Ուժեղ անձրևները կաթվածահար են արել կյանքն Ադրբեջանում
Ուժեղ անձրևներ Ադրբեջանում
Երկու օր շարունակ տեղացող անձրևն Ադրբեջանի բազմաթիվ քաղաքներում և շրջաններում, այդ թվում՝ Բաքվում, մի շարք բարդություններ է առաջացրել։ Ճանապարհները, թունելները, բնակելի թաղամասերը հեղեղվել են, ավտոմեքենաները, տները, բակերը մնացել են անձրևաջրերի տակ, իսկ մարդիկ անօգնական են մնացել՝ հայտնվելով ջրով շրջապատված տարածքներում։
Հաղորդվում է երկու մարդու մահվան մասին։ ԱԻՆ աշխատակիցները Բաքվի Սաբունչի շրջանի հեղեղված թունելից դուրս են բերել 1976 թվականին ծնված Շիրինով Էլնուր Ֆազիլ օղլուի և 1995 թվականին ծնված Աբբասով Քոչերի Ֆարման օղլուի մարմինները։
Հոկտեմբերի 22-ին Էկոլոգիայի և բնական պաշարների նախարարությունը, Արտակարգ իրավիճակների նախարարությունը, Բաքվի գործադիր իշխանությունն ու Ադրբեջանի ջրային պաշարների պետական գործակալությունը հրապարակել են համատեղ հայտարարություն անձրևի հասցրած վնասների վերացման մասին։
«Օդերևութաբանների տվյալներով՝ հոկտեմբերի 22-ին՝ ժամը 9:00-ի դրությամբ տեղումների քանակը Բաքվում և Ապշերոնյան թերակղզում կազմել է 86 մմ (ամսական նորմայի 306 տոկոսը)։
Ինտենսիվ տեղումների պատճառով Բաքու քաղաքում և Ապշերոնի շրջանում հեղեղված տարածքներում առաջացած խնդիրների վերացման նպատակով համապատասխան հաստատությունները մշտապես աշխատում են ուժեղացված աշխատանքային ռեժիմով և իրականացնում են համատեղ միջոցառումներ։
ԱԻՆ ուժերն անմիջապես ուղղորդվել են դեպքի վայրեր, նրանք ջուրը դուրս են բերում հեղեղված տարածքներից, տարհանում են օգնության կարիք ունեցող քաղաքացիներին, իրականացնում են անվտանգության համար անհրաժեշտ այլ միջոցառումներ»,- ասված է հաղորդագրության մեջ։
Հաղորդվում է նաև, որ Բաքվի գործադիր իշխանությունն ուսումնասիրություններ է իրականացնում քաղաքի տարածքում, մասնավորապես՝ կամուրջների, թունելների և անցումների մոտ խոցելի հատվածների բացահայտման ուղղությամբ։
«Համապատասխան հաստատություններին հանձնարարականներ են տրվել քաղաքի կամուրջների, թունելների և անցումների վրա ջրային պոմպերի ամրապնդման և կատարելագործման ուղղությամբ։ Ներկայումս իրականացվում է պողոտաներում և փողոցներում անձրևաջրերի հավաքման ցանցերի և ջրային կոլեկտորների գույքագրում, միջոցներ են ձեռնարկվում թերությունների բացահայտման, ապագայում նման իրավիճակների առաջացման կանխարգելման, ինչպես նաև հետևանքների օպերատիվ վերացման ուղղությամբ»։
Երկրում շարունակվող անձրևային եղանակը Բաքվում և Ապշերոնյան թերակղզում աստիճանաբար կդադարի հոկտեմբերի 22-ի կեսօրից, իսկ արևմտյան շրջաններից սկսած՝ մարզերի մեծ մասում անձրևը կդադարի երեկոյան։ Ավելի վաղ այդ մասին հայտնել էր Էկոլոգիայի նախարարության Ազգային հիդրոօդերևութաբանական ծառայությունը։
