Ռուս սահմանապահները Հարավային Օսիայի կոնֆլիկտի գոտում առաջ են տվել այսպես կոչված սահմանը

Վրաստանում ԵՄ դիտորդների առաքելությունը հաստատում է, որ վերջին ժամանակներս ռուս սահմանապահները Հարավային Օսիայի այսպես կոչված սահմանին սահմանային արգելապատնեշներ են տեղադրել, ինչը բերել է նրան, որ Թբիլիսիի վերահսկման տակ գտնվող տարածքը կրճատվել է մոտ 10 հեկտարով:

Առաջին տեղեկություններն այն մասին, որ ռուսական օկուպացիոն ուժերն առաջ են տվել այսպես կոչված սահմանը 10 մետրով, վրացական մամուլում հայտնվել է հուլիսի 3-ին: Վրացական լրատվամիջոցների տվյալներով՝ սահմանային նշանն՝ այսպես կոչված «կանաչ պաստառը», տեղադրվել է Գորիի մունիցիպալիտետի Բերշուեթի գյուղի մոտ, որի հետևանքով մոտ 10 հեկտար մակերեսով տարածքը ռուսական օկուպացիայի տակ է հայտնվել:

ԵՄ մշտադիտարկման առաքելությունն իրավիճակը տեղում ուսումնասիրել է և հաստատել, որ հունիսին այսպես կոչված սահմանը տեղափոխվել է Գդուլեթիի տարածք, սակայն դեռևս չի հաստատում նոր «կանաչ պաստառների» տեղադրման փաստը վերջին շաբաթվա ընթացքում:

«ԵՄ դիտորդների առաքելությունը չարդարացված է համարում «կանաչ պաստառների» տեղակայումը: Սահմանազատման ցանկացած տեսակի գործողություններն, այդ թվում՝ պաստառների տեղադրումը, խոչընդոտում են ազատ տեղաշարժին, ինչպես նաև ֆերմերներին զրկում իրենց հողերը մշակելու հնարավորությունից», — ասված է ԵՄ դիտորդների առաքելության հայտարարությունում:

Հայտարարությունում ասված է նաև, որ տվյալ հարցը կարող է դիտարկվել 2017թ-ի հուլիսի 11-ին Էրգնեթիում միջադեպերի կանխման վերաբերյալ կայանալիք հանդիպմանն, ինչպես նաև հետագա հանդիպումներին:

Հրապարակման մեջ տեղ գտած տերմինները, տեղանունները, մտքերը և գաղափարները պարտադիր չէ, որ համընկնեն JAMnews-ի կամ նրա առանձին աշխատակիցների կարծիքների և գաղափարների հետ: JAMnews-ն իրավունք է վերապահում հեռացնել հրապարկումների վերաբերյալ արված այն մեկնաբանությունները, որոնք կգնահատվեն որպես վիրավորական, սպառնալիք պարունակող, բռնություն հրահրող կամ այլ պատճառներով էթիկապես անընդունելի: