«Նման վտանգ տեսանելի չէ». Հայաստանի պաշտպանության նախարարը՝ նոր պատերազմի մասին
ՀՀ պաշտպանության նախարարի հարցազրույցը
Հանրային հեռուստաընկերության եթերում Հայաստանի պաշտպանության նախարարը խուսափել է նոր պատերազմի հավանականության վերաբերյալ գնահատականներ հնչեցնել: Սուրեն Պապիկյանը միայն ասել է, թե այս փուլում նման վտանգ տեսանելի չէ: Սակայն նախարարը հաստատել է, որ սահմանին «կա որոշակի լարվածություն», լինում են միջադեպեր, լինում է նաև հարևանների՝ Բաքվի կողմից կեղծ տեղեկատվություն, թե հայկական կողմը խախտել է հրադադարի ռեժիմը:
«Որպես կանոն, Հայաստանի Զինված ուժերը հրադադարի ռեժիմի խախտումը կանխում են՝ լռեցնելով հակառակորդին, այսինքն՝ եթե կա փոխհրաձգություն, ապա դա մեր նախաձեռնությամբ չէ»,- շեշտել է պաշտպանության նախարարը:
Նա անդրադարձել է նաև պլանավորված բարեփոխումներին, այդ թվում պրոֆեսիոնալ բանակի անցում կատարելու մտադրությանը, ժամանակակից զինամթերքի ձեռքբերմանն ու Գլխավոր շտաբի պետի նշանակմանը:
Պաշտպանության նախարարի հարցազրույցի կարևորագույն թեզերը:
«Անցում պրոֆեսիոնալ բանակի». բարեփոխումների մասին
Պաշտպանության նախարարը հայտարարել է, որ պրոֆեսիոնալ բանակ ունենալու գործընթացը մեկնարկել է: Նրա տեղեկացմամբ՝ առաջիկայում ՊՆ-ն հանդես է գալու օրենսդրական ծավալուն նախաձեռնությամբ: Փակագծերը, սակայն, չի ցանկացել բացել:
Նախարարի գնահատմամբ՝ բանակի բարեփոխման առաջին քայլը ռազմա-ուսումնական հաստատությունների որակի, ձևի ու բովանդակության փոփոխությունն է, երկրորդը՝ անցումը պրոֆեսիոնալ բանակի:
Պապիկյանն ընդգծել է, որ քննադատողները լավ հասկանում են՝ մեկ օրում հնարավոր չէ բանակը գլխիվայր փոխել:
Ներկայիս պայմանագրայիններն, ըստ նրա, առաջիկայում ունենալու են ատեստավորման հնարավորություն, իսկ ժամկետայիններին խրախուսելու են մնալ բանակում՝ անցնելով պայմանագրային ծառայության:
«Ստեղծելու ենք սոցիալական երաշխիքներ, հնարավորություններ, որպեսզի զինծառայողն իր ապագան տեսնի բանակում՝ պրոֆեսիոնալ զինվորի դերում: Սա պետք է լինի մեր ապագա բանակի հիմքն ու հենարանը»:
«Պատճառը նաև ճիշտ որոշում կայացնելն է». ԳՇ պետի նշանակման մասին
Նախարարը խնդրահարույց չի համարում այն, որ Գլխավոր շտաբի պետի պաշտոնը չորս ամիս է՝ թափուր է։ Մինչդեռ, այս հարցով կառավարությունն արժանանում է և՛ խորհրդարանական ընդդիմության, և՛ այլ ուժերի քննադատությանը:
Պապիկյանը վստահեցնում է՝ պետի պաշտոնակատարը լիովին իրականացնում է նրա լիազորությունները, ԳՇ նոր պետ կնշանակվի նախարարությունում կառուցվածքային փոփոխություններից հետո միայն:
Պաշտպանության նախարարը հայտարարել է, որ ներդրվելու է նոր մոդել, ըստ որի՝ ԳՇ պետը լինելու է պաշտպանության նախարարի առաջին տեղակալը։ Զինված ուժերի գլխավոր շտաբն այլևս չի զբաղվելու գնումներով և թիկունքի ապահովմամբ։ Իսկ գործող օրենքի համաձայն, ԶՈւ օպերատիվ, տեխնիկական և թիկունքային ապահովումն իրականացնում է գլխավոր շտաբը։
«Գնում, սպասարկում, ապահովում․ այդ ամենով պետք է զբաղվեն նախարարության կազմում գտնվող այլ վարչություններ։ Այսինքն՝ սկսած թիկունքային ապահովումից պետք է իրականացվի ոչ զինվորականների կողմից։ Շատ բաներ լինելու են պատվիրակված, ինչպես սննդի դեպքում է»,- նշել է նա։
Այս փոփոխությունները նախատեսված են օրենսդրական նոր փաթեթով: Այն արդեն շրջանառվել է կառավարությունում, առաջիկայում կներկայացվի խորհրդարանի քննարկմանը:
Մյուս կողմից՝ նախարար Պապիկյանը նկատել է՝ ԳՇ պետ չնշանակելու պատճառը միայն նոր օրենքի ընդունումը չէ, այլև «ճիշտ որոշում կայացնելը»:
«Չենք պատրաստվում հայտարարել». զենք-զինամթերքի ձեռքբերման մասին
Պապիկյանն ասել է, որ պաշտպանունակությունը բարձրացնելու համար Հայաստանն, իհարկե, համալրում է իր սպառազինությունը: Նախարարն ընդգծել է, որ ձեռքբերվող զինատեսակների մասին կառավարությունը «չի պատրաստվում հանրայնորեն հայտարարել»:
Նա միայն շեշտել է, որ կատարվում են քայլեր, որպեսզի Հայաստանի բանակը «ունակ լինի պաշտպանելու ՀՀ սուվերեն տարածքները»:
ՀՀ պաշտպանության նախարարի հարցազրույցը
