Չերնոգորիայում չհաջողված հեղաշրջման փորձի մեջ մեղադրել են Ռուսաստանին

Ռուաստանի իշխանությունները կապ են ունեցել 2016թ. Չերնոգորիայում կազմակերպված խռովության նախապատրաստման գործում: Դավադրության նպատակը եղել է կանխել բալկանյան այդ երկրի անդամակցումը ՆԱՏՕ-ին: Այս մասին կիրակի՝ փետրվարի 19-ին, հայտարարել է Չերնոգորիայի հատուկ դատախազ Միլիվոյե Կատնիչը, որը քննում է անցյալ տարվա հոկտեմբերին տեղի ունեցած պետական հեղաշրջման փորձի հանգամանքները:

«Նախկինում մենք ապացույցներ ունեինք առ այն, որ դավադրության կազմակերպման ետևում կանգնած են եղել ռուս ազգայնականների կառույցները, բայց այժմ ապացույցներ կան, որ դրանում որոշակի մակարդակով ներգրավված են եղել ռուսական պետական մարմիները»,- հայտարարել է դատախազը: Ինչպես հաղորդում է «Նեմեցկայա վոլնան», Կատնիչը նշել է, որ ռուսական պետությունը պետք է քննություն անցկացնի և քրեական գործ բացի՝ եղած փաստաթղթերի հիման վրա:

Ըստ հետաքննության տվյալների, որոնք ստացվել են «բարեկամական երկրի», այդ թվում ԱՄՆ-ի ու Մեծ Բրիտանիայի հետախուզական ծառայությունների օգնությամբ, սերբ ազգայնական Ալեքսանդր Սինջելիչը հրավիրվել է Մոսկվա «ռուսական ռազմական կառույցների» ներկայացուցչի կողմից, որը խնդրել է Սինջելիչին կանխել Չերնոգորիայի մուտքը ՆԱՏՕ. դա էլ եղել է դավադրության կազմակերպման գլխավոր պատճառը, նշել է Կատնիչը:

Չերնոգորիայի դատախազությունը 25 մարդու կասկածում է խռովության կազմակերպման մեջ. հիմնականում դրանք սերբ ազգայնականներ են, հետախուզման մեջ են գտնվում նաև երկու ռուս՝ Վլադիմիր Պոպովը և Էդուարդ Շիրիկովը (Շիշմակով)՝ ենթադրյալ գլխավոր կազմակերպիչը: Անցյալ տարվա հոկտեմբերին խռովության ենթադրյալ մասնակիցների ձերբակալությունից հետո հրապարակվել է նաև ապստամբների ծրագիրը, որով նախատեսվում էր գրավել կառավարության նստավայրը, ձերբակալել, և անգամ չեզոքացնել իշխանության որոշ ներկայացուցիչների:

Չերնոգորիայի՝ ՆԱՏՕ-ին անդամակցության արձանագրությունը ստորագրվել է Բրյուսելում անցյալ տարվա մայիսին: Երկիրը կարող է դաշինքի լիարժեք անդամ դառնալ բոլոր գործընթացների ավարտից հետո՝ 2017թ. կեսերին: