Պայթյուն ԼՂ-ի բենզինի պահեստում․ Հայաստանի բժիշկներն ուղղաթիռով մեկնել են օգնության
Պայթյուն ԼՂ-ի բենզինի պահեստում
«Ուղղաթիռով բժիշկների թիմը` անհրաժեշտ դեղորայքով և բժշկական պարագաներով այս պահին մեկնեց դեպի Ստեփանակերտ` օգնության հասցնելու բենզինի պահեստում տեղի ունեցած պայթյունից տուժած մեր հայրենակիցներին»,- առավոտյան, րոպեներ առաջ հաղորդել է Հայաստանի առողջապահության նախարարությունը։
Երեկ երեկոյան Լեռնային Ղարաբաղում՝ Ստեփանակերտ-Ասկերան ավտոճանապարհի հարակից տարածքում`բենզինի պահեստում պայթյուն էր տեղի ունեցել։ Պայթյունի պահին այդտեղ հարյուրավոր մարդիկ էին եղել, որոնք բենզին էին ստանում Արցախից ՀՀ տարհանվելու նպատակով։ Կա 200-ից ավելի վիրավոր։ Մեծամասնության առողջական վիճակը ծանր է կամ ծայրահեղ ծանր։ Տուժածներից 7-ի կյանքը փրկել չի հաջողվել։
Ստեփանակերտի հիվանդանոցն աշխատում է արտակարգ ռեժիմով, սակայն ծանր և սուղ պայմաններում, ուստի կա տարբեր աստիճանի այրվածքներ ստացած քաղաքացիներին Երևան տեղափոխելու անհրաժեշտություն։ ՀՀ առողջապահական գերատեսչության փոխանցմամբ՝ «Ստեփանակերտի կենտրոնական հիվանդանոցում պացիենտները նախապատրաստվում են տեղափոխման»։
«Տարբեր աստիճանի այրվածքներով 290 հիվանդ է դիմել բուժօգնության»
«Արմենպրես»-ին հայտնել են ԼՂ առողջապահության նախարարությունից՝ տեղեկացնելով, որ նրանց ընդունել են ոչ միայն «Հանրապետական բժշկական կենտրոնում», այլև «Արևիկ» բուժմիավորումում, Իվանյանի բուժական կետում և ռուս խաղաղապահների բուժկետում․
«Ցավոք սրտի, 7 տուժածի կյանք հնարավոր չէր փրկել և նրանք մահացել են հիվանդանոցում»։
Հաղորդվում է նաև, որ «13 չճանաչված մարմին տեղափոխվել է Դատաբժշկական փորձաքննության բյուրո»։
«Բազմաթիվ անձինք անհետ կորած են համարվում, քանի որ պայթյունի հետևանքով այրվել են և նրանց վերաբերյալ լրացուցիչ տվյալներ պետք է ճշտվեն»,- հայտնել է գերատեսչությունը։
«Մարդկանց կյանքը փրկելու համար ԼՂ բժշկական հնարավորությունները բավարար չեն»
Ահազանգել էր Արցախի օմբուդսմեն Գեղամ Ստեփանյանը։
«Սանիտարական ավիացիան պետք է շատ շտապ վայրէջք կատարի՝ մարդկանց կյանքեր փրկելու համար։ Շատ շտապ, առանց հապաղելու»,- հայտարարել էր Ստեփանյանը։
Այս ահազանգին էլ հաջորդել էր ՀՀ Առողջապահության նախարարության հայտարարությունն այն մասին, որ տուժածների տեղափոխումը Հայաստան ուղղաթիռով կազմակերպելու նպատակով «ակտիվ աշխատանքներ տարվում են»։ Սակայն տեղափոխումն այդ պահի դրությամբ անհնար էր եղել գիշերային և եղանակային վատ պայմանների պատճառով։
Բացի այդ, նշվում էր նաև, որ Հայաստանի մասնագետները` այրվածքաբաններն ու ռեանիմատոլոգները մշտական կապի մեջ են Ստեփանակերտի գործըներների հետ, խորհրդատվական աջակցություն են ցուցաբերում։
«Ֆրանսիան պատրաստ է արտակարգ ռեսուրսներ ուղարկել»
Արցախում տեղի ունեցած աղետին արձագանքել է Ֆրանսիայի արտգործնախարար Կատրին Կոլոննան։ X-ի իր էջում նա գրել է, որ իր բոլոր մտքերը պայթյունից տուժածների հետ են։
«Ֆրանսիան պատրաստ է արտակարգ ռեսուրսներ ուղարկել։ Ադրբեջանը պետք է անմիջապես թույլ տա հումանիտար օգնության մուտքը»,- ընդգծել է նա։
Հետևեք մեզ — Facebook | Youtube | Telegram
Պայթյուն ԼՂ-ի բենզինի պահեստում
