Կադրային փոփոխություններ Հայաստանի կառավարությունում. պաշտոնանկություններ և նոր նշանակումներ ժամերի ընթացքում

Հայաստանի կառավարությունում ընթանում են կադրային փոփոխություններ: Նոյեմբերի 20-ին հրաժարական տվեց պաշտպանության նախարար Դավիթ Տոնոյանը, կառավարությունից հեռացավ աշխատանքի և սոցիալական հարցերի նախարար Զարուհի Բաթոյանը: Ժամեր անց հայտնի դարձան նրանց փոխարինողների անունները:

Վարչապետ Նիկոլ Փաշինյանը ավելի վաղ ներկայացրել էր «ճանապարհային քարտեզ»՝ ստեղծված ճգնաժամային իրավիճակը հաղթահարելու, կայունություն և անվտանգություն հաստատելու համար: Վարչապետն իր ծրագրում նշել էր, որ իր ծրագիրն արդյունավետ իրականացնելու համար սկսում է բարեփոխել նախարարների կաբինետը:

• «Պետք է ընտրություն կատարեինք շատ վատի և ողբերգության միջև»․ արցախյան պատերազմի ընթացքի մասին
• Հայաստանի նախագահը անխուսափելի է համարում վարչապետի հրաժարականը և խորհրդարանական ընտրությունները

Ով ում է փոխարինելու

Հայկական լրատվամիջոցները պաշտպանության նախարարի պաշտոնանկության մասին սկսեցին գրել նոյեմբերի 20-ի առավոտյան: Պաշտոնպես՝ լուրը հաստատվեց ավելի ուշ։

«Իմ գործունեության որևէ ամփոփում տեղին չէ այսօր, որովհետև ակամայից այդ ամփոփումը դարձավ Արցախյան երկրորդ պատերազմը: Բավարարվա՞ծ եմ պատերազմի ընթացքում և դրա նախապատրաստական փուլում իմ աշխատանքից: Կարծում եմ՝ որոշ հայեցակարգային ուղղություններ վերանայման կարիք ունեն, որ չհասցրի իրագործել, և այս առումով ես պատրաստ եմ կրելու իմ բաժին պատասխանատվությունը», — ասվում է Դավիթ Տոնոյանի ուղերձում:

Նա ՊՆ ղեկավարի պաշտոնում նշանակվել էր 2018-ի մայիսին ՝ թավշյա հեղափոխությունից անմիջապես հետո:

Տոնոյանի տեղը կզբաղեցնի Վաղարշակ Հարությունյանը, որը 1999-2000թթ. արդեն զբաղեցրել է այս պաշտոնը:

2002 թվականից նա անցել է քաղաքական դաշտ, անդամակցել ընդդիմադիր «Հանրապետություն» կուսակցությանը: Նույն թվականին նա աստիճանազրկվել է այն ժամանակ գործող նախագահ Ռոբերտ Քոչարյանի հրամանագրով, կորցնելով գեներալ-լեյտենանտի կոչումը: 2019-ին նրա կոչումը վերականգնվեց, ավելին՝ 2020-ի օգոստոսից նա նշանակվեց վարչապետ Նիկոլ Փաշինյանի գլխավոր խորհրդական:

Նոյեմբերի 20-ին գեներալ-մայոր Անդրանիկ Փիլոյանը նշանակվեց ԱԻՆ պետ Ֆելիքս Ցոլակյանի փոխարեն, որն առաջիններից մեկն էր հրաժարականի դիմում ներկայացրել: Արցախյան պատերազմի օրերին նա արժանացավ Հայաստանի ազգային հերոսի կոչման:

Աշխատանքի և սոցիալական հարցերի նախարարի պաշտոնում Զարուհի Բաթոյանին կփոխարինի Մեսրոպ Առաքելյանը: 2018 թվականից նա հասարակական հիմունքներով հանդիսանում է վարչապետ Նիկոլ Փաշինյանի խորհրդականը:

Էլ ով է լքել կառավարությունը

Վարչապետ Նիկոլ Փաշինյանը նոյեմբերի 16-ին խորհրդարանի արտահերթ նիստում հայտարարեց, որ որոշում է կայացրել աշխատանքից ազատել արտգործնախարար Զոհրաբ Մնացականյանին: Դրանից ընդամենը մի քանի րոպե անց արտաքին գործերի նախարարության մամուլի քարտուղար Աննա Նաղդալյանը հայտարարեց, որ Մնացականյանը հրաժարական է տվել՝ հրապարակելով նրա ձեռագիր դիմումը:

Հրաժարականներ են ներկայացրել նաև Ազգային ժողովի նախագահի խորհրդական Աշոտ Ղուլյանը, արտաքին գործերի փոխնախարար Շավարշ Քոչարյանը, բնապահպանության փոխնախարար Իրինա Կապլանյանը, փոխվարչապետ Տիգրան Ավինյանի աշխատակազմի ղեկավար Վարագ Սիսեռյանը։ Նոյեմբերի 20-ին աշխատանքից հեռացել է ՊՆ մամուլի խոսնակ Շուշան Ստեփանյանը։

Ընդդիմության արձագանքը

Վարչապետի հրաժարականը պահանջող ընդդիմությունը հայտնի ու հարգված, բանիմաց մարդկանց կոչ է անում չընդունել իրենց առաջարկվող պաշտոնները, թույլ չտալ «դավաճանին»՝ իրենց անուններն օգտագործել իր հեղինակության համար:

«Ընդունելով առաջարկը՝ նույն պահին դուք դառնալու եք նրա դավաճանության համահեղինակը, դուք նրա հետ կիսելու եք պատասխանատվությունը։ Պատմության մեջ մնալու եք որպես Շուշին, Հադրութը, Մարտունու ու Մարտակերտի գյուղերը, Քարվաճառի ճանապարհը, Ղազանչեցոցը, Ամարասը թուրքին հանձնած առաջնորդի կառավարության անդամ», — ասված է Ազգային անվտանգության ծառայության նախկին պետ Արթուր Վանեցյանի ուղերձում:

Վանեցյանն իրեն աշխատանքից հեռացնելուց հետո դարձավ ընդդիմադիր և հիմնեց «Հայրենիք» կուսակցությունը:

Վանեցյանը նշում է, որ ինքը հասկանում է ճգնաժամի դժվարին շրջանում երկրին օգնելու մարդկանց ցանկությունը, բայց կոչ է անում այդ քայլին դիմել առողջ ուժերի իշխանության գալուց հետո: