Ռասիստական երթն ԱՄՆ-ում արյունոտ անկարգություններ է առաջացրել
REUTERS/Stephen Lam
Շաբաթ օրն ամերիկյան Շարլոթսվիլ քաղաքում արյունոտ բախումներ են տեղի ունեցել սպիտակ ազգայնականների և նրանց հակառակորդների միջև: Պատճառը կոնֆեդերատներին (19-րդ դարի ԱՄՆ քաղաքացիական պատերազմի մասնակիցներ, որոնք հանդես էին գալիս ստրկության պահպանման օգտին) նվիրված արձանի ապամոնտաժումն է (New York Times):
Գեներալ Լիի արձանի ապամոնտաժման դեմ ակցիան, որը վաղուց էր պլանավորվել սպիտակ ազգայնականների կողմից, արագ վերածվել է ռասիստականի: Ցուցարարները աֆրոամերիկացիների դեմ և հակահրեական կարգախոսներ էին վանկարկում:
Քաղաքում միանգամից հակացույց սկսվեց, որին մասնակցում էին նրանք, ովքեր դեմ են հանդես գալիս սպիտակ ազգայնականների նման գաղափարներին: Հետևեցին բախումներ և կռիվներ: Իսկ շաբաթ օրն արտակարգ միջադեպ տեղի ունեցավ. ռասիզմի դեմ բողոքող ցուցարարների ամբոխի մեջ մեծ արագությամբ մեքենա մխրճվեց:
Արդյունքում՝ մեկ մարդ զոհվեց, 19-ը՝ վիրավորվեց: Սպանության և ծանր մարմնական վնասվածքներ հասցնելու մեղադրանքով կալանավորվել է 20-ամյա Ջեյմս Ֆիլդսը:
Անկարգությունների ժամանակ վիրավորվածների ընդհանուր թիվն արդեն հասել է 34-ի:
Շարլոթոսվիլում արտակարգ իրավիճակ է հայտարարված, քաղաք երեկ Ազգային գվարդիայի ստորաբաժանումներ են մտցվել:
Ամբողջ պատմությունը սկսվել է փաստացի մեկ տարի առաջ, երբ տեղի համալսարանի աֆրոամերիկացի ծագման մի խումբ ուսանողներ ստորագրահավաք են կազմակերպել գեներալ Լիի հուշարձանն ապամոնտաժելու պահանջով, որը քաղաքացիական պատերազմի ժամանակ կոնֆեդերատների զորքերի հրամանատարն էր:
Քաղաքային խորհուրդն արդյունքում կողմ քվեարկեց հուշարձանի ապամոնտաժմանը, սակայն դատարանը որոշեց դադարեցնել ապամոնտաժումը: Սպիտակ ազգայնականները հավաք կազմակերպեցին, որպեսզի նշեն դատարանի այդ որոշումը: Եվ հենց այդ հավաքույթն էլ անկարգություններ էր առաջացրել:
REUTERS/Stephen Lam
Շարլոթսվիլի իրադարձությունները ժամանակային առումով վերջինն են կոնֆեդերատների արձանի ապամոնտաժման շուրջ ծավալվող իրադարությունների շարքում: Շատ ամերիկացի փորձագետներ ասում են, որ այդ հարավային նահանգում լարվածության լրացուցիչ փաստ է դարձել Թրամփին նախագահ ընտրելը, որ մեծ ժողովրդականություն է վայելում սպիտակ ազգայնականների շրջանում:
Կու-կլուքս-կլանի տեղական բաժնի նախկին առաջնորդը Շառլոթոսվիլում կրկին լրագրողներին օգոստոսի 12-ին հայտարարել է.
Նախագահ Թրամփը կտրուկ քննադատության է արժանացել տեղի ունեցածին ոչ բավարար կերպով արձագանքելու համար: Նա ընդամենը քննադատել է Շարլոթսվիլում տեղի ունեցած բռնությունը, սակայն չի նշել հստակ կազմակերպություններ, որոնք կանգնած են սպիտակ ազգայնականների այդ ելույթների ետևում:
Այսօր իրավիճակը քաղաքում ավելի հանգիստ է: Սակայն սպիտակ ազգայնականների առաջնորդներից մեկը՝ Ռիչարդ Սփենսերը առցանց ուղերձ է հրապարակել, որում խոստացել է վերդառնալ իր գաղափարի իրականացմանը:
