Երկքաղաքացի հանդիսացող աբխազները կկարողանան ՌԴ մուտք գործել միայն ռուսական անձնագրերով
ՌԴ-ն չի ընդունում աբխազական անձնագրերը
Նոր կանոնի համաձայն՝ երկքաղաքացի (ՌԴ և Աբխազիայի) հանդիսացող աբխազները կկարողանան Ռուսաստան մուտք գործել միայն ռուսական անձնագրերով։ Աբխազիայի արտաքին գործերի նախարարությունը խորհրդակցություններ է անցկացնում Ռուսաստանի համապատասխան գերատեսչությունների հետ՝ աբխազական անձնագրով սահմանը հատելու հնարավորությունը վերականգնելու համար։
Աբխազիայի այն քաղաքացիների համար, ովքեր չունեն երկրորդ քաղաքացիություն, ամեն ինչ մնում է նույնը։
Աբխազական անձնագիրը միջազգայնորեն ճանաչված չէ։ Աբխազիայի քաղաքացիների մեծ մասն ունի նաև երկրորդ՝ Ռուսաստանի քաղաքացիություն։ Մինչ այժմ նրանք կարող էին աբխազական անձնագրով մեկնել միայն մի երկիր՝ Ռուսաստան։
Ընդ որում, նորամուծությունը վերաբերում է ոչ միայն աբխազներին, այլև երկքաղաքացիություն ունեցող բոլոր ռուսներին։ Օրենսդրության մեջ կատարված փոփոխությունների համաձայն՝ երկու և ավելի անձնագրեր ունեցող ՌԴ քաղաքացիները դիտարկվում են որպես ՄԻԱՅՆ ռուսներ՝ անկախ իրենց բնակության վայրից։ Նրանց երկրորդ/երրորդ քաղաքացիությունը «հաշվի չի առնվում»:
Աբխազիայի բնակիչներին ամենաշատը զայրացրել է այն փաստը, որ Ռուսաստանը հրաժարվում է «ընդունել» իրենց անձնագրերը։ Իսկ այն փաստը, որ նոր օրենքը տարածվում է ոչ միայն իրենց, այլև երկքաղաքացի հանդիսացող մյուս անձանց վրա, նրանց ոչ մի կերպ չի հանգստացնում։
Արդեն իսկ գրանցվել են մի քանի դեպքեր, երբ ռուս սահմանապահները մարդկանց թույլ չեն տվել սահմանը հատել աբխազական անձնագրով։
Աբխազիայի արտգործնախարար Սերգեյ Շամբան փորձել է հանգստացնել հանրությանը` հույս հայտնելով, որ սա ժամանակավոր իրավիճակ է, շուտով ամեն բան նույնը կլինի։
Նա հղում է կատարել այն փաստի վրա, որ սահմանի հատման ռեժիմը կարգավորվում է 2008 թվականին ստորագրված առանց վիզայի ճանապարհորդության մասին միջկառավարական համաձայնագրով։ Ըստ այդ համաձայնագրի՝ Աբխազիայի քաղաքացիները կարող են հատել սահմանը՝ օգտագործելով իրենց անձը հաստատող փաստաթղթերից մեկը՝ կա՛մ աբխազական, կա՛մ ռուսական անձնագիր:
