«Ոչ թե կոռուպցիայի դեմ պայքար, այլ սեփականության վերաբաշխում». կարծիք Թբիլիսիից
Պաշտոնյաների ձերբակալությունները Վրաստանում
Քաղաքագետ Գիա Խուխաշվիլին կարծիք է հայտնել Վրաստանի նախկին վարչապետ Իրակլի Ղարիբաշվիլիի անվան շուրջ ծավալվող կոռուպցիոն սկանդալի մասին։ Քաղաքագետի խոսքով՝ սա հանցավոր համաձայնության պատմություն է, քանի որ «բոլորին հայտնի էր, որ ողջ համակարգը հիմնված է կոռուպցիայի վրա»։
Քաղաքագետի դիտարկմամբ՝ սա կոռուպցիայի դեմ պայքար չէ, այլ սեփականության վերաբաշխման գործընթաց, որի կատալիզատորը դարձել է գործարար Լևան Ջանգվելաձեի գործը («օրենքով գող» Մերաբ Ջանգվելաձեի եղբայրը, որ սպանվել էր Թբիլիսիում 2025 թ․-ի մարտի 14-ին):
Իրակլի Ղարիբաշվիլին, որը երկու անգամ զբաղեցրել է Վրաստանի վարչապետի պաշտոնը, եղել է կուսակցության նախագահ և դրա հիմնադիր Բիձինա Իվանիշվիլիի հիմնական հովանավորյալը, հայտնվել է կոռուպցիոն սկանդալի կիզակետում։ Ղարիբաշվիլին արդեն հարցաքննվել է Պետական անվտանգության ծառայության (ԱԱԾ) կողմից, և ինչպես հայտնում է այդ ծառայությունը՝ «խոստովանել է, որ տարիներ շարունակ ապօրինի եկամուտներ է ստացել»։ Ավելի վաղ Ղարիբաշվիլիի տունը խուզարկել էին։
Ղարիբաշվիլիից բացի կոռուպցիոն սկանդալում ներգրավված են ևս երկու նախկին բարձրաստիճան պաշտոնյաներ՝ Պետական անվտանգության ծառայության նախկին ղեկավար Գրիգոլ Լիլուաշվիլին և գլխավոր դատախազ Օթար Փարցխալաձեն։ Նրանց տներում նույնպես անցկացվել են խուզարկություններ։
Գիա Խուխաշվիլիի մեկնաբանությունը
«Կառավարությունը կոռուպցիայի դեմ չի պայքարում, այլ լցնում է իր գանձարանը նրանց հաշվին, որոնց թույլ էր տալիս լցնել իրենց գրպանները։ Իշխանությունները քաղաքական որոշում են կայացրել, բանակցություններ են սկսել այդ մարդկանց հետ, հավանաբար մատնանշել են կոնկրետ թվեր՝ թե որքան գումար պետք է բերեն, նրանք չեն բերել, և դրանից հետո իշխանությունները ստիպված են եղել սպառնալիքը կյանքի կոչել և սկսել քրեական հետապնդում։
Հանրությանը հայտնի էր, որ այս մարդիկ կոռումպացված են և զբաղվում էին ապօրինի բիզնեսով։ Եվ հիմա խնդիրն այն չէ՝ կկալանավորե՞ն նրանց, թե՞՝ ոչ։ Նրանց կկալանավորեն, եթե իշխանությունների հետ համաձայնության չգան, հակառակ դեպքում՝ չեն կալանավորի։
Բոլորը գիտեին, որ Ղարիբաշվիլին ներգրավված էր կոռուպցիայի մեջ, բոլորը գիտեին, որ նա զբաղվում էր ապօրինի բիզնեսով, և նա մենակ չէր, ամբողջ համակարգը հիմնված է դրա վրա։ Ցանկացած ավտորիտար ռեժիմ հիմնված է կոռուպցիայի և անօրինական եկամուտների վրա, քանի որ ավտորիտարիզմը չի կարող գոյություն ունենալ առանց ապօրինի եկամուտների և կոռուպցիայի։ Այդ հրեշավոր համակարգը մշտական սնուցման կարիք ունի։
Ապօրինի եկամուտներ ստանալու ի՞նչ շանսեր կունենար Ղարիբաշվիլին, եթե վարչապետ չլիներ։
Կառավարության խնդիրը երբեք չի եղել կոռուպցիայի դեմ պայքարն ու Ղարիբաշվիլիին, Լիլուաշվիլիին կամ ուրիշներին բռնելը, այժմ էլ դա չէ։ Նրանց խնդիրն է վերադարձնել իրենց գումարները։ Թե ինչով կավարտվի այս պատմությունը՝ կախված է նրանից, թե ինչի շուրջ նրանք համաձայնության կգան։ Բանակցային գործընթացն արդեն վերջնական փուլում է, բայց այն շարունակվում է, դեռ չի ավարտվել։ Օրենքն օգտագործվում է ոչ թե կոռուպցիայի դեմ պայքարելու, այլ գումարները հարկադրաբար վերադարձնելու համար»։
Հետևեք մեզ — Facebook | Youtube
Պաշտոնյաների ձերբակալությունները Վրաստանում
