ՌԴ-ից Հայաստան եկող զբոսաշրջիկների թիվը նվազել է 23%-ով
Ռուս զբոսաշրջիկների թվի նվազում Հայաստանում
2024 թ․ հունվար-հուլիս ամիսներին Հայաստան է այցելել շուրջ 1 միլիոն 184 հազար զբոսաշրջիկ։ ՀՀ Զբոսաշրջության կոմիտեի փոխանցմամբ՝ նախորդ տարվա նույն ժամանակահատվածի համեմատ այցելությունների թիվը նվազել է 6 տոկոսով։
Կոմիտեի միջազգային համագործակցության վարչության պետի տեղակալ Անուշ Բաբայանի պարզաբանմամբ՝ նվազման պատճառը Ռուսաստանից Հայաստան զբոսաշրջային այցելությունների թվի կրճատումն է։ Նախորդ տարվա հունվար-հուլիս ամիսներին շուրջ 500 հազար ռուս զբոսաշրջիկ է ՀՀ եկել, այս տարվա նույն ընթացքում՝ 23 տոկոսով պակաս։
«Նշեմ, որ ընդհանուր այցելությունների թվում ՌԴ-ից այցելությունները կազմում են շուրջ 42 տոկոսը»,- «Արմենպրեսին» տված հարցազրույցում շեշտել է Բաբայանը։
Ո՞ր երկրներն են բացը լրացնում
Չնայած նրան, որ ռուս զբոսաշրջիկների թվի նվազում է նկատվել, Ռուսաստանի Դաշնությունը շարունակել է մնալ ՀՀ զբոսաշրջային աճն ապահոված երկրների ցանկում։ Այս ցանկում են նաև Վրաստանը, Իրանն ու Միացյալ Նահանգները։
Զբոսաշրջության կոմիտեի միջազգային համագործակցության վարչության պետի տեղակալ Անուշ Բաբայանի դիտարկմամբ՝ դրանք այն երկրներն են, որոնք Հայաստանի համար հանդիսանում են հիմնական շուկաներ․
«Վերջին տարիներին զբոսաշրջային այցելությունների որոշակի աճ է գրանցվել մի շարք այլ երկրներից, այդ թվում՝ Հնդկաստանից, Ֆիլիպիններից և Չինաստանից՝ որոշակիորեն լրացնելով ՌԴ-ից այցելությունների նվազման հետևանքով ձևավորված բացը»։
Հիմնական շուկաներ են դիտարկվում նաև եվրոպական երկրները, մասնավորապես՝ Ֆրանսիան և Գերմանիան։
Նախաքովիդյան ժամանակաշրջանի համեմատ աճ է գրանցվել
Միայն հուլիս ամսին Հայաստան է եկել շուրջ 237․600 զբոսաշրջիկ՝ շուրջ 31 տոկոսով ավելի, քան հունիս ամսին։ 2023 թ․-ի հուլիս ամսվա համեմատ, սակայն, 6-7 տոկոս նվազում է նկատվել։
Անուշ Բաբայանն ասում է՝ եթե համեմատական անցկացնենք 2019 թվականի հետ, երբ դեռևս չկար կորոնավիրուսի համավարակ, ապա կարող ենք արձանագրել, որ գրանցվել է զբոսաշրջային այցելությունների թվի աճ՝ շուրջ 21 տոկոսով:
«Միայն 2019 թ․-ի հուլիս ամսվա համեմատ զբոսաշրջիկների թիվն այս տարվա հուլիսին աճել է շուրջ 17 տոկոսով»,- շեշտել է նա։
Նախընտրելի ուղղություններն են Սևանը, Դիլիջանը, Ծաղկաձորը
Տուրիստական գործակալությունների փոխանցմամբ՝ Հայաստան այցելող զբոսաշրջիկների նախասիրությունները փոխվել են։ Ասում են՝ նախկինում ամենապահանջված ուղղություններն էին Նորավանքը, Տաթևի վանական համալիրը, Խնձորեսկն ու Սատանի կամուրջը։ Այս տարի, սակայն, այլ պատկեր է։
«Զբոսաշրջիկները նախընտրում են դեպի Սևան, Դիլիջան, Ծաղկաձոր ուղղությունները, ինչպես նաև Լոռին, որն այս տարի շատ ավելի ակտիվ է, քան նախորդ տարիներին»,- պատմել է գործակալություններից մեկի տնօրենը։
Ըստ զբոսաշրջային գործակալությունների՝ վերջին տարիներին բավականին մեծացել է նաև արկածային և էքստրեմալ հանգիստ նախընտրող զբոսաշրջիկների թիվը:
Հետևեք մեզ — Facebook | Youtube | Telegram
Ռուս զբոսաշրջիկների թվի նվազում Հայաստանում
