«Պատասխան եմ պահանջելու վիրավորանքի համար»․ վրացի օլիգարխի որդին՝ սկանդալային աուդիոձայնագրությունների մասին
Ռեփեր Բերա Իվանիշվիլին, որը «Վրացական երազանք» իշխող կուսակցության հիմնադիր և երկրի ոչ ֆորմալ ղեկավարի որդին է, առաջին մեկնաբանությունն է տվել այն բանից հետո, երբ աուդիոձայնագրությունները, որոնցում նա պահանջում է դպրոցականին պատժել իր հասցեին հնչեցրած քննադատության համար, հեռարձակվել են «Պիրվելի» հեռուստաալիքով։
Ձայնագրություններում լսվում են ձայներ, որոնք նման են Բերա Իվանիշվիլիի, վարչապետ Իրակլի Ղարիբաշվիլիի և Պետական անվտանգության ծառայության ղեկավար Անզոր Չուբինիձեի ձայներին։ Բերա Իվանիշվիլին հարցնում է, թե ինչպես է պատժվել դպրոցականը, որը վատաբանել է Բերային սոցցանցերում։
Ի՞նչ է ասել Բերան
Բերա Իվանիշվիլին հաստատել է աուդիոձայնագրությունների իսկությունն «Իմեդի» հեռուստաալիքին տված մեկնաբանությունում՝ ի տարբերություն իշխող թիմի անդամների և «Վրացական երազանքի» կողմնակիցների, որոնք արդեն մի քանի օր է՝ կրկնում են, որ այդ ձայնագրությունները կեղծ են։
Բերա Իվանիշվիլիի խոսքով՝ ձայնագրությունն արվել է 2011 թ-ին, երբ ինքը դեռ անչափահաս էր։
Սակայն Բերան ասել է, որ պատրաստ է նույն բանը կրկնել նաև այսօր և պատասխան կտա ցանկացածին, ով վատ արտահայտություններ կանի իր մոր հասցեին․
«Ես նույնիսկ չեմ վիճի, թե արդյոք այդ ձայնագրություններն արժանահավատ են։ Ինձ համար դա նշանակություն չունի, որովհետև ինձ համար այս ընթացքում ոչինչ չի փոխվել, ես պատրաստ եմ ուղիղ եթերում ասել, որ եթե որևէ մեկը վիրավորի մորս կամ վատ արտահայտվի ընտանիքիս մասին, որն ինձ համար ամենասուրբ և արժեքավոր բանն է, այսօր էլ կպատասխանեմ բոլոր վիրավորանքներին։ Ցույց տվեք ինձ մի վրացու, որն այլ կարծիքի է», — ասել է Բերա Իվանիշվիլին։
Իր հարցազրույցում Բերա Իվանիշվիլին ընդգծել է, որ բոլոր վրացի տղամարդիկ իրենց այնպես կպահեին, ինչպես ինքը․
«Մենք ապրում ենք Վրաստանում, որտեղ մոր պաշտպամունքն ու նրա նկատմամբ հարգանքը բոլորովին այլ մակարդակի վրա է։ Կարծում եմ՝ այն մարդը, որը չի ընդունում այդ արժեքները, չի սիրում իր մորը, պարզապես մեղք է», — ասել է Բերան։
Միլիարդատիրոջ որդին պնդում է, որ խոսակցությունը տեղի է ունեցել 2011 թ-ի ամռանը, երբ ինքը 16 տարեկան էր։ Այսինքն՝ իր հոր գլխավորած կուսակցության իշխանության գալուց առաջ։
Բերան ասում է, որ 2011 թ-ի ամռանն ինքն ու իր դեռահաս երկրպագուները Ֆեյսբուքում ծաղրի են ենթարկվել․ իրենց նույնիսկ սպառնացել են, այդ պատճառով էլ իրենք ստիպված են եղել դիմել Բերայի հոր օգնությանը։
«Ինձ ամենաշատն անհանգստացնում էր երկրպագուներիս՝ 10-11 տարեկան երեխաներին 100-200 հոգանոց խմբերի կողմից ծաղրի ենթարկելը․․․ Մեր պարտքն էր այդ մասին տեղյակ պահել անվտանգության ծառայությանը։ Նրանք այցելել են այդ մարդկանց և զգուշացրել՝ օրենքի և բարոյականության համաձայն․․․ Միայն բանավոր զգուշացումներ են եղել», — ասել է Բերա Իվանիշվիլին։
Բերա Իվանիշվիլին ընդդիմադիր «Միասնական ազգային շարժում» կուսակցությանն ու նախորդ կառավարությանը մեղադրել է այն բանի համար, որ նրանք այդ խոսակցությունը ձայնագրել են, այնուհետև՝ տարածել, ինչպես նաև սոցցանցերում սպառնալիքների և սադրանքների արշավներ կազմակերպել։
Անզոր Չուբինիձեն նույնպես մեկնաբանել է սկանդալային աուդիոձայնագրությունները։ Նա հաղորդել է, որ ձայնագրություններն արվել են 2010-2011 թթ-ին, երբ Բիձինա Իվանիշվիլին դեռ քաղաքական գործիչ չէր։ Չուբինիձեն խոստովանել է, որ իրոք զրուցել է դեռահասների հետ, որոնք համացանցում սպառնացել են Բերային։ Չուբինիձեի խոսքով՝ ինքն այն ժամանակ գլխավորում էր Բիձինա Իվանիշվիլիի ընտանիքի անվտանգության ծառայությունն ու պատասխատու էր նրա որդու անվտանգության համար։
Ի՞նչ է հետաքննելու մեղադրող կողմը
Վրաստանի դատախազությունը խոսակցության «չարտոնված ձայնագրությունների», ինչպես նաև «տեղեկությունների ապօրինի օգտագործման և տարածման» փաստերով (քրեական օրենսգրքի 158-րդ հոդված) հետաքննություն է սկսել։
Դատախազությունը փորձել է բարձրացնել հեռուստաալիքի կամ կոնկրետ լրագրողի պատասխանատվության հարցն այն առումով, որ նման նյութի հրապարակումը «միանշանակ լավագույն որոշումը չէր», հաղորդել է «Վրացական ժողովրդավարական նախաձեռնություն» հասարակական կազմակերպության ներկայացուցիչ Գիորգի Մշվենիերաձեն։
Նրա խոսքով՝ դատելով արձանագրությունների նյութերից՝ «հնարավոր հանցագործության» առկայության նշաններ կան, սակայն դատախազությունը գործն այս տեսանկյունից չի հետաքննում։
Մշվենիերաձեի խոսքով՝ եթե ձայնագրություններն արվել են 2014 թ-ից առաջ, ապա այսօր դրանց համար էլ չի ստացվի որևէ մեկին պատժել, քանի որ լրացել է վաղեմության վեցամյա ժամկետը։
Գնահատականներ
Հասարակության մի մասը կարծում է, որ Բերա Իվանիշվիլիի հարցազրույցը բռնության և քրեական ենթամշակույթի ուղղակի խրախուսում է։
Վրաստանի ժողովրդական պաշտպանի տեղակալ Գիորգի Բուրջանաձեն Ֆեյսբուքում գրառում է արել, որում հիշել է երկու աղմկահարույց գործ, երբ երկու դեռահաս է սպանվել հարաբերություններ պարզելու և «արժանապատվության պաշտպանության» հետևանքով։
«Խորավա փողոցի դեպքը (Թբիլիսի, 2018 թ․), երբ մի դեռահասը վիրավորել էր մյուսին, իսկ հետո երկուսը սպանվել էին, որովհետև վիրավորվածները պաշտպանել էին իրենց արժանապատվությունը։ Շաքարաշվիլիի գործը, երբ դեռահասները վեճի պատճառով, նույնպես պաշտպանելով իրենց արժանապատվությունը, 19-ամյա տղայի էին սպանել։ Երեխաներին և դեռահասներին նման դեպքերում պետք է սովորեցնել ոստիկանություն կամ պետական մարմիններ դիմել։ Ցանկացածն, ով ձեզ ասում է՝ «պաշտպանեք ձեր պատիվը», ըստ էության, սպանություն հրահրող է։ Շնորհավորում եմ բոլորին, ովքեր կենդանի են մնացել այսօր և կենդանի են մնացել այս երկրում․․․ Վաղը կարող եք հանդիպել մեկին, որը ձեզնից ավելի ուժեղ է և ազդեցիկ, և մահանալ․․․ Փառք ձեզ բոլորիդ, ովքեր իրենց քաղաքական կամ հանրային դերով խրախուսում են այս չարիքը»։
Ինչ վերաբերում է «Վրացական երազանք» իշխող կուսակցության ներկայացուցիչներին, ապա եթե նախկինում իրենց մեկնաբանություններում նրանք կասկածի տակ էին դնում այդ ձայնագրությունները, ապա Բերայի հարցազրույցից հետո միաձայն հայտարարել են, որ Իվանիշվիլիի որդին «պատվով» է գործել․
«Կարծում եմ, որ Բերայի ասածը հասկանալի է յուրաքանչյուր վրացու և յուրաքանչյուր տղամարդու։ Եթե մեկը վիրավորում է մեզ կամ մեր ընտանիքի անդամներին, իհարկե, մենք արձագանքում ենք։ Բերան պարզաբանումներ տվեց այդ առթիվ և ասաց, որ այդ ամենը հորինված չէ», — ասել է «Վրացական երազանքի» պատգամավոր Նոդար Տուրձելաձեն։
«Ես գրեթե 18 տարի ապրել եմ աշխարհի ամենազարգացած երկրներից մեկում։ Այնտեղ չեք գտնի մեկին, որը ձեզ այդպես կվիրավորի», — հայտարարել է իշխող կուսակցության պատգամավոր Միխայիլ Կավելաշվիլին։
