Պատերազմի և համավարակի օրերին Հայաստանի պաշտոնյաները 15 մլն դոլարի պարգևավճար են ստացել

Վերջին շրջանում Հայաստանում ժամանակ առ ժամանակ սկանդալներ են տեղի ունենում պաշտոնյաներին խոշոր պարգևավճարների տրամադրման շուրջ։ Այս իրավիճակը սկսվել է 2018 թ-ի «թավշյա հեղափոխության» առաջնորդ Նիկոլ Փաշինյանի թիմի իշխանության գալուց հետո։ Շատերը կարծում են, որ այժմ պետական ծառայողները չափազանց շռայլ պարգևավճարներ են ստանում։

Հերթական սկանդալը տեղի է ունեցել մարտի 23-ին խորհրդարանի նիստի ընթացքում։ «Լուսավոր Հայաստան» ընդդիմադիր խմբակցության պատգամավոր Աննա Կոստանյանն իր ելույթի ժամանակ հայտարարել է, որ 2020 թ-ի ընթացքում Պետեկամուտների կոմիտեի աշխատակիցները և վարչապետի աշխատակազմը մոտ 15 մլն դոլարի պարգևավճարներ են ստացել։

Այս տեղեկությունը հերթական սկանդալն է դարձել և միանգամից տարածվել սոցցանցերում, քանի որ նախորդ տարին տնտեսական տեսանկյունից բավական ծանր էր երկրի համար։

Մարտից Հայաստանը պայքարում էր կորոնավիրուսի համավարակի դեմ, այն ժամանակ հայտարարված լոքդաունից երկիրը դեռ ուշքի չի եկել, շատերը կորցրել են աշխատանքն ու ապրուստի միջոց չունեն։ Իսկ աշնանը տնտեսության վրա իր բացասական անդրադարձն ունեցավ Արցախյան երկրորդ պատերազը։

Սակայն «Իմ քայլը» իշխող դաշինքի ներկայացուցիչ և խորհրդարանի փոխխոսնակ  Ալեն Սիմոնյանը, մեկնաբանելով ընդդիմադիր պատգամավորի ելույթը, հայտարարել է, որ պետական կառույցների աշխատակիցներին պարգևավճարների տրամադրումը շարունակվելու է։

• «Հաստատուն քայլերով»․ Հայաստանում բենզինի գները կարող են նոր հակառեկորդ սահմանել
• Զանգվածային արտագաղթ Հայաստանից․ ինչո՞ւ են մարդիկ հեռանում, և ի՞նչ է լինելու

Ով որքան է ստացել

Աննա Կոստանյանը հայտարարել է գումարների չափը, որոնք վճարվել են տարբեր պետական կառույցների աշխատակիցներին որպես պարգևավճար։

Մասնավորապես, Պետեկամուտների կոմիտեն, ըստ ընդդիմադիր պատգամավորի, «համավարակի և պատերազմի պայմաններում» 6,8 մլրդ դրամի պարգևավճար է ստացել։

Վարչապետի աշխատակազմը 2020 թ-ին ստացել է 441 մլն դրամի պարգևավճար։

«Ֆինանսների նախարարը, որի պահպանության տակ է երկրի ողջ գանձապետարանը, նույնպես զերծ չի մնացել պատերազմի թեժ պահին ինքն իրեն պարգևավճար գրելուց․ մոտ 73 մլն դրամ», — հայտարարել է Աննա Կոստանյանը։

Պատգամավորն ընդգծել է, որ այդ գումարով Արցախյան երկրորդ պատերազմի ժամանակ երկիրը կարող էր բանակի համար ռազմական տեխնիկա գնել, մասնավորապես՝ անօդաչու թռչող սարքեր։

Իշխող դաշինքի արձագանքը

Կոստանյանի ելույթին արձագանքել է «Իմ քայլը» իշխող դաշինքի ներկայացուցիչ, խորհրդարանի խոսնակ Ալեն Սիմոնյանը։

Նրա խոսքով՝ ՊԵԿ և ֆինանսների նախարարության աշխատակիցներն արդյունավետ աշխատում և նպաստում են բյուջեի մուտքերին․

«Հայաստանում այսօր աշխատավարձերը չեն ուշացնում, համակարգային կոռուպցիա չկա, հարկերի հավաքագրումն արդյունավետ է տեղի ունենում։ Եվ եթե պետական կառույցները լավ են կատարում իրենց աշխատանքը, ապա դրանց աշխատակիցները պետք է պարգևավճար ստանան»։

Փոխխոսնակը հայտարարել է, որ պարգևավճարների տրամադրումը շարունակվելու է։ Պարգևավճարներ են ստանալու նաև իրավապահ մարմինների աշխատակիցները։ Այդ կերպ նա արձագանքել է նաև ընդդիմադիր քաղաքական գործիչների այն մեղադրանքներին, որ ոստիկանները 2021 թ-ին արդեն երկու անգամ պարգևավճար են ստացել՝ նրանց կարծիքով, ընդդիմության հանրահավաքներին կարգուկանոնի պահպանման համար։

«Վերջերս այդ 17 գործընկերների ներկայացուցիչներց մեկը [խոսքն ընդդիմադիր կուսակցությունների առաջնորդների մասին է, որոնք 2020 թ-ի աշնանից միավորվել են վարչապետ Փաշինյանի հրաժարականի պահանջի շուրջ և բողոքի փողոցային ակցիաներ են անցկացնում] ասում է, ոստիկաններին պարգևավճարներ ենք տվել։

Ճիշտ ենք արել, ավելի շատ պետք է տանք ոստիկաններին։ Դուք այնտեղ կանգնած մարդկանց գումար չեք բաժանո՞ւմ [խոսքը ընդդիմության կողմնակիցների մասին է, որոնք փետրվարի վերջից արգելափակել են խորհրդարանի մուտքերն ու գիշերում են վրաններում]։ Օղի ու ուտելիք չեք բաժանո՞ւմ», — վրդովվել է Սիմոնյանը։