Ճամփորդելու ցանկության արդյո՞ւնք․ ՀՀ-ում ուղևորահոսքը շուտով կհասնի 5 մլն-ի
Ուղևորահոսքի աճ Հայաստանում
Հայաստանի քաղավիացիայի կոմիտեից հայտնում են՝ տարեվերջին կարող է գրանցվել երկրում երբևէ եղած ամենաբարձր ցուցանիշը՝ 5 մլն-ից ավելի ուղևորահոսք։ Կարծում են՝ ինտենսիվ աճի պատճառն ինչպես մարդկանց ճամփորդելու ցանկությունն է, այնպես էլ աշխարհում տիրող իրավիճակը։
«Ռուս-ուկրաինական խնդրով պայմանավորված՝ բավական մեծ ուղևորահոսք կա․ մի շարք ավիաընկերություններ այդ երկրներից իջել են դեպի հարավ, այդ թվում՝ Հայաստան։ Այս համատեքստում մենք բնականոն հաբ ենք դարձել»,- ասում է քաղավիացիայի կոմիտեի նախագահի տեղակալ Ստեփան Փայասլյանը։
Հոկտեմբերի վերջին 4,7 մլն ուղևորահոսք է եղել
2023 թվականի 10 ամիսներին նկատված ակտիվացումը զգալի է եղել՝ 4,7 մլն մարդ։ Նախորդ տարի՝ 2022 թ․-ին գրանցվել էր 3,7 մլն ուղևորահոսք։ Մինչ այդ՝ 2021 թ․-ին, այսպես կոչված, «վերականգնման» շրջան էր երկրի համար՝ պայմանավորված համավարակի հետևանքների հաղթահարմամբ։
«Արմենպրես»-ի հետ զրույցում Քաղավիացիայի կոմիտեի նախագահի տեղակալ Ստեփան Փայասլյանն ասել է․ որ նախքան կորոնավիրուսի տարածումը՝ 2019 թվականին ՀՀ-ում գրանցվել է մոտ 3 մլն ուղևորահոսք։
Ինչո՞վ է պայմանավորված ակտիվությունը
Փայասլյանի փոխանցմամբ՝ երկիրը դիտարկվում է ոչ միայն որպես առանձին ուղղություն, այլև «հաբ, հարթակ այլ երկրներ գնալու համար»։
Ըստ նրա՝ վերջին երկու տարիներին թռիչքների և ուղևորահոսքի ինտենսիվ աճի պատճառներն են՝
- հետքովիդյան ժամանակաշրջանում մարդկանց ճամփորդելու մեծ ցանկությունը,
- ռուս-ուկրաինական պատերազմը։
Նրա խոսքով՝ Հայաստանը կլիներ «հիմնական հաբ» այն դեպքում, եթե սեփական ավիաընկերություններն իրականացնեին ուղևորահոսքի կառավարում։ Ասում է՝ հայկական որոշ ավիաընկերություններ ինչ-որ չափով ստանձնել են այդ դերը, սակայն ընդհանուր առմամբ ներկա պահին մի փոքր այլ տարբերակ է․
«Շատ են այն դեպքերը, երբ օրինակ՝ ռուսական ուղղություններից քաղաքացիները գալիս են Երևան և այստեղից այլ ավիաընկերության միջոցով մեկնում են դեպի եվրոպական երկրներ, որոնք այս պահին ռուսական ավիաընկերությունների համար փակ են»։
Փայասլյանը կարծում է՝ ուղևորահոսքերի ակտիվացմանը նպաստում է նաև ավիաընկերություններին ուղղված գործիքակազմի մշակումը, օրինակ՝ օդի տուրքի, նավիգացիոն տարբեր ծառայությունների համար արտոնությունների սահմանումը նոր ուղղությունների համար։
Որպես գործոն կարևոր է համարում նաև հայկական ավիաընկերությունների ծավալած գործունեությունը։
«Հայաստանի պատմության ընթացքում երբևիցե չի եղել, որ 6 հայկական օդային փոխադրող թռիչքներ իրականացնեն Երևանից։ Իրենք նույնպես նպաստում են ուղևորահոսքի ձևավորմանը։ Եվ դաշտում առկա մրցակցային պայմանները բերում են նաև տոմսերի գների իջեցման»,- պարզաբանել է նա։
Այս տարի հայկական շուկա է մուտք գործել 7 նոր ավիաընկերություն
Փայասլյանն ասում է՝ գործ ունենք «դինամիկ ու փոփոխվող» գործընթացի հետ, քանի որ այդ ավիաընկերությունները որոշ ժամանակ անց կարող են դուրս գալ շուկայից կամ ժամանակավորապես դադարեցնել իրենց գործունեությունը՝ ելնելով իրենց բիզնեսի նպատակահարմարությունից։
Հիշեցնում է՝ Երևանից թռիչքներ կան դեպի Հռոմ, Միլան, Վենետիկ, Ֆրանկֆուրտ, Փարիզ, Լիոն և այլ քաղաքներ։ Աշնանն առաջին անգամ գործարկվեց Երևան-Շրի Լանկա ուղիղ չվերթը։
«2024 թվականի գարնանը Eurowings-ը գործարկելու է Բեռլին-Երևան չվերթը»,- տեղեկացրել է նա։
Ասում է՝ հայկական ավիաընկերությունները ակտիվ աշխատում են նաև ռուսական ուղղությամբ՝ ներառելով ՌԴ տարբեր քաղաքներ։ Ուշադրության կենտրոնում գտնվող ուղղությունների ցանկում են նաև Հնդկաստանը, Չինաստանը, Տաջիկստանը, Թուրքմենստանը։
Հետևեք մեզ — Facebook | Youtube | Telegram
Ուղևորահոսքի աճ Հայաստանում
