Մինչև 2022 թվականի հունիս դեպի Ստեփանակերտ խմելու ջուր կհոսի նաև Պատարա գետից: Խողովակաշարի կառուցումը թույլ կտա քաղաքի բնակիչներին ապահովել շուրջօրյա խմելու ջրով: Այս մասին տեղեկանում ենք Արցախի նախագահի աշխատակազմից:
Այսօր ԱՀ նախագահ Արայիկ Հարությունյանն Ասկերանի շրջանում աշխատանքային շրջայց է կատարել, որի շրջանակներում ծանոթացել է նաև տարվող աշխատանքներին: Ընթանում են գետից դեպի մայրաքաղաքի ջրամատակարարման համակարգ տանող խողովակաշարի կառուցման աշխատանքները:
Ընդգծենք, որ խողովակաշարի կառուցումը թույլ կտա երաշտի պայմաններում Ստեփանակերտի բնակիչներին ապահովել շուրջօրյա խմելու ջրով: Սա ջրամատակարարման խնդրի լուծման ուղղությամբ ձեռնարկված միակ քայլը չէ: Նախապատրաստական աշխատանքներ են տարվում նաև Պատարայի ջրամբարի կառուցման ուղղությամբ: ԱՀ նախագահը հանձնարարել է արագ ավարտել դրանք ու սկսել ակտիվ շինարարության փուլը:
«Հանրապետության ամենախոշոր և իր նշանակությամբ չափազանց կարևոր տնտեսական նախագծի՝ Պատարայի ջրամբարի կառուցման նախագիծը կյանքի կոչելով վերջնականապես կլուծվի մայրաքաղաք Ստեփանակերտի ջրամատակարարման հարցը, ինչպես նաև Ասկերանի շրջանի մի շարք համայնքներ կապահովվեն խմելու և ոռոգման ջրով», — ասված է ԱՀ նախագահի աշխատակազմի տարածած հաղորդագրությունում:
Հիշեցնենք, որ Արցախում պատերազմից հետո ջրային ռեսուրսների հետ կապված լուրջ խնդիրներ կան, որոնց միացել է նաև այս տարվա աննախադեպ շոգը: Օգոստոսի սկզբից մայրաքաղաք Ստեփանակերտի 40 տոկոսը տևական ժամանակ ջրազրկված էր: Մեկ շաբաթ առաջ, պատասխանատու «Ջրմուղ-կոյուղի» ընկերությունը հայտնեց, որ ջրազրկված է Ստեփանակերտի մոտ 20 տոկոսը՝ նշելով, որ մնացած հատվածներում ջրի խնդիր այլևս չկա:
Քաղաքի ջրազրկված հատվածներում ընկերությունը տեղադրել է բաքեր՝ որպես խնդրի ժամանակավոր լուծում: Այն թաղամասերում, որտեղ բաքերի տեղադրումն անհնար է եղել, բնակիչներին դույլերով են ջուր հասցնում:
