Ռեջեփ Էրդողանը պահպանեց Թուրքիայի նախագահի աթոռը: Նրա կուսակցությունը խորհրդարանական մեծամասնություն է կազմում

Թուրքիայում կայացան երկրի նախագահի և խորհրդարանի արտահերթ ընտրություններ: Ձայների մեծ մասի հաշվարկից հետո հաղթող է հայտարարվել ներկայիս նախագահ Ռեջեփ Էրդողանը: Ըստ նախնական տվյալների՝ նա հավաքում է ձայների մոտ 53 տոկոսն, իսկ նրա «Արդարություն և զարգացում» կուսակցությունը խորհրդարանում մեծամասնություն է պահպանում, հաղորդում է CNN—ը:

Արդյունքները

Ընդդիմության առաջնորդ Մուհարրեմ Ինջեին նախապատվություն է տվել ընտրողների 31%-ը: Ընդ որում, քվեարկության օրվա նախօրեին ընդդիմության կազմակերպած բողոքի ցույցի էր դուրս եկել, ըստ տարբեր տվյալների, 2,5-4մլն մարդ ողջ Թուրքիայի տարածքում:

Թուրքիայի խորհրդարանի ընտրություններում առաջատար է ճանաչվել «Արդարություն և զարգացում» կուսակցությունը, որը գլխավորում է Էրդողանը: Այն հավաքում է ձայների 60 տոկոսը:

Նախապատմություն

Թուրքիայում ներքաղաքական իրավիճակը կտրուկ փոխվեց երկու տարի առաջ այն բանից հետո, երբ զինվորականները պետական հեղաշրջման փորձ կատարեցին։ Էրդողանը, որին հաջողվեց ճնշել հեղաշրջման փորձը, երկրում զանգվածային հետապնդումներ իրականացրեց:

2016թ-ի ամռանից, երբ կատարվեց հեղաշրջման փորձը, Թուրքիայում տասնյակ հազարավոր մարդիկ զրկվեցին իրենց աշխատանքից ԱՄՆ-ում բնակվող քարոզիչ Ֆեթուլլահ Գյուլենի հետ ենթադրյալ կապերի պատճառով: Հենց նրան է Էրդողանը համարում չկայացած պետական հեղաշրջման կազմակերպիչ: Հարյուրավոր մարդիկ այդ նույն պատճառով բանտում են հայտնվել: Խոսքը գնում է բարձրաստիճան զինվորականների, ոստիկանների, դատավորների, լրագրողների, համալսարանական դասախոսների մասին:

2017թ-ի հանրաքվեն և դրա հետևանքները

2017թ-ին Թուրքիայում սահմանադրական հանրաքվե անցկացվեց, որի արդյունքում նախագահի լիազորությունները զգալիորեն ընդլայնվեցին: Սահմանադրական այլ փոփոխություններից զատ Թուրքիայում նախագահական ժամկետն ավելացավ մինչև 5 տարի: Հանրաքվեի արդյունքները թույլ տվեցին երկրի նախագահին խորհրդարանի աջակցության պարագայում արտահերթ ընտրություններ նշանակել:

Ենթատեքստը

Արտահերթ ընտրություններ հայտարարելը (ըստ ժամանակացույցի՝ դրանք պետք է կայանային 2019թ-ին) Էրդողանին պահանջվեց նրա համար, որ հանրաքվեի արդյունքում ընդունված սահմանադրական փոփոխությունները, որքան հնարավոր է, շուտ ուժի մեջ մտնեն: Բացի այդ, Թուրքիայի նախագահը վստահ չէր, որ երկիրը լավ տնտեսական վիճակում կգտնվի մեկ տարուց, այդ պատճառով էլ որոշեց ընտրությունները հիմա անցկացնել: Այն մասին, որ Թուրքիայի նախագահի և խորհրդարանի ընտրությունները վաղաժամ են անցացվելու, հայտարարվել է այս տարվա ապրիլին: