Հայաստանի 220 ուսուցիչներ ստանում են 400 հազար դրամից ավելի աշխատավարձ
Ուսուցիչների աշխատավարձի բարձրացում
«Հայաստանում կա 400 հազար դրամ և ավելի աշխատավարձ ստացող ավելի քան 220 ուսուցիչ»,- այսօր խորհրդարանում հայտարարել է Կրթության, գիտության, մշակույթի և սպորտի նախարար Ժաննա Անդրեասյանը։ Սա մեծ թիվ է, եթե հաշվի առնենք, որ ուսուցիչները մինչև վերջերս ցածր վարձատրություն էին ստանում, իսկ միջին ամսական աշխատավարձը 2023 թվականին Հայաստանում կազմել է 269 994 դրամ։
ԱԺ մշտական հանձնաժողովների համատեղ նիստում «ՀՀ 2023 թվականի պետական բյուջեի կատարման մասին» տարեկան հաշվետվության քննարկման ժամանակ նախարարն անդրադարձել է ուսուցիչների կամավոր ատեստավորմանը, տարակարգի շնորհմանը, ինչի շնորհիվ նրանք այժմ բարձր են վարձատրվում։
Նախարարի համոզմամբ՝ այդ հնարավորությունները միտված են ոչ միայն ուսուցիչների աշխատավարձերի, այլև մասնագիտության գրավչության բարձրացմանը։ Ասում է՝ առաջիկայում կներկայացնեն կոնկրետ ցուցանիշներ, որոնք ցույց են տալիս, որ «այդ քաղաքականությունն ունեցել է իր ազդեցությունը»՝ էականորեն ավելացել է դպրոց մուտք գործող ուսուցիչների թիվը։
Գործարկվել է տարակարգի նոր մեխանիզմ
Հանրակրթական դպրոցներում դասավանդող ուսուցիչները կարող են իրենց աշխատավարձը բարձրացնել կամավոր ատեստավորման և/կամ տարակարգ ստանալու միջոցով։
Ժաննա Անդրեասյանի խոսքով՝ նախորդ տարի գործարկվել է տարակարգի նոր մեխանիզմ, որի շրջանակներում արդեն տարակարգ են ստացել 100-ից ավելի ուսուցիչներ․
«Առաջին անգամ շնորհվել է նաև չորրորդ կարգի տարակարգ, որը 50 տոկոս հավելավճարի հնարավորություն է տալիս»։
Տարակարգի շնորհման համար ուսուցիչները այդ նպատակով ստեղծված հանրապետական հանձնաժողովին են ներկայացնում մի շարք փաստաթղթեր։ Կախված տարակարգի աստիճանից՝ պահանջվող փաստաթղթերի ցանկը տարբեր է։ Կառավարության որոշմամբ սահմանված չափանիշներին բավարարելու դեպքում ուսուցիչներին տրվում է առաջին, երկրորդ, երրորդ կամ չորրորդ աստիճանի տարակարգ։ Ըստ այդմ՝ ուսուցիչը համարվում է համապատասխանաբար ավագ, հմուտ, վերապատրաստող կամ հետազոտող։
Առաջին աստիճանի տարակարգի համար ուսուցչի աշխատավարձին գումարվում է 10% հավելավճար, երկրորդ աստիճանի համար` 20%, երրորդ աստիճանի համար` 30%, չորրորդ աստիճանի համար՝ 50%:
Ուսուցիչների 14 տոկոսն ատեստավորված է
Խոսքը, մասնավորապես՝ պետական դպրոցներում դասավանդող 3830 ուսուցիչների մասին է։ Նրանք կամավոր ատեստավորման գործընթացով են անցել 2021-23 թթ․-ին։
2021 թվականին կամավոր ատեստավորմանը մասնակցել է 996 ուսուցիչ։ Այդ ժամանակ դիմելու իրավունք ունեին միայն «Հայոց լեզու», «Հայոց պատմություն», «Մաթեմատիկա», «Ֆիզիկա», «Քիմիա», «Կենսաբանություն», «Աշխարհագրություն» առարկաները դասավանդողները։ 2022 թ․-ին գործընթացին մասնակցել է 2333 ուսուցիչ։
Ատեստավորում անցնելու համար վերջին շրջանում դիմում են ավելի շատ ուսուցիչներ։ Միայն նախորդ տարի ատեստավորման գործընթացին մասնակցելու հայտ է ներկայացրել 6321 ուսուցիչ, մասնակցել է 4326-ը։ Նրանցից 2976-ը հաղթահարել են պահանջվող շեմն ու շարունակում են աշխատել բարձրացված աշխատավարձով։
2023 թ․-ին ատեստավորմանն ամենաշատը մասնակցել են «Հայոց լեզու» առարկան դասավանդող ուսուցիչները` 564 անձ։ Լավագույն եռյակում են եղել «Մաթեմատիկա» (471 անձ) և «Տարրական մանկավարժություն և մեթոդիկա» (446 անձ) առարկաների ուսուցիչները։
Հիշեցնենք, որ 1 դրույք զբաղվածության համար ատեստավորումն անցած ուսուցիչների աշխատավարձը սահմանված է 200 հազար դրամ։
Կամավոր ատեստավորման արդյունքում 90–100% արդյունք ցուցաբերած ուսուցիչներին տրվում է հավելավճար աշխատավարձի 50%–ի չափով, 80–89% արդյունքի դեպքում` 40%–ի չափով, 70–79% արդյունքի դեպքում` 30%–ի չափով։ Եթե ուսուցիչը գրանցել է 60-69% արդյունք, նրան հավելավճար չի տրվում։ Այդ ուսուցիչը կարող է դիմել և նորից անցնել ատեստավորման գործընթացով։
Հավելավճար գյուղական դպրոցների ուսուցիչների համար
ԿԳՄՍ նախարար Ժաննա Անդրեասյանը Ազգային ժողովում տեղեկացրել է՝ մինչև 100 աշակերտ ունեցող գյուղական դպրոցներում դասավանդող բոլոր ուսուցիչները, որոնք ունեցել են մեկ դրույքից պակաս ծանրաբեռնվածություն, ստացել են հավելավճար։
«Սա հնարավորություն է տվել բարձրացնել գյուղական դպրոցներում աշխատող շուրջ 3000 ուսուցչի վարձատրություն»,- ընդգծել է նախարարը։
Նրա փոխանցմամբ՝ նախորդ տարվա սեպտեմբերից կառավարությունը 25 տոկոսով բարձրացել է բնագիտական առարկաներ և տեղեկատվական տեխնոլոգիաներ դասավանդող շուրջ 8420 ուսուցչի աշխատավարձ։
Հետևեք մեզ — Facebook | Youtube | Telegram
Ուսուցիչների աշխատավարձի բարձրացում
