Ռուսաստանում համացանցի մեկուսացման վարժանքը խաթարել է օդանավակայանների աշխատանքը
Ռուսաստանում մասշտաբային կերպով խաթարվել է համացանցը, որը մի քանի ժամով պարալիզացրել է երկրի տարբեր ծայրերում օդանավակայաններից շատերում ռուսական մի քանի ավիաընկերությունների աշխատանքը։ Դադարել են աշխատել ուղևորների և ուղեբեռի գրանցման համակարգերն, ինչպես նաև տոմսերի ամրագրման և գնման համակարգերը։ Ավիաընկերթյունները ստիպված են եղել ուղևորներին և նրանց ուղեբեռը ձեռքով գրանցել։
Այս խաթարումը կապում են ռուսական համացանցի մեկուսացմանն ուղղված վարժանքների հետ, որոնք անցկացրել են ռուսական իշխանությունները։
Վարժանքները նախատեսված են ինքնիշխան ռունետի մասին օրենքով, որը բազում վեճեր և բողոքի ցույցեր է առաջացրել։
_____________________________________________________________________________________
•Ռուսական «ինքնիշխան համացանցի» և դրա քրեական համատեքստով հեղինակների մասին
•Վրաստանի իշխանությունները կապված են ֆեյսբուքյան հարյուրավոր կեղծ էջերի հետ
_____________________________________________________________________________________
Ի՞նչ է ռուսական «ինքնիշխան համացանցը»
2019 թ-ի մարտին Մոսկվայում հանրահավաք էր տեղի ունեցել՝ ի աջակցություն ազատ համացանցի, դրան մասնակցում էր ավելի քան 15 հազար մարդ։ Ակցիայի մասնակիցները բողոքում էին ինքնիշխան ռունետի մասին օրենքի դեմ և ասում, որ դրա արդյունքը լինելու է համաշխարհային համացանցից և Google-ի պես ընկերությունների ծառայություններից Ռուսաստանի մեկուսացումը։
Սակայն 2019 թ-ի նոյեմբերի 1-ին «ինքնիշխան ռունետի» մասին օրենքն ուժի մեջ է մտել։ Դրա նպատակն, ինչպես հայտարարվել է, Ռուսաստանի անվտանգության ապահովումն է, եթե նրան անջատեն համաշխարհային համացանցից։
Օրենքը նախատեսում է կապի օպերատորների և թրաֆիկի նկատմամբ պետական մարմինների վերահսկողության ուժեղացում։ Ըստ օրենքի՝ վարժանքները, որոնց պարտավոր են մասնակցել կապի ցանցերի տերերը, ինտերնետ-ընկերություններն ու շուկայի մյուս խաղացողները, պետք է տարեկան նվազագույնը մեկ անգամ անցկացվեն։
Եվ ահա դրանք անցկացվել են 2019 թ-ի դեկտեմբերի 23-ին։
«Վերջում բոլորը հարբելու են», կամ ինչո՞ւ են պետք «ինքնիշխան ռունետի» վարժանքները
Ինչպես գրում է ռուսական «Նովայա գազետա» պարբերականը, «համացանցի կիբերանվտանգության» վարժանքներում ներգրավվել են անվտանգության ծառայությունը, պաշտպանության նախարարությունը, ՆԳՆ-ն, պահպանության դաշնային ծառայությունն ու Ռոսգվարդիան, ինչպես նաև էներգետիկայի նախարարությունն ու գործադիր իշխանության մյուս մարմինները։
Իշխանությունները խոստացել են, որ սովորական օգտատերերը չեն նկատելու վարժանքները, որոնց ընթացքում սպառնալիքների մշակումն անցկացվել է միայն «հատուկ նախանշված տիրույթներում, ստենդերում և պոլիգոններում»։
______________________________________________________________________________________
Մեկնաբանություն
«Համացանցի պաշտպանության միություն» հասարակական կազմակերպության տնօրեն
Միխայիլ Կլիմարյով
«Այս վարժանքներն ընդամենն իմիտացիա էին։ Նախևառաջ այն պատճառով, որ նախապես չէր հրապարակվել դրանց պլանը, ինչպես պահանջում է օրենքը։ Այսպիսի վարժանքները կարող են միայն հետևյալ կերպ լինել․ հավաքվելու են բացարձակ ոչ կոմպետենտ մարդիկ, փքելու են այտերն ու քննարկելու բաներ, որոնցից գլուխ չեն հանում, և վերջ։
Ինչպիսի՞ն պետք է լինի նման վարժանքների ակնկալվող արդյունքը։ Կարծում եմ, որ նրանք այնտեղ վերջում բոլորը պարզապես հարբելու են»։
