«ՌԴ-ն ծրագրում է Մոլդովայում հեղաշրջում անել՝ պատանդներ վերցնելով». Մայա Սանդու
Newsmaker մոլդովական պարբերականը գրում է, որ Մոլդովայի նախագահ Մայա Սանդուն փետրվարի 13-ին կայացած ճեպազրույցում հայտարարել է, որ Ռուսաստանը Մոլդովայում հեղաշրջում է ծրագրում.
«Դա կկազմակերպվի ընդդիմության բողոքի ակցիաների տեսքով և զինվորական պատրաստություն անցած, բայց որպես քաղաքացիական ներկայացող անձանց ներգրավմամբ: Ծրագիրը նախատեսում է նաև Ռուսաստանի, Բելառուսի, Սերբիայի և Չեռնոգորիայի քաղաքացիների մուտք Մոլդովա: Նրանք կգրոհեն կառավարական շենքերը, պատանդներ կվերցնեն և կփորձեն հանրապետությունում իշխանափոխություն անել»։
«Հանցագործները հույսը դրել են որոշ ներքին ուժերի վրա, մասնավորապես’ հանցավոր խմբերի, ինչպիսին «Շոր» կուսակցությունն է, իրավապահ համակարգի նախկին աշխատակիցների և օլիգարխ Պլահոտնյուկի հետ իրենց կապերով հայտնի մարդկանց»:
Սանդուն ասել է, որ առաջին անգամը չէ, որ Ռուսաստանը մտադրվել է ապակայունացնել իրավիճակը Մոլդովայում։ Նրա խոսքով՝ նման փորձեր արդեն իսկ արվել են անցյալ աշնանը, «սակայն Մոլդովայի անվտանգության մարմինների օպերատիվ միջամտության շնորհիվ դրանք անհաջող են եղել»։
«Այս գործողությունների նպատակը Քիշնևում սահմանադրական և օրինական իշխանությունը տապալելն է, այն ոչ լեգիտիմ, ռուսամետ իշխանությամբ փոխարինելը, որպեսզի Ռուսաստանը կարողանա դադարեցնել հանրապետության եվրաինտեգրման գործընթացն ու օգտագործել Մոլդովան Ուկրաինայի դեմ պատերազմում»,- նշել է Մայա Սանդուն։
Նա վստահեցրել է, որ այժմ էլ ուժային կառույցներն աշխատում են այդ սադրանքները կանխելու և իրավիճակը վերահսկողության տակ պահելու ուղղությամբ, քաղաքացիներին կոչ է արել զգոն լինել և վստահել պաշտոնական տեղեկատվությանը, քանի որ «հարձակման ամենաագրեսիվ ձևը տեղեկատվական հարձակումն է»։
***
Փետրվարի 9-ին Բրյուսելում Եվրոպական խորհրդի նիստում Վլադիմիր Զելենսկին պատմել էր, որ Մայա Սանդուին տեղեկացրել է այն մասին, որ ուկրաինական հետախուզությանը «հաջողվել է գաղտնալսել ռուսական մանրակրկիտ ծրագիրը Մոլդովայում քաղաքական իրավիճակը ապակայունացնելու վերաբերյալ»: Զելենսկին այդ ժամանակ ասել էր, որ դեռևս հայտնի չէ՝ արդյոք Մոսկվան հրամայել է իրականացնել այդ ծրագիրը։
Զելենսկու խոսքերը հաստատել է նաև Մոլդովայի նախագահի վարչակազմը։ Նրանք ընդգծել են, որ Մայա Սանդուն և նրա ուկրաինացի գործընկերը մշտապես կարծիքներ են փոխանակում տարածաշրջանում տիրող իրավիճակի վերաբերյալ։
