Ոստիկանությունը հայտնաբերել է անձին, որն այրված մոմ էր լցրել ապրիլյան պատերազմի զոհերի շիրիմներին։ Թարմացում

18:35 Թարմացում

Ոստիկանությունը 51-ամյա կնոջ է հայտնաբերել, որը տարօրինակ գործողություններ է կատարելիս եղել Աշտարակ քաղաքի գերեզմանատանը։ Ոստիկանության բաժանմունքում կասկածյալը հայտնել է, որ այրված մոմ է լցնելիս եղել գերեզմանաքարերի վրա՝ անեծք հանելու համար։ Ճիշտ է, պարզ չէ, ում վրայից ինչ անեծք է հանելիս եղել բերման ենթարկվածը։ Ոստիկանությունից հայտնում են, որ հետաքննությունը շարունակվում է։

14:00

Անհայտ անձինք պղծել են ապրիլյան պատերազմում զոհված զինծառայողների շիրիմների շուրջ տարածքն ու գերեզմանաքարերը։ Դա տեղի է ունեցել Երևանի «Եռաբլուր» ռազմական պանթեոնի տարածքում։ Ոստիկանությունը հետաքննություն է սկսել։

• Խաղաղության որոնում պատերազմից հետո

• Ղարաբաղում «ապրիլյան պատերազմից» երեք տարի անց։ Ի՞նչ է այն փոխել։ Փորձագետները Բաքվում և Երևանում

Ի՞նչ է տեղի ունեցել

Սոցցանցերի հայկական տիրույթում օգոստոսի մեկին տեսագրություն է հայտնվել «Եռաբլուր» ռազմական պանթեոնից, որում երևում է, որ 2016թ-ի ապրիլյան պատերազմում զոհվածների շիրիմներին սև նյութ Է լցված։

Տեսագրությունը  սոցցանցերի օգտատերերի մոտ բացասական և քննադատական մեկնաբանությունների ալիք է բարձրացրել։

Հետաքննություն է ընթանում

Ոստիկանությունն արդեն սկսել է հետաքննել գործի հանգամանքները։ Ոստիկանության հասարակայնության հետ կապերի և տեղեկատվության վարչության պետի տեղակալ Էդգար Ջանոյանը հաղորդել է, որ «ներկա պահին ոստիկանության փորձագետներն ուսումնասիրում են այն նյութը, որը լցվել է գերեզմաններին, ինչպես նաև այլ մանրամասներ են պարզում»։

Գերեզմանները պղծելու վերաբերյալ արտահայտվել է նաև պաշտպանության նախարարության մամուլի խոսնակ Արծրուն Հովհաննիսյանը․

«Կատարվածի առթիվ մենք հայտարարությամբ հանդես կգանք բոլոր հանգամանքների մանրազնին ուսումնասիրումից հետո։ Այնուամենայնիվ, պաշտպանության նախարարությունը քննադատում է վանդալիզմի կամ ապրիլյան պատերազմի հերոսների հիշատակի հանդեպ անհարգալից վերաբերմունքի ցանկացած դրսևորում»։

Ի՞նչ են գրում սոցցանցերում

Ֆեյսբուք սոցիալական ցանցի օգտատերերը միասնական են այս հարցում, նրանք իրավապահ մարմիններից պահանջում են որքան հնարավոր է արագ հետաքննությունն ավարտել, գտնել հանցագործներին և պատժել։

Ահա մի քանի մեկնաբանություն․

«Այս ո՞ւր ենք հասել…»

«Ինչի՞ ենք սպասում։ Գտնել ու մահապատժի ենթարկել, առանց դատ ու դատաստանի»։

«Կրկին պետք է մահապատիժ մտցնել և պատժել վանդալներին»։

«Ես շատ եմ կասկածում, որ նրանք պատժվելու են օրենքի ողջ խստությամբ։ Նրանց պետք է պատժել օրենքի տառից դուրս»։

«Հայաստանի ոստիկանություն, մենք սպասում ենք զեկույցին»։

«Ով էլ դա արած լինի, պետք է կախել Հանրապետության հրապարակում»։

2016թ-ի ապրիլյան պատերազմը

2016թ-ի ապրիլի 1-ի լույս 2-ի գիշերը ղարաբաղյան հակամարտության կողմերի միջև բախումները վերածվեցին լայնամասշտաբ մարտական գործողությունների։

Դաժան մարտերի հետևանքով, որոնք տևեցին չորս օր շարունակ Լեռնային Ղարաբաղի և Ադրբեջանի զինված ուժերի շփման գծում և ստացան «չորսօրյա ապրիլյան պատերազմ» անվանումը, պաշտոնական Բաքուն հաղորդեց 31 զոհված զինծառայողների մասին (ըստ անկախ աղբյուրների՝ Ադրբեջանի կորուստներն ավելի շատ էին), իսկ Հայաստանի պաշտպանության նախարարությունը հայտարարեց   մարտական կազմից 77 հոգու կորստի մասին։

Լեռնային Ղարաբաղի շուրջ սկսված պատերազմը 1990-ականների սկզբին Հարավային Կովկասի չլուծված հակամարտություններից մեկն է։ 1994թ-ին հրադադարի համաձայնագիր է ստորագրվել, սակայն փոխհրաձգությունը շփման գծում չի դադարում։