Ջեմալ Գամախարիա. «ԵՄ-ն և ՆԱՏՕ-ն պետք է ուշադրություն դարձնեն Սուխումի օդանավակայանին»
Ջեմալ Գամախարիան՝ Սուխումի օդանավակայանի մասին
Աբխազիայի Գերագույն խորհրդի նախագահ Ջեմալ Գամախարիան, ով արտաքսված է երկրից, հանդես է եկել մամուլի ասուլիսով և հայտարարել, որ վերականգնված Սուխումի օդանավակայանը կլինի լիովին ռուսական, ընդ որում՝ ոչ միայն քաղաքացիական, այլև ռազմական։ Նրա կարծիքով՝ միջազգային հանրությունը, Եվրամիությունը և ՆԱՏՕ-ն պետք է ուշադրություն դարձնեն դրան, քանի որ «[Ուկրաինայում] պատերազմը կավարտվի», և ռուսական ռազմական ինքնաթիռները հարձակման կանցնեն Եվրոպայի և ՆԱՏՕ-ի դեմ։
Գամախարիան նաև նշել է, որ Սուխումի օդանավակայանը սպասարկող հիմնական անձնակազմը ռուսներ են։ Իսկ աբխազներին, ըստ նրա, «այնտեղ ընդհանրապես ներս չեն թողնի»։
Սուխումի օդանավակայանը չի գործել 30 տարի՝ 1992-93 թթ․ վրաց-աբխազական պատերազմի ավարտից ի վեր։ 2023 թվականին հայտնի դարձավ, որ ռուսական «Ենթակառուցվածքների զարգացում» ՍՊԸ-ն զբաղվելու է օդանավակայանի վերակառուցմամբ։ 2025 թվականի փետրվարի 7-ին վերականգնված օդանավակայան փորձնական չվերթ կայացավ Մոսկվայից։ Օդանավում էին 21 ուղևորներ, այդ թվում՝ Աբխազիայի նախագահի թեկնածու Բադրա Գունբան։ Քաղաքացիական ավիացիայի միջազգային կազմակերպությունը (ICAO) Սուխումի օդանավակայանը միջազգային չի ճանաչում, քանի որ Աբխազիան չճանաչված պետություն է։ Համապատասխանաբար, այդ օդանավակայանով չեն կարող իրականացվել միջազգային չվերթներ՝ բացի ռուսականից։
Ջեմալ Գամախարիա
«Չպետք է մոռանալ, որ սա ոչ միայն քաղաքացիական, այլև ռազմական օդանավակայան է՝ համաձայն Սուխումի և Մոսկվայի միջև ստորագրված համաձայնագրի։ Համապատասխանաբար, աբխազներին այնտեղ ընդհանրապես չեն թողնի։ Սա կլինի լիովին ռուսական օդանավակայան, ընդ որում՝ ոչ այնքան քաղաքացիական, որքան ռազմական։
Այդ պատճառով վստահ եմ, որ ոչ միայն մեր [վրացական] կառավարությունը, այլև միջազգային հանրությունը, Եվրամիությունը և ՆԱՏՕ-ն պետք է ուշադրություն դարձնեն դրան։ Որովհետև պատերազմը կավարտվի, և այստեղի ռազմական ինքնաթիռներն ավելի շատ կուղղվեն Եվրոպայի և ՆԱՏՕ-ի դեմ, քան մեր։ Այստեղ լուրջ ռազմական բազա կլինի»։
