«Դո՛ւրս եկեք փողոց»․ ռուս ընդդիմադիր գործիչ Նավալնին կալանավորվել է դատարանի կողմից, նա համախոհներին կոչ է անում ցույցեր անել
Ռուս ընդդիմադիր քաղաքական գործիչ Ալեքսեյ Նավալնին, որը նախօրեին է Ռուսաստան վերադարձել և ձերբակալվել է օդանավակայանում, կալանքի տակ է առնվել 30 օրով՝ մինչև հաջորդ դատական նիստը, որը կարող է նրան բանտ ուղարկել ավելի երկար ժամանակով։ Արևմտյան երկրների առաջնորդները դատապարտել են Նավալնու կալանքն ու պահանջում են անհապաղ ազատ արձակել նրան, Մոսկվայի դեմ նոր պատժամիջոցների կոչեր են հնչում։ Նավալնին իր կողմնակիցներին կոչ է արել փողոց դուրս գալ։
Նավալնին ձերբակալվել է հունվարի 17-ին, Մոսկվայի Շերեմետևո օդանավակայանում Գերմանիայից վերադառնալուց հետո, որտեղ բուժում էր անցնում «Նովիչոկ» մարտական թույնով թունավորվելուց հետո։ Իր թունավորման համար նա մեղադրել է ռուսական իշխանություններին։
Ինչպես հաղորդում է ռուսական «Նովայա գազետան», Նավալնուն պահանջել է կալանավորել պատիժների կատարման ծառայությունը․ ըստ գերատեսչության՝ Նավալնին խախտել է այսպես կոչված «Իվ Ռոշեի գործով սահմանված պայմանական ժամկետի կրման պայմանները», երբ Գերմանիայում բուժվելիս չի գրանցվել պատիժների կատարման ծառայությունում։
Փետրվարի 2-ին դատարանը կդիտարկի Նավալնու պայմանական ժամկետը կալանքով փոխարինելու հարցը։
- «Մարդկանց չէի ճանաչում և չէի կարողանում խոսել»․ Նավալնին պատմել է, թե ինչպես չի մահացել
- Այժմ Պուտինը Ռուսաստանում հավերժ է, իսկ ռուս ժողովուրդը՝ գլխավորը դաշնությունում։ Սահմանադրությունը փոխվել է
Դատարանի դահլիճի փոխարեն նիստը կայացել է ոստիկանական բաժանմունքում։ ՆԳՆ ներկայացուցիչները բացատրել են, որ նիստն այնտեղ է անցկացվում այն պատճառով, որ Նավալնին կորոնավիրուսի թեստ չի հանձնել։
Նավալնին ոստիկանության բաժանմունքում կատարվածն ամենաթողություն է անվանել։
«Ինչի՞ց են ամենաշատը վախենում այս բունկերային գողերը։ Ինքներդ շատ լավ գիտեք․ որ մարդիկ փողոց դուրս կգան։ Այդ պատճառով էլ մի վախեցեք, փողոց դուրս եկեք, դուրս եկեք ոչ թե ինձ, այլ ձեզ և ձեր ապագայի համար», — կոչ է արել Նավալնին։
Ոստիկանական բաժանմունք Նավալնուն սատարելու էր եկել նրա մի քանի տասնյակ համախոհ։ Սանկտ Պետերբուրգում ի աջակցություն նրա անցկացված ցույցերի ընթացքում ավելի քան 30 մարդ է ձերբակալվել։
Նրա շտաբի ներկայացուցիչները բողոքի ակցիաներ են անցկացնելու հունվարի 23-ին՝ Նավալնուն ազատ արձակելու պահանջով։
Դատապարտման ալիք
Արևմտյան երկրների առաջնորդներն ու միջազգային կազմակերպությունների ղեկավարները գրեթե միաձայն դատապարտել են Նավալնու ձերբակալությունն ու պահանջել անհապաղ ազատ արձակել ռուս ընդդդիմադրին։
Եվրահանձնաժողովի ղեկավար Ուրսուլա ֆոն դեր Լյայենը հայտարարել է, որ «ընդդիմադիրների ձերբակալությունը հակասում է Ռուսաստանի միջազգային պարտավորություններին»։
Եվրամիության արտաքին քաղաքական գերատեսչության ղեկավար Ժոզեպ Բորելը նույնպես դատապարտել է Նավալնու ձերբակալությունն ու հավելել, որ Եվրամիությունն «ուշադիր հետևելու է իրադարձությունների զարգացմանն ու շարունակելու է դրանք հաշվի առնել Ռուսաստանի նկատմամբ քաղաքականության ձևավորման ժամանակ»։
Գերմանիայի կանցլեր Անգելա Մերկելի անունից հայտարարությամբ է հանդես եկել դաշնային կառավարության մամուլի քարտուղար Շտեֆեն Զայբերտը։
«Ռուսական մարմինները ձերբակալել են քիմիական զենքի կիրառմամբ մահափորձի զոհին», — նշել է նա և կոչ արել անհապաղ ազատ արձակել Նավալնուն և «ամբողջությամբ պարզել Ռուսաստանի տարածքում քիմիական զենքի կիրառմամբ գրոհի հանգամանքները»։
Մեծ Բրիտանիայի արտգործնախարար Դոմինիկ Ռաաբը նույնպես Մոսկվային հիշեցրել է մարտական թույնի կիրառման համար մեղադրանքի մասին։
Չեխիայի արտգործնախարար Տոմաշ Պետրժիչեկը, դատապարտելով Նավալնու ձերբակալությունը՝ որպես քաղաքական շարժառիթներով հետապնդման ակտ, հաղորդել է, որ պատրաստվում է ռուսական իշխանությունների դեմ նոր պատժամիջոցների մասին հարցը քննարկել գործընկերների հետ ԵՄ երկրների արտգործնախարարների հաջորդ հանդիպմանը։
ՄԱԿ-ի մարդու իրավունքների հարցերով գլխավոր հանձնակատար Միշել Բաչելետը նույնպես կոչ է արել ազատ արձակել Նավալնուն։
Նավալնու ձերբակալությունը դատապարտել են նաև ԱՄՆ երկու՝ հեռացող և նորընտիր վարչակազմերի ներկայացուցիչները։
«Մենք խորը մտահոգությամբ նշում ենք, որ այդ ձերբակալությունը Նավալնուն և ընդդիմության մյուս գործիչներին լռեցնելու հերթական փորձն է», — ասված է Թրամփի վարչակազմում ԱՄՆ պետքարտուղար Մայք Պոմպեոյի հայտարարությունում։
Նորընտիր նախագահ Ջո Բայդենի ազգային անվտանգության հարցերով խորհրդարան Ջեյք Սալիվանն էլ հայտարարել է, որ Նավալնին պետք է անհապաղ ազատ արձակվի, իսկ նրա նկատմամբ զազրելի մահափորձի մեղավորները պետք է պատասխանատվության ենթարկվեն։
Ռուսաստանի արձագանքը
Նավալնու կալանքին միջազգային արձագանքը մեկնաբանել է Ռուսաստանի արտգործնախարար Սերգեյ Լավրովը, որը հերքել է արևմտյան գործընկերների մեղադրանքները։
«Մենք տեսանք, թե ինչպես կառչեցին Նավալնու՝ Ռուսաստան վերադառնալու երեկվա լուրից։ Զգացվում է, թե ինչ ուրախությամբ են թելադրված մեկնաբանություններ արվում։ Ուրախությամբ, որովհետև դա արևմտյան քաղաքական գործիչներին, ըստ ամենայնի, թույլ է տալիս մտածել, թե իրենք այդպիսով կարող են ուշադրություն շեղել ամենախորը ճգնաժամից, որում հայտնվել է զարգացման լիբերալ մոդելը», — հայտարարել է Լավրովը։
