Պուտինի կուսակցությունը հաղթում է ընտրություններում, Google-ն ու Apple-ն՝ ընդդեմ ռուսական ընդդիմության
Պուտինի կուսակցությունը հաղթում է Ռուսաստանում կայացած ընտրություններում
Ռուսաստանում Պետդումայի ընտրություններում, ինչպես և ակնկալվում էր, հաղթել է «Միասնական Ռուսաստան» իշխող կուսակցությունը։ Ըստ նախնական արդյունքների՝ Դումայում ևս չորս կուսակցություն ներկայացված կլինի։ Ընտրություններից առաջ Ռուսաստանի իշխանությունը փորձել է սահմանափակել համացանցի տեղեկությունների հասանելիությունը քաղաքացիների համար, և դրանում նրան օգնել են համաշխարհային հսկաներ Google-ն ու Apple-ը։
Ռուսաստանում ավարտվել են եռօրյա խորհրդարանական ընտրությունները։ Ռուսաստանի Կենտրոնական ընտրական հանձնաժողովի նախնական արդյունքների համաձայն՝ սեպտեմբերի 20-ի առավոտվա դրությամբ իշխող կուսակցությունը ստացել է մոտ 48% ձայն։ Դումայում ներկայացված կլինեն նաև Կոմունիստական կուսակցությունը՝ 20% ձայնով, Լիբերալ-ժողովրդավարական կուսակցությունը՝ 7,6% ձայնով, Արդար Ռուսաստանը՝ 7,4% ձայնով։
- Նավալնի, Ուկրաինա, կիբերհարձակումներ․ ինչի՞ մասին են խոսել Բայդենն ու Պուտինը
- Դատապարտում և «տեղեկատվական ճակատ» Ռուսաստանի դեմ։ Ի՞նչ է որոշել «Մեծ յոթնյակի» հանդիպումը
«Ավանդական» խորհրդարանական կուսակցություններից զատ՝ Դումա կարող է անցնել նաև վերջերս ստեղծված «Նոր մարդիկ» կուսակցությունը, որը հիմնել է գործարար Ալեքսեյ Նեչաևը։ Քվեների 70%-ի հաշվարկի արդյունքում կուսակցությունը ստացել է մոտ 5,5%։
Միաժամանակ, Տելեգրամ-ալիքները հրապարակում են «ոչ պաշտոնական էքզիթ-փոլերի» արդյունքները, որոնց համաձայն՝ նոր Պետդումայում «Միասնական Ռուսաստանը» ստանում է 47% ձայն, Կոմունիստական կուսակցությունը՝ 19% ձայն։ Նրանցից բացի խորհրդարան են մտնում նաև «Ռուսաստանի կոմունիստներն» ու «Թոշակառուների կուսակցությունը», ինչպես նաև Լիբերալ-ժողովրդավարական կուսակցությունը, «Նոր մարդիկ», «Արդար Ռուսաստան» և «Յաբլոկո» կուսակցությունները։
Google-նու Apple-ն՝ ընդդեմ ռուսական ընդդիմության
Պետդումայի այս ընտրություններն աննախադեպ են ոչ թե իրենց արդյունքով կամ քվեարկության ընթացքով, այլ նրանով, որ ընտրություններից առաջ պետությանն առաջին անգամ հաջողվել է սահմանափակել համացանցի տեղեկությունների հասանելիությունը քաղաքացիների համար։
Ինչպես հաղորդում է ռուսական «Նովայա գազետան», սեպտեմբերի 16-ի գիշերը տեղի է ունեցել «ռուսաստանյան համացանցի համար պատմական» իրադարձություն․ խոշոր փրովայդերները սկսել են արգելափակել Google Docs-ը՝ փաստաթղթերի հետ աշխատանքի առանցքային գործիքը, որը Ռուսաստանում օգտագործում են ժամանակակից բիզնեսում ներգրավված միլիոնավոր մարդիկ՝ մարքեթինգից մինչև կրթություն։
Google-ի մեղքն այն էր, որ հենց այդ հարթակում էին ռուսական ընդդիմության առաջնորդ Ալեքսեյ Նավալնու համախոհները հրապարակում «Խելացի քվեարկության» ցանկը, որը քաղաքացիների բողոքի համախմբված կամարտահայտման համար խորհուրդներ էր պարունակում։
«Խելացի քվեարկության» էությունը, որը մշակել են Նավալնու համախոհները դեռևս 2019 թ-ին, «բողոքի ձայների» համախմբումն է՝ հօգուտ ընդդիմադիր թեկնածուների, որոնք հաղթելու փոքր շանսեր ունեն։ Ընդ որում, պարտադիր չէ, որ այդ թեկնածուն սատարի ժողովրդավարական ընդդիմության հայացքները։
Գլխավորը «Միասնական Ռուսաստանի» իշխանության մոնոպոլիան քանդելն է։ Անգամ եթե հաղթեն այսպես կոչված «համակարգային ընդդիմության» ներկայացուցիչները, որոնց իշխանությունը թույլ է տալիս մասնակցել ընտրություններին։
Նավալնին, որը կալանքի տակ է, ինչպես նաև նրա համախոհները չեն կարող մասնակցել ընտրություններին և քաղաքական կյանքին։ Նրանց չեն գրանցում որպես կուսակցություն, իսկ Նավալնու հետ կապված կազմակերպություններն էքստրեմիստական են հայտարարվել և արգելվել են։
Այդ պատճառով էլ «Խելացի քվեարկության» փորձագետներն առանձնացնում են այլ կուսակցությունների առավել ցանկալի թեկնածուներին այս կամ այն շրջանում, որն ունակ է հաղթելու իշխող կուսակցությանը, և քվեարկողներին կոչ են անում քվեարկել հենց նրա օգտին։
Ամենավիճելի և ռուսական ընդդիմության համար ամենացավոտ որոշումն այն էր, որ համաշխարհային հսկաներ Google-ն ու Apple-ը ջնջել են «Նավալնի» հավելվածը Google Play-ից և App Store-ից։
Ալեքսեյ Նավալնու համախոհ Իվան Ժդանովը հրապարակել է Apple-ի բացատրությունները։ Ընկերությունն ասում է, որ հավելվածի արգելափակման առիթը եղել է այն, որ Նավալնու՝ Կոռուպցիայի դեմ պայքարի հիմնադրամն էքստրեմիստական է ճանաչվել։ Ռուսական իշխանության վարկածով՝ հավելվածը պարունակում է «Ռուսաստանում արգելված բովանդակություն» և «թույլ է տալիս միջամտել ընտրություններին», հայտարարել է ընկերությունը։
Լցոնումներ, «կարուսելներ», նոր անձնագրեր
Ընդդիմությունն ու դիտորդները հաղորդում են եռօրյա քվեարկության ժամանակ տեղի ունեցած բազմաթիվ խախտումների մասին։ Այդ թվում՝ այսպես կոչված «կարուսելների», քվեարկության հարկադրանքի հատկանիշների, քվեաթերթիկների լցոնումների, դիտորդների աշխատանքի խոչընդոտման և բողոքների դիտարկումից հրաժարվելու մասին։
«Կավկազսկի ուզել» պարբերականը հաղորդում է շուրջ 200 անձանց մասին, որոնց ընտրությունների առաջին օրն ուկրաինական Դոնբասից բերել են Ռոստովի շրջանի Կարմիր Սուլին բնակավայր՝ քվեարկության։ Նրանցից շատերին անձնագրեր են բաժանել հենց քվեարկությունից առաջ։
Կեմերովոյի ընտրատեղամասերից մեկում տեսախցիկը նկարահանել է քվեաթերթիկների լցոնումը․ կինը փորձում է տեսախցիկից թաքցնել ձեռքը, որը քվեատուփի մեջ է լցնում քվեաթերթիկների տրցակը։
Պուտինի քվեարկությունը
Սեպտեմբերի 17-ին տեսանյութ է հայտնվել, որում նախագահ Վլադիմիր Պուտինն առցանց է քվեարկում։ Ընտրություններից մի քանի օր առաջ Կրեմլը հայտարարել է, որ նախագահը մեկուսացել է, քանի որ նրա շրջապատում շատ են կորոնավիրուսով վարակվածները։
Պուտինի քվեարկության կադրերը վրդովել են սոցցանցերի օգտատերերին։ Օրինակ՝ տեսանյութում չկա անհրաժեշտ SMS-վավերացման պահը։ Իսկ քանի որ նախագահը հանրային կերպով հայտարարում էր, որ բջջային հեռախոս չունի, նա հազիվ թե կարողանար ստանալ հաստատման կոդը, որն ուղարկվում է անձնական հեռախոսահամարին։ Կրեմլում փաստերի չհամընկնումը փորձել են բացատրել նրանով, որ Պուտինն օգտվել է օգնականի հեռախոսից։
Բացի այդ, տեսագրությունում երևում է նախագահի Blancpain Leman Grande Date ժամացույցը․ թվահարթակի օրացույցում նշված է 10 թիվը։ Ընդ որում, տեսանյութը հրապարակվել է քվեարկության առաջին օրը՝ սեպտեմբերի 17-ին։ Սեպտեմբերի 10-ին նախագահը չէր կարող քվեարկել․ այս տարի վաղաժամ առցանց քվեարկություն նախատեսված չէ։
Նախագահի մամուլի քարտուղարը ժամացույցի սխալ ամսաթիվը բացատրել է նրանով, որ Պուտինը չի օգտվում այդ գործառույթից։
