«Օտարերկրյա գործակալների մասին» օրենքը Վրաստանում ուժի մեջ կմտնի հունիսի 4-ին
«Ռուսական» օրենքը Վրաստանում կմտնի ուժի մեջ
Վրաստանի խորհրդարանի նախագահ Շալվա Պապուաշվիլին ստորագրել է «օտարերկրյա գործակալների մասին» օրենքը։ Այն ուժի մեջ կմտնի հունիսի 4-ին, ինչից հետո օտարերկրյա ֆինանսավորում ունեցող կազմակերպությունները կունենան 60 օր ժամանակ համապատասխան էլեկտրոնային հարթակում գրանցվելու և 2023 թվականի ֆինանսական միջոցները հայտարարագրելու համար։
Վրաստանի վարչապետ Իրակլի Կոբախիձեն կառավարության նիստի ժամանակ հայտարարել է, որ օրենքի ընդունմամբ Վրաստանը նվաճել է իր ինքնիշխանությունն ու անվտանգությունը։ Ըստ Կոբախիձեի՝ վերջին երկու ամիսների ընթացքում այս օրենքի վերաբերյալ շատ ապատեղեկատվություն է տարածվել, բորբոքվել են արհեստածին կրքեր։
«Հիմա օրենքն արդեն ուժի մեջ է մտել, և մենք բոլորս պետք է գործենք պրագմատիկ, մի կողմ դնենք ավելորդ էմոցիաները։ Սա վերաբերում է հատկապես այն մարդկանց, որոնք փորձում են լիբերալ-ֆաշիստական գործողություններով քողարկել այն հիասթափությունը, որն առաջացել է բողոքի ձախողման հետևանքով։
Լիբերալ ֆաշիզմը ոչ պակաս վտանգավոր գաղափարախոսություն է, քան դասական ֆաշիզմն ու բոլշևիզմը։ Այն տարիներ շարունակ արհեստականորեն ներմուծվել է մեր երկիր ոչ թափանցիկ ֆինանսների միջոցով և բացարձակապես անհամատեղելի է վրացական մշակույթի հետ»,- ասել է Կոբախիձեն։
Իշխող «Վրացական երազանք» կուսակցության գլխավոր քարտուղար և Թբիլիսիի քաղաքապետ Կախա Կալաձեն իր հերթին ասել է, որ եթե կազմակերպությունները չհետևեն նոր օրենքին, դա ի վերջո կհանգեցնի նրանց գործունեության դադարեցմանը.
«Եթե չեն ենթարկվում օրենքին, նախատեսված են տուգանքներ, հետո՝ բռնագանձում և այլն։ Նրանք պարզապես չեն կարողանա գործունեություն ծավալել և ստանալ այն գումարները, որոնք ստանում են հիմա։ Եթե ձեր գործը լավ եք անում և վատ մտադրություններ չունեք, ի՞նչ խնդիր եք տեսնում հայտարարագիր լրացնելու և ձեր ֆինանսները ցույց տալու մեջ, ներկայացնելու, թե որտեղից են ձեր եկամուտները և կոնկրետ ինչ ծրագրեր են ֆինանսավորվում: Կասկած կա, որ այս ամբողջ բևեռացումը, հեղափոխության սցենարի ֆինանսավորումը տեղի է ունեցել հենց այդ ամենի ոչ թափանցիկ լինելու պատճառով»։
- «Վրաստանի «ռուսականացումը» կբարդացնի ՀՀ՝ ՌԴ-ից պոկվելը»․ կարծիքներ Երևանից
- Սպառնալիք, վիրավորանք, ծեծ. ակտիվիստների դեմ «պատերազմ» Վրաստանում
Վրաստանում գործող քաղաքացիական հասարակության կազմակերպությունները հայտարարում են, որ շարունակելու են իրավական պայքարը «գործակալների մասին» օրենքի դեմ։ Մայիսի 30-ին կայացած համատեղ ճեպազրույցում նրանք ասացին, որ կիրառելու են ներպետական և միջազգային մեխանիզմներ օրենքի կիրարկումը արգելափակելու համար։ Կազմակերպությունները հայց են նախապատրաստում Վրաստանի Սահմանադրական դատարան ներկայացնելու համար.
«Սահմանադրական դատարանը կարող է գործել Սահմանադրությամբ իրեն վերապահված լիազորություններին համապատասխան և կասեցնել օրենքի համապատասխան դրույթների գործողությունը։
Եթե Սահմանադրական դատարանը չգործի ժամանակին և Սահմանադրության շրջանակներում, մենք կկիրառենք այլընտրանքային իրավական մեխանիզմ։
Միաժամանակ մենք պատրաստվում ենք բողոք ներկայացնել նաև Մարդու իրավունքների եվրոպական դատարան»։
