Վաշինգտոնը սպառնո՞ւմ է ԼՂ-ում հակաահաբեկչական օպերացիայով. կարծիքներ Երևանից և Բաքվից
ՌԻԱ Նովոստի. Վաշինգտոնը ԼՂ-ին ստիպում է բանակցել
«Վաշինգտոնը վերջնագրային տեսքով ստիպում է Լեռնային Ղարաբաղի ներկայացուցիչներին մոտ ժամանակներս համաձայնել ադրբեջանական կողմի հետ հանդիպմանը «երրորդ երկրում»՝ ամերիկացի համակարգողի մասնակցությամբ։ Այս տեղեկությունը տարածել են ռուսական լրատվամիջոցները՝ հղում անելով «դիվանագիտական աղբյուրին»։ Նշվում է նաև, որ մերժման դեպքում «Ղարաբաղի ղեկավարությանը սպառնում է ադրբեջանական հակաահաբեկչական գործողություն»։
«Արևմուտքը Արցախի դեմ որևէ ռազմական ինտերվենցիա չի սպասարկում և չի օժանդակում»,- ասում է քաղաքական մեկնաբանը Երևանից։ «Վաշինգտոնի, իբր, դիվանագիտական աղբյուրի հաղորդագրությունը ոչ այլ ինչ է, քան Կրեմլի կողմից դաշտ նետված ինֆորմացիա»,- հավելում է փորձագետը Բաքվից:
- «Ռեգիոնալ խաղացողները շահագրգռված չեն լայնամասշտաբ էսկալացիայով»․ կարծիք Երևանից
- Ականներով լի բազմոցները նավարկում են դեպի լողափեր․ Կախովկա ՀԷԿ-ի ոչնչացման հետևանքները
- Վրաստանը 36-րդ տեղում է «Սթիվ Հանկեի տառապանքի ինդեքսում»
Տեղեկություն Մոսկվայից
Սենսացիոն տեղեկությունը հայտնվեց այսօր առավոտյան, այն հրապարակել էր ռուսական պետական РИА Новости գործակալությունը։ Դրանում ընդգծվում է, որ Վաշինգտոնի նպատակը տարածաշրջան ներթափանցելն է։
Քիչ անց նույն գործակալությունը հրապարակեց ՌԴ ԱԳՆ արձագանքն այս հաղորդագրությանը.
«Ռուսաստանին անհանգստացնում են տվյալներն այն մասին, որ ԱՄՆ-ը փորձում է միջնորդական ծառայություններ պարտադրել Բաքու-Ստեփանակերտ երկխոսության մեջ (այդ թվում՝ ուժի կիրառման սպառնալիքների միջոցով), սա հարցեր է առաջացնում ամերիկացի միջնորդների ադեկվատության վերաբերյալ»։
Այս հաղորդագրությունները մեկնաբանելու խնդրանքով JAMnews-ը դիմել է Երևանի և Բաքվի վերլուծաբաններին։
Մեկնաբանություն Երևանից
«Ռուսաստանն այլևս անելիք չունի տարածաշրջանում»
Քաղաքագետ Գուրգեն Սիմոնյանը «Ռիա Նովոստիի» հրապարակումը դիտարկում է որպես տեղեկատվական պատերազմի տարրեր պարունակող երևույթ։ Վկայակոչված «դիվանագիտական աղբյուրն», ըստ նրա, հավաստի չէ։ Ասում է՝ փորձում են «ճոճել իրավիճակը»։
«ԱՄՆ-ն կարող է դնել վերջնագրային պահանջ, բայց չեմ կարծում, որ դրել է։ Նահանգների գործիքակազմի մեջ ուժի կիրառումը կամ ուժի կիրառման սպառնալիքը մտնում է։ Տեղյակ չեմ՝ կիրառել է, թե ոչ։ Խոսքս լրիվ հակառակ ուղղությամբ՝ Ադրբեջանին կառուցողական հուն ուղղորդելու մասին է»,- JAMnews-ի հետ զրույցում ասել է նա։
Սիմոնյանի խոսքով՝ Արևմուտքը Արցախի նկատմամբ որևէ «ռազմական ինտերվենցիա» չի սպասարկում և չի օժանդակում։ Հիշեցնում է՝ վաշինգտոնյան հարթակում ընթացող բանակցությունների ժամանակ կողմերին տրվել էր, այսպես կոչված, տնային առաջադրանք՝ ինչպես են պատկերացնում Արցախի բնակչության անվտանգության խնդրի լուծումը։
Քաղաքագետի գնահատմամբ՝ Մոսկվան «ներդրում է կատարել ոչ Հայաստանի օգտին»։
«Ի հեճուկս փաստաթղթերով իրենց ռազմաքաղաքական դաշնակցի շահերի՝ ադրբեջանական օրակարգն են առաջ տանում Հայաստանի համար ամենավտանգավոր և կործանարար ճանապարհով՝ ընդհուպ մինչև ՀՀ գոյության համար մեծ սպառնալիքներ ստեղծելով»,- ընդգծել է նա։
Սիմոնյանի կարծիքով՝ Բաքու-Ստեփանակերտ երկխոսության հարցում նույնպես ՌԴ-ն առաջնորդվում է Ադրբեջանի շահերով․
«Այդ երկխոսությունը Ստեփանակերտին օժտում է սուբյեկտայնությամբ։ Իսկ ՌԴ-ն Արցախը դրել է զոհասեղանին՝ իբրև գին ՀՀ նկատմամբ ագրեսիան շարունակելու համար։ Եթե դա հաջողությամբ պսակվեց, ՌԴ-ն իր ներկայությունը կամրապնդի՝ նաև սակարկության ենթարկելով ՀՀ ինքնուրույնությունը։ Ամեն գնով պետք է դա թույլ չտանք»։
Շեշտում է՝ տարածաշրջանում Ռուսաստանն այլևս անելիք չունի, քանի որ ձախողել է այն ամենն, ինչ պետք է աներ, հիմա էլ կրում է իր «սխալ քաղաքականության հետևանքները»։
«Մոսկվային թող չհուզի, թե Հայաստանն ինչ մեխանիզմներով կփորձի իր ազգային անվտանգությունը պաշտպանել, տարածաշրջանում հավասարակշռությունը վերականգնել և կանխել իր ազգային շահերի ու հետաքրքրությունների ոտնահարումը»,— ամփոփել է նա։
ՌԻԱ Նովոստի. Վաշինգտոնը ԼՂ-ին ստիպում է բանակցել
Մեկնաբանություն Բաքվից
«Վաշինգտոնի աղբյուրը իրականում նստած է Մոսկվայում»
Քաղաքական մեկնաբան Հաջի Նամազովը կարծում է, որ «Վաշինգտոնի, իբր, դիվանագիտական աղբյուրի հաղորդագրությունը ոչ այլ ինչ է, քան Կրեմլի կողմից դաշտ նետված ինֆորմացիա»։
«Սրա մասին են վկայում մի քանի գործոններ։
Նախ՝ հաղորդագրությունը փոխանցել է ՌԴ իշխանություններին պատկանող գործակալություն։ Առանց Կրեմլի կուրատորների իմացության այնտեղ նման հաղորդագրություններ չեն հրապարակվում։
Երկրորդ՝ կոնկրետ աղբյուր չկա։ Այս «դիվանագիտական աղբյուրը» կարող է նստած լինել Ռուսաստանի Դաշնության արտաքին գործերի նախարարությունում»,— ասում է նա։
Նամազովը ուշադրություն է հրավիրում այն փաստի վրա, որ հաղորդագրության կառուցվածքն ինքնին հանգեցնում է որոշ մտքերի.
«Այն, որ եթե Խանքենդիի անօրինական ռեժիմը հրաժարվի Բաքվի հետ կապ հաստատելուց և իշխանություններին հանձնվելուց, Ադրբեջանը հակաահաբեկչական գործողություն կսկսի Ղարաբաղում, վաղուց գաղտնիք չէ։ Այդ մասին բացահայտ հայտարարել է անձամբ նախագահ Իլհամ Ալիևը։
Ավելին, Ռուսաստանի իշխանությունները քաջատեղյակ են, որ Վաշինգտոնը սատարել է Ալիևի հայտարարությանը, այսպես կոչված, Ղարաբաղի անջատողական ռեժիմի առաջնորդների հնարավոր համաներման մասին։
Ամերիկացիներին պետք չէ հակաահաբեկչական գործողությամբ վախեցնել Ղարաբաղի հայ բնակչությանը։ Դա իրերի տրամաբանությունից է բխում:
Այս համեմատաբար փոքր հաղորդագրությունում ևս մեկ հետաքրքիր կետ կա։ Ստացվում է, որ Վաշինգտոնի նպատակը տարածաշրջան ներթափանցելն է։ Դա ծիծաղելի է:
ԱՄՆ-ն արդեն իսկ մեծ ազդեցություն ունի տարածաշրջանում։ Իսկ ամերիկյան զորքերի մուտքը Ղարաբաղ անհնար է երկու պատճառով։ Այժմ այնտեղ տեղակայված են ռուս խաղաղապահներ։ Եվ եթե անգամ նրանք հեռանան 2025 թվականին, Ադրբեջանը երբեք չի համաձայնի այլ երկրի զորք տեղակայել։ Որովհետև երկրի տարածքում օտարերկրյա ռազմակայանների առկայությունը հակասում է Ադրբեջանի օրենսդրությանը»,— ընդգծել է քաղաքական մեկնաբանը։
«Ուրեմն ո՞ւմ էր պետք այս հաղորդագրությունը: Իհարկե, հենց Մոսկվային։ Այսպիսով, Կրեմլը հստակ ակնարկում է, որ դեմ է Խանքենդիի և Բաքվի միջև բանակցություններին, ինչպես նաև կփորձի կանխել հակաահաբեկչական գործողությունը Ղարաբաղում։ Քանի որ Ղարաբաղի ողջ տարածքի վրա Ադրբեջանի ինքնիշխանության հաստատումից հետո ռուս խաղաղապահներն այնտեղ այլևս անելիք չեն ունենա։ Իսկ Ռուսաստանը մտադիր չէ լքել տարածաշրջանը 2025 թվականին։ Թեև պաշտոնական Բաքուն այդ մասին արդեն խոսում է բոլոր մակարդակներում։
Չեմ կարծում, որ Ռուսաստանն ի վիճակի է ինչ-որ բան փոխել Ադրբեջանի ծրագրերում։ Մինչև այս ամառվա վերջ Խանքենդիի անջատողական ռեժիմին վերջ կդրվի։ Սրանում Բաքվում գրեթե ոչ ոք կասկած չունի»,— ամփոփել է Նամազովը։
Հետևեք մեզ — Facebook | Youtube | Telegram
ՌԻԱ Նովոստի. Վաշինգտոնը ԼՂ-ին ստիպում է բանակցել
