Նոր աշխատատեղեր ու ֆինանսական օգնություն․ Հայաստանի աջակցությունն Արցախին շարունակվում է

2021 թ. մարտին Արցախում բացվել  600 նոր աշխատատեղ։ Դա հնարավոր է եղել Հայաստանի օգնության շնորհիվ։

Աշխատանքի և սոցիալական հարցերի նախարար Մեսրոպ Առաքելյանը հաղորդել է, որ կառավարությունը որոշում է կայացրել, որի համաձայն՝ Հայաստանի ռեզերվային բյուջեից Արցախի կառավարությանն ավելի քան 4 մլրդ դրամ կփոխանցվի։

Բացի այդ, կառավարության նիստին հաստատվել է համաձայնագրի նախագիծ, ըստ որի՝ հաջորդ տասը տարիների ընթացքում յուրաքանչյուր տարի Հայաստանն Արցախի բյուջե կփոխանցի 10-ական միլիարդ դրամ։

Այս գումարները կուղղվեն Արցախյան երկրորդ պատերազմի ժամանակ ֆիզիկական և իրավաբանական անձանց կորցրած գույքի փոխհատուցմանը։

Արցախին Հայաստանի ֆինանսական օգնությունը 2020 թ-ի սեպտեմբերից գերազանցել է 50 մլրդ դրամը։

• Նոր հին սահման․ ինչո՞ւ են հայկական գյուղերը հայտնվել Ադրբեջանի տարածքում

• Տեղեկատվական զենքն արցախյան երկրորդ պատերազմում։ Գնահատական Հայաստանից

Ձեռնարկություններին փոխհատուցվում է աշխատակիցների եկամտահարկը

2021 թ. հունվարին Արցախում սկսվել է ոչ պետական ձեռնարկությունների աշխատակիցների եկամտահարկի փոխհատուցումը։

«Դրա շնորհիվ՝ ձեռնարկությունները հնարավորություն են ստացել նոր աշխատակիցներ ընդունելու, և մարտին Արցախի մասնավոր հատվածում զբաղվածների թիվն ավելացել է 600 մարդով։ Ներկայիս դրության մեջ սա լավ ցուցանիշ է», — նշել է աշխատանքի և սոցիալական հարցերի նախարար Մեսրոպ Առաքելյանը։

Բացի այդ, Հայաստանի ռեզերվային բյուջեից հատկացվելիք 4 միլիարդի հաշվին կշարունակվի Արցախի բնակիչների կոմունալ ծախսերի վճարումը․ խոսքն էլեկտրաէներգիայի, գազի և կապի վարձավճարների մասին է։ Այս ծրագիրը գործարկվել է 2020 թ-ի սեպտեմբերին, և այժմ որոշում է կայացվել շարունակել այն մինչև 2021 թ-ի վերջը։

Ինչի՞ վրա է ծախսվելու ամենամյա 10 միլիարդը

Գումարը կուղղվի 2020 թ-ի աշնանն Արցախյան երկրորդ պատերազմի ժամանակ ֆիզիկական և իրավաբանական անձանց կորցրած գույքի փոխհատուցմանը։ Գումարները տրամադրվելու են նրանց, ովքեր կորցրել են հասարակական և արտադրական նշանակության շենքեր, արտադրության միջոցներ, այգիներ, խաղողի այգիներ և անասուն, գյուղանտեսական և այլ տեխնիկա։

Եթե փոխհատուցման գումարը 5 մլն դրամից պակաս է, այն կտրամադրվի միանգամից, իսկ ավելի խոշոր գումարի դեպքում մուրհակներ կտրամադրվեն՝ տարեկան 10% եկամտաբերությամբ։

Տուժածներից յուրաքանչյուրին (լինի ֆիզիկական անձ կամ ձեռնարկություն) պլանավորվում է տրամադրել մինչև 100 միլիոն դրամ։

Արտոնություններ են նախատեսված նրանց համար, ովքեր ապրել են բնակավայրերում, որոնք պատերազմի հետևանքով անցել են Ադրբեջանի վերահսկողության տակ․

• ֆիզիկական անձանց 100%-ով ներվելու են բանկային վարկերը,

• իրավաբանական անձանց՝ մինչև 50%։

Բացի այդ, մոտակա երեք տարում Արցախի բնակիչներին կօգնեն մասնակիորեն և ամբողջությամբ մարել հիպոթեկը, գյուղատնտեսական և փոքր բիզնեսի վարկերը։

Վարչապետի հաշվետվությունը պատերազմի ժամանակ «Հայաստան» հիմնադրամի աշխատանքի մասին

Վարչապետ Նիկոլ Փաշինյանը կառավարության նիստին հայտարարել է, որ Արցախյան երկրորդ պատերազմի ժամանակ Հայաստանի բյուջեից ծախսվել է մոտ 120 մլրդ դրամ լրացուցիչ գումար։ 52 միլիարդը տրամադրվել է «Հայաստան» հիմնադրամի բյուջեից։

Փաշինյանն ընդգծել է, որ բոլոր հայտարարություններն այն մասին, որ հիմնադրամի միջոցներից պարգևավճարներ են տրվել պաշտոնյաներին, չեն համապատասխանում իրականությանը։

1992 թ-ից մինչև 2020 թ-ի սեպտեմբեր հիմնադրամին 247 մլն դոլար է նվիրաբերվել, իսկ 44-օրյա պատերազմի ընթացքում՝ 212 մլն դոլար։ Այդ գումարով Արցախում ենթակառուցվածքների և բնակարանի շինարարություն է կազմակերպվելու։

«Ծրագրի արժեքը կազմելու է մոտ 110 մլրդ դրամ, այն կտևի երեք տարի։ Սա ամենախոշոր ծրագիրն է, որը հիմնադրամը երբևէ իրականացրել է Արցախում», — ասել է Փաշինյանը։