«Հայաստանի՝ ՀԱՊԿ-ից դուրս գալը կմոտեցնի Ուկրաինայի հաղթանակը»․ կարծիք
Ռազմական աջակցություն Ֆրանսիայից
«Եթե հայերը հիմա դեմարշ անեն և դուրս գան ՀԱՊԿ-ից, դա շատ մեծ ազդեցություն կունենա Ուկրաինայում պատերազմի վրա, կմոտեցնի հաղթանակը, կփրկի հազարավոր կյանքեր»,- կարծում է հայ քաղաքագետ Անդրիաս Ղուկասյանը։
Նրա խոսքով՝ Ռուսաստանի անվտանգային համակարգից դուրս գալն իր գինն ունի, բայց Արևմուտքը «պատրաստ է հատուցել Հայաստանի ծախսերը, փակել վնասները, օժանդակել անվտանգության համակարգը վերականգնելու հարցում»։ Այս հնարավորությունն, ըստ վերլուծաբանի, պետք է հասցնել օգտագործել․
«Մեկ-երկու տարի հետո, երբ Ուկրաինան հասնի տեսանելի, շոշափելի արդյունքի, այդ ժամանակ մեր ծախսերը ոչ ոք չի հատուցի, մեր դիրքի փոփոխությունը ոչ մի քաղաքական արժեք չի ունենա։ Հիմա ունի, մեծ նշանակություն ունի»։
Factor TV-ի եթերում քաղաքագետը խոսել է նաև Ֆրանսիայի հետ ռազմական համագործակցության մասին՝ նկատելով, որ հայ համայնքի հետ հանդիպման ժամանակ նախագահ Մակրոնը հենց այդ մասին էր ակնարկում։
JAMnews-ն առանձնացրել է Անդրիաս Ղուկասյանի հարցազրույցի կարևորագույն դրվագները
Ռուսաստան կամ Թուրքիա. երկընկտրա՞նք, թե՞ քարոզչություն
Անդրիաս Ղուկասյանի խոսքով՝ այն թեզը, թե Հայաստանն ու տարածաշրջանը ոչ մեկին պետք չեն, այստեղ Ռուսաստանը պետք է ներկայացված լինի կամ Թուրքիան, ռուսական քարոզչություն է։
Քաղաքագետի գնահատմամբ՝ Թուրքիայի նպատակը հայերի ինքնիշխանությունը ռուսների միջոցով վերացնելն է՝ Հայաստանը ՌԴ-ին միացնելու ճանապարհով։
«Թուրքիայի ծրագիրը Հայաստանի անկախությունը վերացնելն է»,- հայտարարել է նա և հավելել, որ չկան այնպիսի պայմաններ, որոնց բավարարման արդյունքում Թուրքիան և Ադրբեջանը կգնան Հայաստանի հետ խաղաղության։
«Ֆրանսիան պատրաստ է Հայաստանի հետ ռազմական գործակցության»
«Ալիևի վրա ես ավելի շատ ճնշում եմ գործադրել և ավելի շատ ճնշում եմ գործադրելու, քան ինքը՝ Փաշինյանը։ Հարցը Փաշինյանն է, Արցախի հարցում ես միակն եմ, որ հստակ դիրքորոշում և ուղերձ ունեմ»,- հունիսի վերջին Մարսելի հայ համայնքի հետ հանդիպման ժամանակ նման արձանագրում էր արել Էմանուել Մակրոնը։ Այդ մասին տեղեկություն էր հրապարակել ՀՅԴ մամուլի ծառայությունը։
Ելիսեյան պալատը այս հանդիպման մասին տարածվող լուրերը չի հերքել, չի էլ հաստատել։ Ղուկասյանը կարծում է՝ նման բան իսկապես հնչել է։ Ասում է՝ Մակրոնը մատնացույց արեց՝ «հայկական շահերն առաջ տանելու համար լրջագույն պրոբլեմը հենց Հայաստանի ղեկավարի դիրքորոշումներն են»․
«Ֆրանսիան ստիպված է ասել՝ ձեր իշխանություններն են խնդիրը, մենք պատրաստ ենք օժանդակել, հենարան, հնարավորություն չկա, կոպիտ ասած՝ միակողմանի ինչ կարող ենք, անում ենք»։
Ուշադրություն է հրավիրում նաև այն հանգամանքի վրա, որ Ֆրանսիայի նախագահը խոսել է նաև Հայաստանում ռազմական կցորդ նշանակելու մասին։
«Դրանով Սփյուռքի ներկայացուցիչներին՝ Ֆրանսիայի քաղաքացիներին ապացուցում է, որ Ֆրանսիան պատրաստ է ընդհուպ մինչև ռազմական օժանդակություն ցուցաբերել Հայաստանին»,- հայտարարել է նա։
Ղուկասյանը կարծում է, որ եթե ռազմական համագործակցության առումով առաջընթաց դեռևս չկա, դա ոչ թե Ֆրանսիայի, ԱՄՆ-ի կամ Եվրամիության, այլ Փաշինյանի կառավարության պատճառով է։
Քաղաքագետի գնահատմամբ՝ Արևմուտքի հետ Հայաստանի հարաբերությունները «տապալված» են, գտնվում են ամենացածր մակարդակի վրա։
Ըստ Ղուկասյանի՝ կյանքը թելադրում է ձեռնարկել քայլեր, որոնք ինքն առաջարկում էր դեռևս 2021 թվականին, այն է՝ զարգացնել հայ-ֆրանսիական ռազմական կապերը և այդ կերպ փոխարինել ՌԴ հետ համագործակցությունը։
Ինչո՞ւ են Բաքվում բուռն քննադատում Ֆրանսիային
Պատասխանելով հարցին, թե «ի՞նչ վտանգ կարող է ներկայացնել Ֆրանսիան Ալիևի համար, որ այդպես բուռն քննադատում են»՝ Ղուկասյանը նկատել է՝ Ֆրանսիան հզոր բանակ ունեցող միջուկային պետություն է, խաղացող, որին անտեսելն անհնար է։ Մատնանշել է նաև այլ հանգամանքներ․
«Սեփականություն ունի Ալիևը Ֆրանսիայում, առնվազն կարող են դա առգրավել, իսկ դա քիչ չէ։ Ալիևի ընտանիքի անդամները բուժվում են Ֆրանսիայում, բազմաթիվ այլ հարցեր կան»։
Նախօրեին կայացած կառավարության նիստում վարչապետ Փաշինյանը հայտարարել էր՝ էթնիկ զտման ադրբեջանական քաղաքականության մաս է նաև այն միջազգային կազմակերպությունների և երկրների թիրախավորումը, որոնք օբյեկտիվ գնահատական են տալիս Լեռնային Ղարաբաղում ստեղծված հումանիտար ճգնաժամին և Ադրբեջանի գործողություններին: Օրինակ էր բերել ամիսներ շարունակ Ֆրանսիայի նկատմամբ տարվող լայնածավալ հակաքարոզչությունը։
«Ֆրանսիայի դեմ ուղղված քարոզչությունն այլ երկրների կողմից Լեռնային Ղարաբաղում հաստատված հումանիտար ճգնաժամին հասեցական հնարավոր գնահատականները կանխելն է»,- ընդգծել էր նա։
Հետևեք մեզ — Facebook | Youtube | Telegram
Ռազմական աջակցություն Ֆրանսիայից
