայաստանը կորոնավիրուսի դեմ պատվաստանյութեր է ներկրում
• Կորոնավիրուս․ դրա մասին միֆերը համավարակից արագ են տարածվում

Տեղեկություններ պատվաստման մասին

Հայաստանի առողջապահության նախարարությունը պլանավորում է պատվաստել 700 հազար քաղաքացու։ Առաջնահերթ են նրանք, ովքեր ռիսկի խմբում են։ Սակայն Հայաստանում պատվաստումն ինքնակամ է, և դեռևս հերթագրվել է ընդամենը 600 մարդ։

Պատվաստման հարցն արդիական է, քանի որ, ըստ առողջապահության նախարարի, Հայաստանում կորոնավիրուսի հետ կապված իրավիճակը կայուն լարված է․

«Շատ հիվանդների մոտ ընթացքը ծանր է […]։ Պատվաստումն իրականացվելու է՝ ռիսկի խմբից դիմումների հիման վրա, պոլիկլինիկաների բժիշկները պետք է քաղաքացիներին իրազեկեն այս հնարավորության մասին։ Եթե գրանցված քաղաքացիների թիվը գերազանցի պատվաստանյութի քանակը, գրանցում կկատարվի, և նոր մատակարարումները ստանալու հետ գործընթացը կշարունակվի մեկ տարի»։

Նախարարությանը կից մասնագիտական խորհուրդն արդեն որոշել է, որ «AstraZeneca» պատվաստանյութով պատվաստվելու են 55 տարեկանից բարձր անձինք, իսկ «Սպուտնիկ V»-ով՝ մինչև 54 տարեկանները։

Պատվաստանյութերի մասին

Ապրիլի 8-ին Հայաստան է բերվել կորոնավիրուսի դեմ «Սպուտնիկ V» պատվաստանյութի առաջին խմբաքանակը։

Մինչ այդ, մարտի 28-ին Երևան է բերվել կորոնավիրուսի դեմ նաև բրիտանաշվեդական «AstraZeneca» պատվաստանյութի առաջին խմբաքանակը՝ 24 հազար դեղաչափ։ «AstraZeneca»-ն կորոնավիրուսի դեմ ամենապոպուլյար պատվաստանյութն է աշխարհում, այն թույլատրել են կիրառել 49 երկրների համապատասխան պետական մարմինները։ «Սպուտնիկ V»-ն պոպուլյարությամբ երկրորդն է, այն հաստատվել է 45 երկրներում։

Հայաստանը շարունակում է բանակցությունները COVAX FACILITY հարթակից պատվաստանյութ ստանալու ուղղությամբ։ Դա միջազգային հարթակ է, որի նպատակը պատվաստանյութերի հասանելիության ապահովումն է ցածր և միջին եկամուտ ունեցող երկրների համար։ «AstraZeneca»-ն նույնպես այդ ծրագրով է ստացվել։ Այժմ խոսքը գնում է ամերիկյան Novavax պատվաստանյութի խմբաքանակի գնման մասին։

Բացի այդ, ըստ առողջապահության նախարարի, Չինաստանի կառավարության հետ նախնական պայմանավորվածություն կա Sinovac պատվաստանյութի խմբաքանակի դոնորական մատակարարման մասին։

«Պատվաստանյութի շատ տարբերակներ են լինելու», — հավաստիացրել է Անահիտ Ավանեսյանը։

Ավելի վաղ Չինաստանի Հիվանդությունների վերահսկման կենտրոնի ղեկավար Գաո Ֆուն հայտարարել էր, որ Չինաստանում կորոնավիրուսի դեմ մշակված պատվաստանյութերի արդյունավետությունը մեծ չէ։ Ինչպես պարզվել է Բրազիլիայում կլինիկական հետազոտությունների ընթացում, չինական Sinovac Biotech Ltd. դեղագործական ընկերության պատվաստանյութի արդյունավետությունը 50,4 տոկոս է։

Համեմատության համար՝ ռուսական ու արևմտյան պատվաստանյութերինը 90%-ից բարձր է։