Ռուսաստան․ մեկուսացման շքերթ
Ռուսաստանը հունիսի 24–ին պերճաշուք ռազմական շքերթ է անցկացրել Երկրորդ աշխարհամարտում տարած հաղթանակի 75-ամյակի առթիվ։ Սակայն Մոսկվա ժամանած միջազգային հյուրերի թվում արևմտյան աշխարհից ոչ ոք չկար, անգամ Հայաստանի, Ադրբեջանի և Կենտրոնական Ասիայի հավատարիմ առաջնորդները չէին եկել։
«Ռուսաստանն այնպես է փչացրել իր հեղինակությունը, որ նրանից երես են թեքում նույնիսկ դաշնակիցները», — մեկնաբանում են փորձագետները։
Շքերթը պետք է կայանար մայիսի 9–ին՝ ֆաշիստական Գերմանիայի նկատմամբ տարած հաղթանակի օրը, սակայն տոնակատարությունները հետաձգվել էին կորոնավիրուսի համավարակի պատճառով։
Շքերթին մասնակցում էր մինչև 15 հազար զինծառայող և ռազմական տեխնիկայի և ավիացիայի ավելի քան 200 միավոր, այդ թվում՝ Երկրորդ ախարհամարտին մասնակցած։
Օտարերկրյա հյուրեր․ ո՞վ էր եկել, ո՞վ՝ հրաժարվել
Շքերթին Ռուսաստանի նախագահի հրավերով ժամանել էին արտասահմանյան առաջնորդներ․ ըստ Կրեմլի պաշտոնական հաղորդագրությունների՝ շքերթին ներկա էին Բելառուսի, Ուզբեկստանի, Բոսնիա և Հերցեգովինայի, Ղազախստանի, Ղրղզստանի, Մոլդովայի, Տաջիկստանի, Սերբիայի առաջնորդները։
Ներկա էին նաև Հարավային Օսիայի և Աբխազիայի առաջնորդները, որոնք Ռուսաստանը ճանաչել է որպես անկախ պետություն։
Շատ միջազգային և ռուսական լրատվամիջոցներ գրում են, որ շատ նախագահներ, որոնց հետ Ռուսաստանը լավ հարաբերություններ ունի, հրաժարվել են մասնակցել տոնին տարբեր դրդապատճառներով։
Ռուսական «Նովայա գազետան» ուշադրություն է դարձնում այն պատճառների վրա, որոնք պետությունների ղեկավարները նշում են որպես մերժման հիմք։ Այսպես, Հայաստանի և Ադրբեջանի առաջնորդները նշել են իրենց երկրներում համավարակի դեմ պայքարի անհրաժեշտությունը։
Թուրքմենստանի նախագահ Գուրբանգուլի Բերդիմուհամեդովը ցանկացել է ժամանել, սակայն նա հարգելի պատճառ ուներ՝ Մարգարեի տարիքը։ Այդպես են իսլամում անվանում մարդու 63-ամյակը, այն պետք է նշել ընտանեկան շրջապատում։
Մոսկվա մեկնելուց հրաժարվել է նաև Խորվաթիայի նախագահ Զորան Միլանովիչը․ անսպասելիորեն փչացել է նրա ինքնթիռը։
«Մոսկվայից պարզապես երես են թեքում»
Հյուրերի այս կազմն, ինչպես նաև նրանց, ովքեր սկզբից համաձայնել են, հետո՝ հրաժարվել, լիակատար ձախողում է, արձանագրում են փորձագետները։
«Ռուսական ռեժիմն այնքան է վարկաբեկել իրեն համաշխարհային հանրության կարծիքում, որ նրա հետ գործ ունենալը թանկ է նստում։ Առանց հատուկ անհրաժեշտության Մոսկվա մեկնել այժմ ոչ ոք չի ուզում։ Ինչո՞ւ ընկնել քննադատության ալիքի տակ», — «Նովայա գազետան» մեջբերում է քաղաքագետ մեկնաբան Աբաս Գալյամովի խոսքերը։
Քաղաքական աշխարհագրագետ Դմիտրի Օրեշկինը հավելում է, որ բոլորին լրացուցիչ կերպով կարող էր շփոթեցնել «ռուսական հողերի» մասին Պուտինի արտահայտությունների հետ կապված պատմությունը, որոնք անարդար կերպով հայտնվել են այլ պետությունների կազմում, և Երկրորդ աշխարհամարտի մասին անգլերենով նրա հոդվածը։
«Սա այնպիսի զանգվածային մեկուսացում է, որ նույնիսկ (Ֆրանսիայի նախագահ) Մակրոնը կարծես պատրաստվում էր ժամանել, սակայն նույնպես մտափոխվել է։ Այնպիսի թրենդ է, որ Մոսկվայից այժմ բոլորը երես են թեքում», — կարծում է նա։
Կրեմլի համար կատարվածը ցավալի հարված է, վստահ է Գալյամովը։
«Հանրային կարծիքի հարցումները ցույց են տալիս, որ ռուսաստանցիներին բնավ դուր չի գալիս մեկուսացման մեջ հայտնվելու գաղափարը։ Մի բան է, երբ դու դեմ ես դուրս գալիս անարդարությանը, որն աշխարհում անում է Ամերիկան, և քեզ հետևում է նրա կողմից ճնշված աշխարհը, մեկ այլ բան է, երբ մարգինալ ես դառնում, որին ոչ ոք չի ուզում անգամ ձեռք մեկնել», — ներկայացնում է հասարակությունում տիրող տրամադրությունները Գալյամովը։
