Պատվաստումն Ադրբեջանում․ ինչի՞ց են դժգոհ մարդիկ
Արդեն երկուս ու կես ամիս է, ինչ Ադրբեջանում կորոնավիրուսի դեմ պատվաստում է իրականացվում։ Մինչ օրս պատվաստվել է ավելի քան կես միլիոն մարդ։ Սակայն հասարակությունում պատվաստման մասին կարծիքները դեռևս ոչ միանշանակ են։ Կան մարդիկ, որոնք գործընթացին կասկածանքով են վերաբերվում, սակայն մարդիկ էլ կան, որոնք կողմ են պատվաստմանը, բայց դժգոհ են գործընթացի կազմակերպումից։ Ոմանք էլ հակառակն են պնդում․ նրանց կարծիքով, ամեն ինչ նորմալ է անցնում։ Ինչի՞ց են դժգոհ մարդիկ։
Ադրբեջանում կիրառվում է չինական արտադրության Sinovac պատվաստանյութը։ Պաշտոնական տվյալներով՝ այդ պատվաստանյութի չորս միլիոն դեղաչափի մատակարարման պայմանագիր է կնքվել։ Դա բավական է երկրում երկու միլիոն մարդ պատվաստելու համար։
Ովքե՞ր են պատվաստվում
Այժմ Ադրբեջանում պատվաստման չորրորդ փուլն է ընթանում։ Պատվաստումն անվճար է և լիովին ինքնակամ։
2021 թ-ի հունվարի 18-ին մեկնարկած առաջին փուլում պատվաստվել են բժիշկներն ու իրավապահ մարմինների աշխատակիցները, որոնք զբաղվում են կարանտինային ռեժիմի պայմանների պահպանմամբ։
Երկրորդ փուլն ընդգրկել է 65 տարեկանից, երրորդը՝ 50-ից, ընթացիկ չորրորդը՝ 40-ից բարձր տարիքի անձանց։
Ինչպե՞ս է անցկացվում պատվաստումը
Յուրաքանչյուր քաղաքացի, որը ներառվում է վերոհիշյալ խմբերից մեկում, կարող է այցելել հատուկ ստեղծված կայք, որտեղ կարող է ընտրել պատվաստման վայրը, ամսաթիվն ու հստակ ժամը։
Ընդ որում, անպայման չէ այն բուժհաստատությունն ընտրելը, որին բնակիչը կցված է՝ ըստ բնակության վայրի։
Քաղաքացին ինքն է ընտրում պատվաստման առաջին ներարկման օրն ու ժամը, իսկ երկրորդի օրն ու ժամն ավտոմատ կերպով է որոշվում, և մարդը sms-հաղորդագրություն է ստանում այդ մասին։
Ինչպե՞ս է կատարվում պատվաստումը
Պատվաստման ընթացակարգը Facebook-ում մանրամասն նկարագրել է JAMnews-ի աշխատակիցներից մեկը․
«Այսօր պատվաստվել եմ պոլիկլինիկայում (առաջին դեղաչափ)։
Ամեն ինչ նորմալ էր, քաղաքակիրթ ձևով և առանց որևէ հերթի (նախապես ժամ էի ընտրել)։
Մտա պոլիկլինիկայի շենք, և ձեռքերս ախտահանելուց և ջերմությունս չափելուց հետո ինձ տարան զննումների սենյակ։ Այնտեղ չափեցին ճնշումս, հարցրին ալերգիկ արձագանքների և քրոնիկ հիվանդությունների մասին։ Այնուհետև տարան գրանցման սենյակ, որտեղ անունս ավելացված էր հաշվառման համակարգում։ Այդ ամենից հետո մտա ներարկումների սենյակ, և պատվաստանյութի ներմկանային ներարկում արեցին։ Դրանից առաջ իմ աչքի առաջ հատուկ արկղից հանեցին սրվակը, մեկանգամյա ներարկիչով քաշեցին պարունակությունը։
Ներարկումից հետո խնդրեցին կես ժամ սպասել՝ համոզվելու համար, որ պատվաստումից հետո շոտ չկա։ 30 րոպե սպասելուց հետո տուն գնացի։
Մնաց սպասել երկրորդ դեղաչափին»։
Հերթեր և «անհայտ» պատվաստանյութ
Սակայն ոչ բոլոր պոլիկլինիկաներում է ամեն ինչ այդքան հարթ ընթանում։ Լրագրող Նաիլա Բալաևան պատմել է իր և ամուսնու հետ կատարված պատմությունը, երբ պատվաստման համար նրանք տարածքային պոլիկլինիկա են գնացել։
Լրագրողի խոսքով՝ չնայած նրան, որ իրենք պատվաստման համար հստակ ժամ էին ընտրել, պոլիկլինիկայում ստիպված են եղել հերթ կանգնել։
«Օպերատիվ շտապի հրահանգների համաձայն՝ պատվաստման ժամ ընտրեցինք մեզ համար։ Սակայն պոլիկլինիկա գալուց հետո տեսանք, որ միջանցքներում լիքը մարդ կա։ Դիմեցինք դռան մոտ կանգնած կնոջը, մեզ ճմռթած թղթեր տվեցին մեր հերթի համարներով՝ 48 և 49։ Եվ հավելեցին, որ, անկախ կայքում գրանցվելուց, այստեղ «կենդանի» հերթ է», — գրում է Բալաևան։
Լրագրողը նշել է նաև, որ պատվաստանյութի սրվակն իր աչքի առաջ չեն բացել, և ինքն անգամ չի տեսել, թե ինչպես են այն սրվակից քաշում ներարկիչով․ «Հարցրի այդ մասին, բայց ինձ ասացին, որ ես ստում եմ, պատվաստանյութն իմ աչքի առաջ են բացել։ Մի խոսքով, այդպես էլ չիմացա՝ արդյոք ինձ պատվաստանյութ են ներարկել, թե սովորական ջուր, վստահ չեմ նույնիսկ, որ այդ ներարկիչն ինձնից առաջ չեն օգտագործել»։
Բալաևան հավելել է, որ բուժհաստատության ղեկավարության դեմ իր բողոքին նույնպես ոչ ոք ուշադրություն չի դարձրել։
Պատվաստանյութի մեկ սրվակ՝ երկուսի համա՞ր
Հայտնի լրագրող Այնուր Էլգյունեշը սոցցանցի իր էջում տեղադրել է բժիշկների նախազգուշացումը, որոնք ցանկացել են անանուն մնալ։
«Ուզում եմ ձեզ փոխանցել այն մարդկանց նախազգուշացումը, որոնք չեն կարող արտահայտվել՝ աշխատանքը կորցնելու վախից։
Նրա խոսքով՝ ինքը պատվաստման առաջին փուլն անցել է բոլոր կանոններին համապատասխան, այսինքն՝ բժիշկներին և մյուսներին ամբողջ դեղաչափն են ներարկել։ Իսկ հիմա պոլիկլինիկաները չեն ստանում պատվաստանյութի հարկ եղած քանակը, և նրանց ասում են, որ դրանով բավարարվեն։ Այդ պատճառով էլ պատվաստանյութի մեկ չափաբաժինը երկու մասի է բաժանվում և երկու հոգու ներարկվում։ Դեպքեր են եղել անգամ, երբ բժիշկները մարդկանցից ուղղակիորեն հարցրել են՝ նրանց իրո՞ք պատվաստանյութն է պետք, թե՞ տեղեկանքը, որ պատվաստվել են», — գրել է Էլգյունեշը Facebook-ի իր էջում։
Նրա խոսքով՝ բժիշկները պնդում են, որ պատվաստանյութի մի մասը փոխանցվում է մասնավոր հիվանդանոցներին, այդ պատճառով էլ պակասորդ է առաջանում։
«Իհարկե, մենք չենք կարող պայքարել նվաստների այս ոհմակի դեմ։ Բայց եկեք փորձենք։ Օրինակ՝ պահանջեք, որ սրվակը բացեն ձեր աչքի առաջ», — խորհուրդ է տվել լրագրողը։
Մեկնաբանություններ
Սոցցանցերի ադրբեջանական տիրույթում պատվաստումն ամենաքննարկվող թեմաներից է։ Ահա մի քանի բնորոշ մեկնաբանություն․
«Սպասել եմ ընդամենը 10 րոպե, բայց ինձ ասացին, որ ոստիկանությունը թույլ չի տալիս պատվաստման ընթացքը լուսանկարել»։
«Եթե խելք ունեք, պատվաստում մի արեք։ Որովհետև կորոնավիրուս չկա, և այս ամենը սուտ է»։
«Երկիրն ինքը լուրջ պատվաստման կարիք ունի»։
