Պանդեմիա. մասսայական թաղումներ ԱՄՆ-ում: Ավստրիան, Գերմանիան և Դանիան մեղմացնում են կարանտինը: Լուսանկարներ
Նախ՝ ընդհանուր տվյալներ պանդենիայի մասին, որոնք որոշակի հույս են տալիս:
Պանդեմիայի վիճակագրությունը սարսափելի է: Ապրիլի 11-ի դրությամբ մահացել է կորոնավիրուսով վարակված 102,739 մարդ: 1,699,769-ը հիվանդացել են: Ապաքինվել է 376,339 մարդ:
Բայց ապրիլի 10-ի, ինչպես նաև նախորդ երկու օրերի դինամիկան ավելի լավն է, քան նախկինում:
Մեկ օրում աշխարհում վարակվել է 40,694 մարդ: Սա ավելի քիչ է, քան նախորդ օրը՝ 50, 111: Մեկ օրում մահացել է 2 անգամ ավելի քիչ մարդ՝ 2,050 մահ, նախորդ օրը մահացել էր 5,131 մարդ:
Միացյալ Նահանգներ. զոհերն ավելի շատ են, քան 30 տարվա ընթացքքում՝ պատերազմներում
Ապրիլի 10-ին պանդեմիայի մեկնարկից ի վեր ԱՄՆ-ն ունեցավ մահացությունների ամենամեծ թիվը մեկ օրվա ընթացքում: Ողջ երկրում մահացավ 1.953 մարդ:
Ամերիկյան լրատվամիջոցներում հայտնվեցին դրոնի օգնությամբ արված լուսանկարներ: Դրանցում նկատելի է, թե ինչպես են քիմիական պաշտպանության հագուստներով աշխատողները դագաղներն իջեցնում ընդհանուր գերեզման:
Դա տեղի է ունենում Նյու Յորքի Հարթ կղզում: Թաղում են այն մարդկանց, որոնք չունեն հարազատներ և միջոցներ հուղարկավորության համար: Եթե նախկինում այդպիսի թաղումներ իրականացվում էին շաբաթը մեկ անգամ, և լինում էր մոտ 25 դագաղ, ապա այս օրերին օրական 25 դագաղ են բերում:
- Պանդեմիա, Ռուսաստան․ վարակման բռնկում, բժշկական համակարգը անպատրաստ է, բայց իշխանություններն ուզում են մեղմել մեկուսացումը
- «Սակայն բիզնեսն, այնուամենայնիվ, չենք փակելու»․ Թուրքիան աշխարհում առաջատարն է կորոնավիրուսի տարածման տեմպերով
- «Որոշելը, թե ով պետք է ապրի, ով՝ մեռնի, այն չէ, ինչ ինձ սովորեցրել են», – Նյու Յորքի բժիշկներից մեկի պատմածը
- Կորոնավիրուսը Կովկասում: Թարմացվում է
Նյու Յորքում գրանցվել է գրեթե 150 հազար վարակված և մոտ ութ հազար մարդ մահացել է:
Միայն Նյու Յորքում վարակվածների թիվը ավելի շատ է, քան աշխարհի առանձին որևէ երկրում, ներառյալ Չինաստանը, որտեղից սկսվեց պանդեմիան:
Ապրիլի 11-ի դրությամբ ԱՄՆ-ում կորոնավիրուսով հիվանդացել է ավելի քան կես միլիոն մարդ, մահացել է ավելի քան 18 հազար մարդ՝ ավելին, քան Ամերիկան կորցրեց վերջին 30 տարիների բոլոր պատերազմներում՝ Քուվեյթում, Իրաքում և Աֆղանստանում:
Դրա հետ մեկտեղ, երկրի այլ նահանգներում իրավիճակը շատ ավելի լավ է: Վիսկոնսինի երեք հազար մահճակալով դաշտային հիվանդանոցը պարզվեց, որ պահանջված չէ, և շատ բժիշկներ կամավոր գնացին օգնելու Նյու Յորքի իրենց գործընկերներին:
Սպասվում է, որ ԱՄՆ-ում վարակի գագաթնակետը կսկսվի շաբաթվա ընթացքում:
ԱՄՆ նախագահին առընթեր կորոնավիրուսի դեմ պայքարի շտաբի պետն ասել է, որ, ըստ իր կանխատեսումների, կմահանա մոտ 60 հազար մարդ:
Ավստրիա, Գերմանիա և Չեխիա. զգուշավոր վերադարձ սովորական կյանքին
Ավստրիան (13.555 հիվանդ, 319 մահացած) եվրոպական երկրներից առաջինը հայտարարեց, որ պատրաստվում է վերացնել առևտրի սահմանափակումները: Իշխանությունների կանխատեսումներով՝ եթե որևէ արտառոց բան տեղի չունենա, դա արվելու է ապրիլի 12-ին՝ Զատկից անմիջապես հետո:
Այս օրինակին պատրաստվում է հետևել Չեխիան (5,674 հիվանդ, 119 մահացած), որը Զատիկից հետո ծրագրում է բացել ոչ միայն խանութները, այլև մանկական խաղադաշտերը և մարզադաշտերը:
Դանիան (5,819 հիվանդ, 247 մահացած) հայտարարեց, որ եթե նոր դեպքերի անկման միտումը շարունակվի, կսկսի հրաժարվել կարանտինային միջոցառումներից:
Գերմանիայում դատարանի որոշմամբ վերացվել է Բալթիկ ծովում գտնվող Մեքքլենբուրգ-Արևմտյան Պոմերանիա լողափեր այցելելու արգելքը: Առայժմ դա վերաբերում է միայն տեղի բնակիչներին, որոնք պարտավոր են պահպանել 2,5 մետր սոցիալական հեռավորություն: Երկրի շրջանների միջև հաղորդակցման դաշնային կառավարության արգելքը ուժի մեջ է մնում:
Գերմանիայում (120.157 դեպք ՝ 2,688 մահ) չորս օրվա ընթացքում նկատվում էր կորոնավիրուսով հիվանդների և մահացածների թվի կայուն նվազում:
Այս վիճակագրությունը շատ ավելի լավ է, քան Իտալիայում (147.577 դեպք, 18.849 մահ), Իսպանիայում (157.053 դեպք, 15.970 մահ) և Ֆրանսիայում (124.869 դեպք, 13.197 մահ):
Մեծ Բրիտանիա. կարանտին ևս մեկ շաբաթ
Վարչապետ Բորիս Ջոնսոնը վերակենդանացման բաժանմունքից տեղափոխվել է հիվանդասենյակ: Այնուամենայնիվ, բժիշկները զգուշացնում են, որ նա կկարողանա վերադառնալ աշխատանքի մեկ ամսից ոչ շուտ:
Ջոնսոնի հղի կինը, որը նույնպես վարակվել է կորոնավիրուսով, իրեն լավ է զգում:
Ապրիլի 11-ի դրությամբ Բրիտանիայում 73,758 մարդ վարակվել է, 9,958-ը մահացել:
Վարչապետի պաշտոնակատար Դոմինիկ Ռաաբն ասել է, որ կարանտինի վերացումը և բնականոն կյանքի աստիճանական վերադարձը տեղի է ունենալու փուլերով և տարբեր ժամանակահատվածներում՝ տարբեր տարիքային խմբերի և տարածքների համար:
Նրա խոսքերով՝ փորձագետները այժմ մշակում են այդպիսի պլան, և դա կառավարության հիմնական խնդիրն է:
Նոր Զելանդիա. հաջողություն ամբողջությամբ փակ սահմաններից այն կողմ
Շուրջ հինգ միլիոն բնակչություն ունեցող Նոր Զելանդիան ցույց է տալիս աշխարհում կորոնավիրուսի դեմ պայքարի լավագույն արդյունքներից մեկը: Երկիրը փակեց իր սահմանները և խիստ կարանտին հայտարարեց բոլորից ավելի շուտ` մարտի 20-ին:
Անցած չորս օրվա ընթացքում անընդմեջ այս երկրում նոր հիվանդների թիվը նվազում է: Վարակվածների ընդհանուր թիվը 1312 է, որոնցից ապաքինվել է 422 մարդ, չորսը մահացել:
«Ես զգուշավոր լավատես եմ»,- հայտարարել է Նոր Զելանդիայի վարչապետը:
